شى جىنپىڭ كەسىپ زەنجىرى، تەمىنلەش زەنجىرىنىڭ ئېلاستىكلىقى ۋە مۇقىملىقىغا دائىر خەلقئارا مۇنبەرگە تەبرىك خېتى ئەۋەتتى

　　9 - ئاينىڭ 19 - كۈنى، دۆلەت رەئىسى شى جىنپىڭ كەسىپ زەنجىرى، تەمىنلەش زەنجىرىنىڭ ئېلاستىكلىقى ۋە مۇقىملىقىغا دائىر خەلقئارا مۇنبەرگە تەبرىك خېتى ئەۋەتتى.

　　شى جىنپىڭ مۇنداق كۆرسەتتى: يەرشارىۋى كەسىپ زەنجىرى، تەمىنلەش زەنجىرىنىڭ ئېلاستىكلىقى ۋە مۇقىملىقىنى قوغداش دۇنيانىڭ ئىقتىسادىي تەرەققىياتىغا تۈرتكە بولۇشنىڭ مۇھىم كاپالىتى بولۇپ، دۇنيادىكى ھەرقايسى دۆلەت خەلقلىرىنىڭ ئورتاق مەنپەئىتىگە ئۇيغۇن كېلىدۇ. جۇڭگو قەتئىي تەۋرەنمەي كەسىپ زەنجىرى ۋە تەمىنلەش زەنجىرىنىڭ ئاممىۋى مەھسۇلاتلىق خۇسۇسىيىتىنى قوغداپ، ئۆز دۆلىتىنىڭ كەسىپ زەنجىرى، تەمىنلەش زەنجىرىنىڭ بىخەتەرلىكى، مۇقىملىقىغا كاپالەتلىك قىلىپ، ئەمەلىي ھەرىكىتى ئارقىلىق كەسىپ زەنجىرى، تەمىنلەش زەنجىرى خەلقئارا ھەمكارلىقىنى چوڭقۇرلاشتۇرۇپ، تەرەققىيات نەتىجىلىرىدىن ھەرقايسى دۆلەت خەلقلىرىگە تېخىمۇ ياخشى نەپ يەتكۈزىدۇ.

　　شى جىنپىڭ مۇنداق تەكىتلىدى: جۇڭگو ھەرقايسى دۆلەتلەر بىلەن بىرلىكتە، يېڭى بىر نۆۋەتلىك پەن - تېخنىكا ئىنقىلابى ۋە كەسىپ ئۆزگىرىشى يېڭى پۇرسىتىنى ئىگىلەپ، بىخەتەر، مۇقىم، راۋان، يۇقىرى ئۈنۈملۈك، ئوچۇق، سىغدۇرۇشچان، ئۆزئارا نەپ يەتكۈزۈپ ئورتاق پايدا ئالىدىغان يەرشارىۋى كەسىپ زەنجىرى، تەمىنلەش زەنجىرى سىستېمىسىنى ئورتاق بەرپا قىلىپ، يەر شارىۋى ئىقتىسادنىڭ ئايلىنىشىنى ئىلگىرى سۈرۈش، دۇنيا ئىقتىسادىنىڭ ئېشىشىغا كۈچ قوشۇش، ھەرقايسى دۆلەت خەلقلىرىنىڭ بەخت - سائادىتىنى ئاشۇرۇشقا تۆھپە قوشۇشنى خالايدۇ.

　　كەسىپ زەنجىرى، تەمىنلەش زەنجىرىنىڭ ئېلاستىكلىقى ۋە مۇقىملىقىغا دائىر خەلقئارا مۇنبەر شۇ كۈنى جېجياڭ ئۆلكىسىنىڭ خاڭجوۋ شەھىرىدە ئېچىلدى، مۇنبەرنىڭ باش تېمىسى «جاپا - مۇشەققەتتە ھەمدەم بولۇپ، ۋاقىتلىق قىيىنچىلىقلارنى ئورتاق يېڭىپ، ئېلاستىكلىققا ئىگە يەرشارىۋى كەسىپ زەنجىرى، تەمىنلەش زەنجىرى بەرپا قىلىشقا ئەمەلىي تۈرتكە بولايلى» بولۇپ، سانائەت ۋە ئۇچۇرلاشتۇرۇش مىنىستىرلىقى، دۆلەت تەرەققىيات ۋە ئىسلاھات كومىتېتى، قاتناش - تىرانسپورت مىنىستىرلىقى، گوۋۇيۈەن تەرەققىيات تەتقىقات مەركىزى، جېجياڭ ئۆلكىلىك خەلق ھۆكۈمىتى بىرلىكتە ئۆتكۈزىدۇ.