خەلق تورى ئۇيغۇرچە قانىلىنىڭ 2-فېۋرال بېيجىڭدىن بەرگەن تېلېگراممىسى: دۆلەت رەئىسى شى جىنپىڭ 1-فېۋرال دياۋيۈتەي دۆلەت مېھمانخانىسىدا ئېلىمىزگە رەسمىي زىيارەتكە كەلگەن ئەنگلىيە باش ۋەزىرى تېرېسا مېي بىلەن كۆرۈشتى.
شى جىنپىڭ ئالدى بىلەن تېرېسا مېيغا ئايال پادىشاھ ئېلزابىتⅡگە يوللىغان سەمىمىي سالىمى ۋە ياخشى تىلىكىنى يەتكۈزۈشنى ھاۋالە قىلدى. شى جىنپىڭ مۇنداق كۆرسەتتى: ئەنگلىيە يېڭى جۇڭگونى ئەڭ بالدۇر ئېتىراپ قىلغان غەربتىكى چوڭ دۆلەت. دىپلوماتىك مۇناسىۋەت ئورناتقاندىن بۇيان، ئىككى دۆلەتنىڭ ھەرقايسى ساھەلەردىكى ھەمكارلىقىدا مول نەتىجىلەر قولغا كەلتۈرۈلدى. مەن 2015-يىلى ئەنگلىيەدە مۇۋەپپەقىيەتلىك زىيارەتتە بولدۇم، ئىككى تەرەپ جۇڭگو-ئەنگلىيە مۇناسىۋىتىنىڭ «ئالتۇن مۇقەددىمىسى» نى ئورتاق ئاچتى. جۇڭگو ئەنگلىيە بىلەن بىللە، جۇڭگو-ئەنگلىيە مۇناسىۋىتىنىڭ يېڭى دەۋردىكى ساغلام، مۇقىم تەرەققىياتىنى ئىلگىرى سۈرۈپ، ئىككى دۆلەت خەلقىگە تېخىمۇ كۆپ بەخت يارىتىپ، دۇنيانىڭ گۈللىنىشى، مۇقىملىقىغا تېخىمۇ كۆپ تۈرتكە بولۇشنى خالايدۇ.
شىنجاڭ گېزىتى تەرجىمىسى
مەنبە: خەلق تورى