لى كېچياڭ گوۋۇيۈەن بۇيرۇقى ئىمزالىدى

　　خەلق تورى ئۇيغۇرچە قانىلىنىڭ 27-سېنتەبىر بېيجىڭدىن بەرگەن تېلېگراممىسى:گوۋۇيۈەن زۇڭلىسى لى كېچياڭ يېقىندا گوۋۇيۈەن بۇيرۇقى ئىمزالاپ، «گوۋۇيۈەننىڭ قىسمەن مەمۇرىي نىزاملارنى بىكار قىلىش قارارى»نى ئېلان قىلدى، ئېلان قىلىنغان كۈندىن باشلاپ يولغا قويۇلىدۇ.

　　ئېلىمىزنىڭ نوپۇس ۋە ئىقتىسادىي، ئىجتىمائىي تەرەققىياتىنىڭ يېڭى ۋەزىيىتىگە ماسلىشىپ، تۇغۇت سىياسىتىنى ياخشىلاپ، نوپۇسنىڭ ئۇزاققىچە تەكشى تەرەققىي قىلىشىنى ئىلگىرى سۈرۈش ئۈچۈن، گوۋۇيۈەن 13-نۆۋەتلىك مەملىكەتلىك خەلق قۇرۇلتىيى دائىمىي كومىتېتىنىڭ 30- يىغىنىدا ماقۇللانغان نوپۇس ۋە پىلانلىق تۇغۇت قانۇنىغا تۈزىتىش كىرگۈزۈش توغرىسىدىكى قارارىغا ئاساسەن «پىلانلىق تۇغۇت تېخنىكا مۇلازىمىتىنى باشقۇرۇش نىزامى»، «ئىجتىمائىي تەربىيەلەش تەننەرخى ئېلىش-باشقۇرۇش چارىسى»، «كۆچمە نوپۇس پىلانلىق تۇغۇت خىزمىتى نىزامى»دىن ئىبارەت ئۈچ مەمۇرىي نىزامنى بىكار قىلىشنى قارار قىلدى.

　　نۆۋەتتە پىلانلىق تۇغۇت تېخنىكا مۇلازىمەت ئاپپاراتلىرى ئاساسىي جەھەتتىن بىرلەشتۈرۈلۈپ ئانا-بالىلار ساقلىقىنى ساقلاش مۇلازىمەت سىستېمىسىغا كىرگۈزۈلدى، ئالاقىدار مۇلازىمەت تۈرلىرى دۆلەتنىڭ ئاساسىي ئاممىۋى مۇلازىمىتىگە كىرگۈزۈلدى، «پىلانلىق تۇغۇت تېخنىكا مۇلازىمىتىنى باشقۇرۇش نىزامى»نى ساقلاپ قالمىسىمۇ بولىدۇ.

　　«جۇڭگو كوممۇنىستىك پارتىيەسى مەركىزىي كومىتېتى، گوۋۇيۈەننىڭ تۇغۇت سىياسىتىنى ئەلالاشتۇرۇپ، نوپۇسنىڭ ئۇزاق مەزگىللىك تەڭپۇڭ تەرەققىياتىنى ئىلگىرى سۈرۈش توغرىسىدىكى قارارى»دا ئىجتىمائىي تەربىيەلەش تەننەرخى قاتارلىق چەكلەش تەدبىرلىرىنى ئەمەلدىن قالدۇرۇش ئوتتۇرىغا قويۇلدى، تۈزىتىش كىرگۈزۈلگەندىن كېيىنكى نوپۇس ۋە پىلانلىق تۇغۇت قانۇنىدا ئىجتىمائىي تەربىيەلەش تەننەرخى ئېلىش بەلگىلىمىسى چىقىرىۋېتىلىپ، «ئىجتىمائىي تەربىيەلەش تەننەرخى ئېلىشنى باشقۇرۇش چارىسى» بىكار قىلىندى. ھازىر كۆچمە ئاھالىنىڭ پىلانلىق تۇغۇت ئاساسىي ئاممىۋى مۇلازىمىتىنىڭ باراۋەرلىكى ئىشقا ئاشۇرۇلدى، ئالاقىدار باشقۇرۇش مېخانىزمى ئۈنۈملۈك يۈرۈشۈپ، كۆچمە ئاھالە بىلەن شۇ جاينىڭ نوپۇسىدىكى ئاھالىگە ئوخشاش مۇلازىمەت قىلىش، ئۇلارنى ئوخشاش باشقۇرۇش ئاساسىي جەھەتتىن ئىشقا ئاشۇرۇلدى، «كۆچمە ئاھالىنىڭ پىلانلىق تۇغۇت خىزمىتى نىزامى»نى ساقلاپ قالمىسىمۇ بولىدۇ.

　　كۆرۈپ بېكىتكۈچى: تۇرغۇن ئابلىز

　　مەنبە: خەلق تورى