خەلق تورى ئۇيغۇرچە قانىلىنىڭ 18- ئۆكتەبىر بېيجىڭدىن بەرگەن تېلېگراممىسى: جۇڭگو كوممۇنىستىك پارتىيەسى مەملىكەتلىك 19- قۇرۇلتىيى 18- چېسلا چۈشتىن بۇرۇن خەلق سارىيىدا ئېچىلدى. شى جىنپىڭ 18- نۆۋەتلىك مەركىزىي كومىتېتقا ۋاكالىتەن، «ھاللىق جەمئىيەت بەرپا قىلىش نىشانىنى ئومۇميۈزلۈك ئىشقا ئاشۇرۇپ، يېڭى دەۋردىكى جۇڭگوچە سوتسىيالىزمنىڭ ئۇلۇغ غەلىبىسىنى قولغا كەلتۈرۈش» دېگەن تېمىدا دوكلات بەردى.
شى جىنپىڭ مۇنۇلارنى كۆرسەتتى: بۇ قېتىمقى قۇرۇلتاينىڭ تېمىسى شۇكى، ئەسلىي مەقسەتنى ئۇنتۇماي، بۇرچنى ئەستە چىڭ ساقلاپ، جۇڭگوچە سوتسىيالىزمنىڭ ئۇلۇغ بايرىقىنى ئېگىز كۆتۈرۈپ، ھاللىق جەمئىيەت بەرپا قىلىش نىشانىنى ئومۇميۈزلۈك ئىشقا ئاشۇرۇپ، يېڭى دەۋردىكى جۇڭگوچە سوتسىيالىزمنىڭ ئۇلۇغ غەلىبىسىنى قولغا كەلتۈرۈپ، جۇڭخۇا مىللەتلىرىنىڭ ئۇلۇغ گۈللىنىشىدىن ئىبارەت جۇڭگو ئارزۇسىنى ئىشقا ئاشۇرۇش ئۈچۈن بوشاشماي كۈرەش قىلىشتىن ئىبارەتتۇر.قۇرۇلتاي ھەيئەت رىياسىتى دائىمىي كومىتېتىنىڭ ئەزالىرى رەئىس سەھنىسىنىڭ ئالدىنقى رېتىدىن ئورۇن ئالدى.
يىغىنغا لى كېچياڭ رىياسەتچىلىك قىلدى. چۈشتىن بۇرۇن سائەت 9دا، يىغىن باشلاندى. ھەممىسى ئورۇنلىرىدىن تۇرۇپ، «جۇڭخۇا خەلق جۇمھۇرىيىتىنىڭ دۆلەت شېئىرى»نى ئۈنلۈك ئوقۇدى. بۇنىڭدىن كېيىن، بارلىق يولداشلار ماۋ زېدۇڭ، جوۋ ئېنلەي، ليۇ شاۋچى، جۇدې، دېڭ شياۋپىڭ ۋە چېن يۈن قاتارلىق مەرھۇم پېشقەدەم پىرولېتارىيات ئىنقىلابچىلىرى ۋە ئىنقىلابىي قۇربانلارغا سۈكۈتتە تۇرۇپ تەزىيە بىلدۈردى.
لى كېچياڭ مۇنۇلارنى جاكارلىدى: پارتىيە 19- قۇرۇلتىيىغا قاتنىشىشقا تېگىشلىك ۋەكىل 2280 نەپەر، ئالاھىدە تەكلىپ قىلىنغان ۋەكىل 74 نەپەر بولۇپ، جەمئىي 2354 نەپەر. بۈگۈن ئەمەلىي قاتناشقان كىشى جەمئىي 2338 نەپەر. ئۇ يىغىنغا سىرتتىن قاتناشقان پارتىيە سىرتىدىكى دوستلارنى ۋە ئالاقىدار تەرەپلەردىن قاتناشقان مەسئۇل يولداشلارنى قىزغىن قارشى ئالدى.
كۆرۈپ بېكىتكۈچى: موللانىياز تۇنىياز
مەنبە: خەلق تورى