تارىخنى ئەينەك قىلىپ، ئۆتمۈشكە نەزەر سېلىپ كەلگۈسىنى بىلىپ، گۈللىنىش يولىدا قەتئىي ئالغا ئىلگىرىلەش كېرەك

　　جۇڭگو كوممۇنىستىك پارتىيەسى مەركىزىي كومىتېتىنىڭ باش شۇجىسى، دۆلەت رەئىسى، مەركىزىي ھەربىي كومىتېتنىڭ رەئىسى شى جىنپىڭ پات ئارىدا نەشر قىلىنىپ تارقىتىلىدىغان «گۈللىنىش ئەسەرلەر خەزىنىسى»گە «گۈللىنىش يولىدا قەتئىي ئالغا ئىلگىرىلەيلى» دېگەن تېمىدا كىرىش سۆز يېزىپ بەردى.

　　شى جىنپىڭ مۇنداق كۆرسەتتى: تارىخ يېزىپ قائىدە تۇرغۇزۇش، تارىخنى ساقلاپ ئەقىلنى ئېچىش، مەدەنىيەت ئارقىلىق ئادەم تەربىيەلەش، بۇ، جۇڭخۇا مىللىتىنىڭ نەچچە مىڭ يىل داۋاملاشقان ئەنئەنىسى. «گۈللىنىش ئەسەرلەر خەزىنىسى»نى تۈزۈش پارتىيە مەركىزىي كومىتېتى تەستىقلاپ يولغا قويغان مۇھىم، زور مەدەنىيەت قۇرۇلۇشى. پارتىيەمىز خەلقنى يېتەكلەپ سوتسىيالىستىك زامانىۋىلاشقان دۆلەتنى ئومۇميۈزلۈك قۇرۇش يېڭى مۇساپىسىگە ئاتلانغان پەيتتە، بۇ ئەسەرلەر توپلىمىنىڭ نەشر قىلىنىشى بىزنىڭ تارىخىي ئىشەنچنى چىڭىتىپ، دەۋر ئومۇمىي ۋەزىيىتىنى ئىگىلەپ، جۇڭگو يولىدا ياخشى مېڭىپ، جۇڭگوچە زامانىۋىلاشتۇرۇش ئارقىلىق جۇڭخۇا مىللىتىنىڭ ئۇلۇغ گۈللىنىشىنى ئالغا سىلجىتىشىمىزدا ئىنتايىن مۇھىم ئەھمىيەتكە ئىگە.

　　شى جىنپىڭ مۇنداق تەكىتلىدى: جۇڭخۇا مىللىتى دۇنيادىكى ئۇلۇغ مىللەت، ئىنسانىيەت مەدەنىيلىكىنىڭ تەرەققىياتى ئۈچۈن ئۆچمەس تۆھپە قوشتى. يېقىنقى زاماندىن كېيىن، جۇڭخۇا مىللىتى مىسلىسىز ئازاب - ئوقۇبەتلەرنى باشتىن كەچۈردى. شۇنىڭدىن باشلاپ، جۇڭخۇا مىللىتىنىڭ ئۇلۇغ گۈللىنىشىنى ئىشقا ئاشۇرۇش جۇڭگو خەلقى ۋە جۇڭخۇا مىللىتىنىڭ ئەڭ ئۇلۇغ ئارزۇسىغا ئايلاندى. سانسىزلىغان غايىلىك، ئىرادىلىك زاتلار ئىرادىسىدىن قايتماي، ھەر تەرەپلىمە ئىزدىنىپ، تەرەپ - تەرەپكە بېرىپ چۇقان سېلىپ، جاسارەت بىلەن كۈرەش قىلدى. جۇڭگو كوممۇنىستىك پارتىيەسى قۇرۇلغاندىن كېيىن، خەلقنى ئىتتىپاقلاشتۇرۇپ ۋە يېتەكلەپ، ئالدىنقىلارنىڭ ئىزىنى كېيىنكىلەر بېسىپ، مىسلىسىز مۇشەققەتلىك كۈرەش قىلىپ، ماركسىزمنىڭ يېتەكچىلىك ئورنىدا چىڭ تۇرۇپ، جۇڭخۇا مىللىتىنىڭ ئۇلۇغ گۈللىنىشىنى ئىشقا ئاشۇرۇش توغرا يولىنى تاپتى، ئىنقىلاب، قۇرۇلۇش، ئىسلاھاتنىڭ ھەرقايسى تارىخىي مەزگىللىرىدە بوشاشماي تىرىشىش ئارقىلىق، ئورنىدىن دەس تۇرۇش، بېيىشتىن قۇدرەت تېپىشقىچە بولغان ئۇلۇغ ھالقىشنى كۈتۈۋالدى، جۇڭخۇا مىللىتىنىڭ تەرەققىيات مۇساپىسىدىكى ئەڭ قاينام - تاشقىنلىققا تولغان تارىخ سەھىپىسىنى پۈتۈپ چىقتى، جۇڭخۇا مىللىتىنىڭ ئۇلۇغ گۈللىنىشىدە مىسلىسىز پارلاق ئىستىقبال نامايان بولدى. تارىخ شۇنى ئىسپاتلىدى ھەم داۋاملىق ئىسپاتلايدۇكى، جۇڭگو كوممۇنىستىك پارتىيەسىنىڭ كۈچلۈك رەھبەرلىكىدە، ئىلمىي نەزەرىيەنىڭ يېتەكچىلىكى ۋە توغرا يولنىڭ يېتەكلىشىدە چىڭ تۇرۇپ، يۈز مىليونلىغان خەلقنىڭ ئىتتىپاقلىشىپ كۈرەش قىلىدىغان قۇدرەتلىك كۈچىنى مۇجەسسەملىگەندىلا، جۇڭگو خەلقى جۇڭگونىڭ تەرەققىيات، ئىلگىرىلەش تەقدىرىنى ئۆز قولىدا مەھكەم ئىگىلىيەلەيدۇ!

　　شى جىنپىڭ مۇنداق كۆرسەتتى: ئۇلۇغ گۈللىنىشنى ئىشقا ئاشۇرۇشنىڭ تارىخىي مۇساپىسىدە، جۇڭخۇا مىللىتىنىڭ ئەۋلادمۇئەۋلاد ئىلغار ۋە مۇنەۋۋەر ئوغۇل - قىزلىرى ئىزدىنىش، كۈرەش قىلىش، قۇربان بېرىش، ئىجاد قىلىش ئارقىلىق مۇھىم تارىخىي قىممەتكە ۋە دەۋر ئەھمىيىتىگە ئىگە زور مىقداردىكى بىباھا ھۆججەت - ماتېرىياللارنى قالدۇردى. «گۈللىنىش ئەسەرلەر خەزىنىسى» ناملىق چوڭ تىپتىكى تارىخىي ھۆججەت - ماتېرىياللار توپلىمىنى تۈزۈپ نەشر قىلىش يېقىنقى زاماندىن بۇيانقى مۇھىم ئىدىيە ھۆججەت - ماتېرىياللىرىنى تاللاپ تۈزۈش ئارقىلىق ئەجدادلارنىڭ يول ئاچقانلىقىنى بايان قىلىپ ۋە خاتىرىلەپ، كېيىنكىلەرنى كۈرەش قىلىشقا رىغبەتلەندۈرۈشنى مەقسەت قىلغان. ھازىر، دۇنيادا 100 يىلدىمۇ بولۇپ باقمىغان زور ئۆزگىرىش ۋەزىيىتى تېز ئۆزگىرىۋاتىدۇ، جۇڭخۇا مىللىتىنىڭ ئۇلۇغ گۈللىنىشى ئاچقۇچلۇق مەزگىلگە كىردى، بىز تارىخنى ئەينەك قىلىپ، ئۆتمۈشكە نەزەر سېلىپ كەلگۈسىنى بىلىشكە تېخىمۇ موھتاج. بىز پارتىيە تارىخىنى ياخشى ئۆگىنىش ئاساسىدا، جۇڭگونىڭ يېقىنقى زامان تارىخىنى ياخشى ئۆگىنىشىمىز، جۇڭگو تارىخىنى ياخشى ئۆگىنىشىمىز، قەيەردىن كەلگەنلىكىمىزنى، قەيەرگە بارىدىغانلىقىمىزنى ئايدىڭلاشتۇرۇۋېلىشىمىز، جۇڭگو كوممۇنىستلىرىنىڭ نېمە ئىش قىلىدىغانلىقىنى، نېمە ئىشلارنى قىلغانلىقىنى، يەنە نېمە ئىشلارنى قىلىدىغانلىقىنى ئايدىڭلاشتۇرۇۋېلىشىمىز، ئىلگىرى بىزنىڭ نېمە ئۈچۈن مۇۋەپپەقىيەت قازىنالىغانلىقىمىز، كەلگۈسىدە قانداق قىلغاندا داۋاملىق مۇۋەپپەقىيەت قازىنالايدىغانلىقىمىزنى ئايدىڭلاشتۇرۇۋېلىشىمىز كېرەك. مەدەنىيەت ئىشەنچىنى چىڭىتىپ، مەدەنىيەت ئاڭلىقلىقىنى كۈچەيتىپ، ئىنقىلابىي مەدەنىيەتكە ۋارىسلىق قىلىپ، سوتسىيالىستىك ئىلغار مەدەنىيەتنى راۋاجلاندۇرۇپ، جۇڭخۇا مۇنەۋۋەر ئەنئەنىۋى مەدەنىيىتىنى ئىجادىي ئايلاندۇرۇش، يېڭىلىق يارىتىپ تەرەققىي قىلدۇرۇشقا تۈرتكە بولۇپ، جۇڭخۇا مىللىتىنىڭ ئورتاق مەنىۋى ماكانىنى بەرپا قىلىشىمىز كېرەك. تارىخىي جەۋھىرىنى ئايرىپ ئېلىپ، نەزەرىيەدە يېڭىلىق يارىتىشقا تۈرتكە بولۇپ، جۇڭگو ئىلمىنى تېخىمۇ ياخشى گۈللەندۈرۈپ، جۇڭگو نەزەرىيەسىنى تېخىمۇ ياخشى راۋاجلاندۇرۇپ، جۇڭگو ئىدىيەسىنى تېخىمۇ ياخشى تارقىتىپ، ماركسىزمنى جۇڭگوچىلاشتۇرۇش، دەۋرلەشتۈرۈشنى ئۈزلۈكسىز ئالغا سىلجىتىشىمىز كېرەك. غايە - ئېتىقادنى چىڭىتىپ، مەنىۋى كۈچنى مۇجەسسەملەپ، يېڭى دەۋردە جۇڭگوچە سوتسىيالىزمدا تېخىمۇ ياخشى چىڭ تۇرۇپ ۋە ئۇنى تېخىمۇ ياخشى راۋاجلاندۇرۇپ، جۇڭخۇا مىللىتىنىڭ ئۇلۇغ گۈللىنىشىدىن ئىبارەت جۇڭگو ئارزۇسىنى ئىشقا ئاشۇرۇش ئۈچۈن بىز بۇ بىر ئەۋلاد كىشىلەرنىڭ ئەقىل - پاراسىتى ۋە كۈچىنى قوشۇپ، بىز بۇ بىر ئەۋلاد كىشىلەرگە مەنسۇپ بولغان نەتىجە ۋە شان - شەرەپنى يارىتىشىمىز كېرەك.

　　«گۈللىنىش ئەسەرلەر خەزىنىسى»دە جۇڭخۇا مىللىتىنىڭ ئۇلۇغ گۈللىنىشى باش تېما، ئىدىيە تارىخى ئاساسىي يىپ ئۇچى قىلىنىپ، 1840 - يىلىدىكى ئەپيۈن ئۇرۇشىدىن بۇيانقى جۇڭخۇا مىللىتىنىڭ ئۇلۇغ گۈللىنىشىگە مۇناسىۋەتلىك مۇھىم ھۆججەت - ماتېرىياللار ئىنچىكە تاللىنىپ، جۇڭگو كوممۇنىستلىرى ۋەكىللىكىدىكى جۇڭخۇا مۇنەۋۋەر ئوغۇل - قىزلىرىنىڭ دۆلەتنىڭ قۇدرەت تېپىشى، مىللەتنىڭ گۈللىنىشى، خەلقنىڭ بەختىنى ئىشقا ئاشۇرۇش ئۈچۈن بوشاشماي ئىزدەنگەنلىكى، ئېگىلمەس - سۇنماس روھ بىلەن كۈرەش قىلغانلىقىدەك تارىخىي ئىزنالىرى پۈتۈن كۆرۈنۈشلۈك خاتىرىلىنىپ بايان قىلىندى، جۇڭگونىڭ تەرەققىيات مۇساپىسىگە تەسىر كۆرسەتكەن، دەۋرنى ئىلگىرىلەشكە يېتەكلىگەن، مىللەتنىڭ گۈللىنىشىگە تۈرتكە بولغان ئىدىيە نەتىجىلىرى مەركەزلىك كۆرسىتىپ بېرىلدى، جۇڭخۇا مىللىتىنىڭ ئۇلۇغ گۈللىنىشكە قاراپ مېڭىشىدىكى تارىخ لوگىكىسى، ئىدىيە مەنبەسى ۋە مەدەنىيەت تومۇرى چوڭقۇر ئېچىپ بېرىلدى. «گۈللىنىش ئەسەرلەر خەزىنىسى» جەمئىي بەش قىسىم بولۇپ، ئۇنىڭ 1 -، 2 -، 3 - قىسىملىرى يېقىندا نەشر قىلىنىپ تارقىتىلىدۇ.