ترامپ سىنگاپورغا بېرىپ چاۋشيەن-ئامېرىكا رەھبەرلىرى ئۇچرىشىشىغا قاتنىشىدۇ

2018.06.11 15:31   مەنبە: خەلق تورى

　　خەلق تورى ئۇيغۇرچە قانىلىنىڭ 11-ئىيۇن بېيجىڭدىن بەرگەن تېلېگراممىسى: يەتتە دۆلەت گۇرۇھى باشلىقلار يىغىنىدىن مۇددەتتىن بۇرۇن ئايرىلغان ئامېرىكا زۇڭتۇڭى ترامپ 10-ئىيۇن ئايروپىلانغا ئولتۇرۇپ سىنگاپورغا بېرىپ، 12-ئىيۇن ئۆتكۈزۈش پىلانلانغان چاۋشيەن-ئامېرىكا رەھبەرلىرى ئۇچرىشىشىغا قاتنىشىشقا تەييارلىق كۆردى.

　　پىلان بويىچە، ترامپ چاۋشيەن دۆلەت ئىشلىرى كومىتېتىنىڭ باشلىقى كىم جۇڭئۇن بىلەن 12-ئىيۇن سېنتوسا ئارىلىدىكى كاپېللا مېھمانخانىسىدا كۆرۈشىدۇ. بۇ، چاۋشيەن-ئامېرىكا ئىككى دۆلەتنىڭ ۋەزىپە ئۆتەۋاتقان رەھبەرلىرىنىڭ تارىختىكى تۇنجى قېتىملىق ئۇچرىشىشى ھېسابلىنىدۇ. سىنگاپور دىپلوماتىيە مىنىستىرلىقى 10-ئىيۇن ئاخبارات ئېلان قىلىپ، سىنگاپور زۇڭلىسى لى شيەنلۇڭنىڭ 11-ئىيۇن ترامپ بىلەن كۆرۈشىدىغانلىقىنى ئېيتتى. لى شيەنلۇڭ 10-ئىيۇن زۇڭتۇڭ مەھكىمىسىدە بۇنىڭدىن بۇرۇن سىنگاپورغا يېتىپ كەلگەن كىم جۇڭئۇن بىلەن كۆرۈشتى.

　　ترامپ 10-ماي ئىجتىمائىي ئالاقە ۋاسىتىسى تۋىتتېر ئارقىلىق، 12-ئىيۇن كىم جۇڭئۇن بىلەن سىنگاپوردا كۆرۈشىدىغانلىقىنى جاكارلىغان. كېيىن ترامپ يەنە كىم جۇڭئۇنغا خەت ئەۋەتىپ، بۇ قېتىمقى كۆرۈشۈشنى ئەمەلدىن قالدۇرۇشنى قارار قىلغانلىقىنى ئېيتقان. لېكىن ترامپ 1-ئىيۇن يەنە ئۇچرىشىشنىڭ سىنگاپوردا ئۆز قەرەلىدە ئۆتكۈزۈلىدىغانلىقىنى جاكارلىدى.

　　شىنجاڭ گېزىتى تەرجىمىسى

　　مەنبە: خەلق تورى

ئەسكەرتىش: مەنبە خەلق تورى دەپ ئەسكەرتىلگەن مەزمۇنلارنىڭ ھەممىسى خەلق تورىغا تەۋە مەزمۇنلار بولۇپ، كۆچۈرمەكچى بولسىڭىز مەنبەنى ئېنىق ئەسكەرتىڭ

خەلق تورى ئۇيغۇرچە ئۈندىدار سۇپىمىزنى قوشۇۋېلىپ، ئەڭ نوپۇزلۇق خەۋەرلەردىن خەۋەردار بولۇڭ