ياشلىق باھار گۈللىرى پارتىيە ۋە خەلق ئەڭ ئېھتىياجلىق بولغان جايدا پورەكلەپ ئېچىلسۇن

　　خەلق تورى ئۇيغۇرچە قانىلىنىڭ 17- مارت بېيجىڭدىن بەرگەن تېلېگراممىسى: جۇڭگو كومپارتىيەسى مەركىزىي كومىتېتىنىڭ باش شۇجىسى، دۆلەت رەئىسى، مەركىزىي ھەربىي ئىشلار كومىتېتىنىڭ رەئىسى شى جىنپىڭ 3-ئاينىڭ 15-كۈنى بېيجىڭ داشۆسىنىڭ خۇبېيغا ياردەم بېرىش داۋالاش ئەترىتىدىكى «90- يىلدىن كېيىن تۇغۇلغان» بارلىق پارتىيە ئەزالىرىغا جاۋاب خەت يېزىپ، ئۇلاردىن ھەمدە يۇقۇمنىڭ ئالدىنى ئېلىش ۋە ئۇنى تىزگىنلەش سېپىدە كۈرەش قىلىۋاتقان بارلىق ياشلاردىن سەمىمىي ھال سورىدى.

　　شى جىنپىڭ جاۋاب خېتىدە مۇنۇلارنى بىلدۈردى: يېڭى تاجسىمان ۋىرۇسلۇق ئۆپكە ياللۇغى يۇقۇمىنىڭ ئالدىنى ئېلىش ۋە ئۇنى تىزگىنلەش كۈرىشىدە، سىلەر بىرىنچى سەپتە باتۇرلۇق بىلەن يۇقۇمنىڭ ئالدىنى ئېلىش ۋە ئۇنى تىزگىنلەش خادىملىرى بىلەن بىرلىكتە، جاپا-مۇشەققەتتىن قورقماي، سەپنىڭ ئالدىدا مېڭىپ، پىداكارلىق كۆرسىتىپ، ياشلىقنىڭ جۇشقۇن كۈچىنى نامايان قىلىپ، لاياقەتلىك جاۋاب قايتۇردۇڭلار. بارلىق ياشلار ئۆز ھەرىكىتى ئارقىلىق، ھەم يېڭى دەۋردىكى جۇڭگو ياشلىرىنىڭ ياخشى ئوبرازىنى ئىسپاتلىدى، ھەمدە چوڭ ۋەزىپىلەرنى ئۈستىگە ئالالايدىغانلىقىنى ئىسپاتلىدى!

　　شى جىنپىڭ مۇنداق دەپ كۆرسەتتى: ياش ئەۋلادلار غايىلىك، قابىلىيەتلىك ۋە مەسئۇلىيەتچان بولسا، دۆلەتنىڭ ئىستىقبالى بولىدۇ، مىللەتتە ئۈمىد بولىدۇ. مەن سىلەرنىڭ تىرىشىپ خەلق ئۈچۈن خىزمەت قىلىش داۋامىدا ساغلام ئۆسۈپ يېتىلىشىڭلارنى، جاپاغا چىداپ كۈرەش قىلىش داۋامىدا ئىرادە-پەزىلەتنى يېتىلدۈرۈشۈڭلارنى، ئەمەلىيەت داۋامىدا خىزمەت قابىلىيىتىڭلارنى ئۆستۈرۈشۈڭلارنى، ئۆلۈمگە ئامال، ئاغرىققا سەۋەب قىلىدىغان ئىش ئورنىڭلاردا داۋاملىق كۈرەش قىلىشىڭلارنى، ھەمدە سىلەردەك بارلىق ياشلارنىڭ بوران-چاپقۇندىن قورقماي، ئېغىر يۈكنى باتۇرلۇق بىلەن زىممىسىگە ئېلىشقا تۈرتكە بولۇشىنى، ياشلىق باھار گۈللىرىڭلارنى پارتىيە ۋە خەلق ئەڭ ئېھتىياجلىق بولغان جايدا پورەكلەپ ئېچىلدۇرىشىڭلارنى ئۈمىد قىلىمەن.

　　كۆرۈپ بېكىتكۈچى: موللانىياز تۇنىياز

　　مەنبە: خەلق تورى