شى جىنپىڭ 4 - نۆۋەتلىك جۇڭگو - رۇسىيە ئېنېرگىيە سودا ئىشلىرى مۇنبىرىگە تەبرىك خېتى ئەۋەتتى

　　11 - ئاينىڭ 29 - كۈنى، دۆلەت رەئىسى شى جىنپىڭ 4 - نۆۋەتلىك جۇڭگو - رۇسىيە ئېنېرگىيە سودا ئىشلىرى مۇنبىرىگە تەبرىك خېتى ئەۋەتتى.


　　شى جىنپىڭ مۇنداق كۆرسەتتى: جۇڭگو بىلەن رۇسىيەنىڭ ئېنېرگىيە ھەمكارلىقى ئىككى دۆلەتنىڭ ئەمەلىي ھەمكارلىقىنىڭ مۇھىم ئۇل تېشى، شۇنداقلا يەرشارىۋى ئېنېرگىيە خەۋپسىزلىكىنى قوغداشتىكى ئاكتىپ كۈچ. تاشقى خەۋپ - خەتەر، خىرىس ئالدىدا، جۇڭگو - رۇسىيە ئىككى تەرەپ ئالاقىلىشىش، ھەمكارلىشىشنى كۈچەيتىپ، مۇھىم، زور ھەمكارلىق تۈرلىرىنى ئالغا سىلجىتىپ، جۇڭگو - رۇسىيە ئېنېرگىيە ھەمكارلىقىنىڭ كۈچلۈك ئېلاستىكلىقىنى نامايان قىلىپ، جۇڭگو بىلەن رۇسىيەنىڭ يېڭى دەۋردىكى ئومۇميۈزلۈك ئىستراتېگىيەلىك ھەمكارلىق ھەمراھىلىق مۇناسىۋىتىنىڭ كەڭ ئىستىقبالىنى ئىزاھلىدى. جۇڭگو تەرەپ رۇسىيە تەرەپ بىلەن بىرلىكتە، تېخىمۇ قويۇق بولغان ئېنېرگىيە ھەمكارلىق ھەمراھىلىق مۇناسىۋىتى بەرپا قىلىپ، ئېنېرگىيەنىڭ پاكىز، يېشىل تەرەققىياتىنى ئىلگىرى سۈرۈپ، خەلقئارا ئېنېرگىيە بىخەتەرلىكى ۋە كەسىپ زەنجىرى، تەمىنلەش زەنجىرىنىڭ مۇقىملىقىنى ئورتاق قوغداپ، خەلقئارا ئېنېرگىيە بازىرىنىڭ ئۇزاق مۇددەت ساغلام، ئىمكانىيەتلىك سىجىل تەرەققىياتى ئۈچۈن يېڭى تۆھپە قوشۇشنى خالايدۇ.


　　شۇ كۈنى، رۇسىيە زۇڭتۇڭى پۇتىنمۇ 4 - نۆۋەتلىك جۇڭگو - رۇسىيە ئېنېرگىيە سودا ئىشلىرى مۇنبىرىگە تەبرىك خېتى ئەۋەتتى.