شى جىنپىڭ 2021-يىللىق دۇنيا ئالاقە تورى يىغىنى ۋۇجېن باشلىقلار يىغىنىغا تەبرىك خېتى ئەۋەتتى

　　9-ئاينىڭ 26-كۈنى، دۆلەت رەئىسى شى جىنپىڭ 2021-يىللىق دۇنيا ئالاقە تورى يىغىنى ۋۇجېن باشلىقلار يىغىنىغا تەبرىك خېتى ئەۋەتتى.

　　شى جىنپىڭ مۇنۇلارنى كۆرسەتتى: رەقەملىك تېخنىكا يېڭى قاراش، يېڭى كەسىپ ھالىتى، يېڭى ئەندىزە بىلەن ئىنسانىيەتنىڭ ئىقتىسادىي، سىياسىي، مەدەنىيەت، جەمئىيەت، ئېكولوگىيە مەدەنىيلىكى قۇرۇلۇشىنىڭ ھەرقايسى ساھەلىرى ۋە پۈتۈن جەريانىغا ئومۇميۈزلۈك سىڭىپ كىرىپ، ئىنسانىيەتنىڭ ئىشلەپچىقىرىش، تۇرمۇشىغا كەڭ كۆلەملىك، شۇنداقلا چوڭقۇر تەسىر ئېلىپ كەلدى. ھازىر، دۇنيانىڭ 100 يىللىق ئۆزگىرىش ۋەزىيىتى بىلەن ئەسىر يۇقۇمى گىرەلەشتى، خەلقئارا جەمئىيەتنىڭ قول تۇتۇشۇپ، ئۇچۇرلاشتۇرۇش، رەقەملەشتۈرۈش، تورلاشتۇرۇش، ئەقلىي ئىقتىدارلاشتۇرۇشنىڭ تەرەققىيات يۈزلىنىشىگە ماسلىشىپ، پۇرسەتنى چىڭ تۇتۇپ، خىرىسقا تاقابىل تۇرۇشى تەخىرسىز ئېھتىياجغا ئايلاندى.

　　شى جىنپىڭ مۇنداق تەكىتلىدى: جۇڭگو دۇنيادىكى ھەرقايسى دۆلەتلەر بىلەن بىرلىكتە، ئىنسانىيەتنى تەرەققىياتقا ئېرىشتۈرۈشتىن ئىبارەت تارىخىي مەسئۇلىيەتنى ئورتاق زىممىگە ئېلىپ، رەقەملىك ئىقتىسادنىڭ ھاياتىي كۈچىنى ئۇرغۇتۇپ، رەقەملىك ھۆكۈمەتنىڭ ئۈنۈم ئىقتىدارىنى كۈچەيتىپ، رەقەملىك جەمئىيەت مۇھىتىنى ئەلالاشتۇرۇپ، رەقەملىك ھەمكارلىق ئەندىزىسى بەرپا قىلىپ، رەقەملىك بىخەتەرلىك توسۇقىنى مۇستەھكەملەپ، رەقەملىك مەدەنىيلىك ئارقىلىق ھەرقايسى دۆلەت خەلقلىرىگە بەخت يارىتىپ، ئىنسانىيەت تەقدىرى ئورتاق گەۋدىسى بەرپا قىلىشقا تۈرتكە بولۇشنى خالايدۇ.

　　2021-يىللىق دۇنيا ئالاقە تورى يىغىنى ۋۇجېن باشلىقلار يىغىنى شۇ كۈنى جېجياڭ ئۆلكىسىنىڭ تۇڭشياڭ شەھىرى ۋۇجېن بازىرىدا باشلاندى، باش تېمىسى «رەقەملىك مەدەنىيلىك يېڭى دەۋرىگە ئاتلىنىش − قول تۇتۇشۇپ تور بوشلۇقى تەقدىر ئورتاق گەۋدىسىنى بەرپا قىلىش» بولۇپ، دۆلەت ئالاقە تورى ئۇچۇر ئىشخانىسى بىلەن جېجياڭ ئۆلكىلىك خەلق ھۆكۈمىتى ئورتاق مەسئۇل بولۇپ ئۆتكۈزدى.

　　مەنبە: خەلق تورى