شى جىنپىڭ سىرى لانكانىڭ يېڭىدىن ۋەزىپىگە ئولتۇرغان زۇڭتۇڭى ۋىكراماسىنخاغا تەبرىك تېلېگراممىسى ئەۋەتتى

　　7 - ئاينىڭ 22 - كۈنى، دۆلەت رەئىسى شى جىنپىڭ رانېل ۋىكراماسىنخاغا تېلېگرامما ئەۋەتىپ، ئۇنىڭ سىرى لانكا دېموكراتىك سوتسىيالىستىك جۇمھۇرىيىتىنىڭ زۇڭتۇڭلۇقىغا سايلانغانلىقىنى تەبرىكلىدى.

　　شى جىنپىڭ مۇنداق كۆرسەتتى: جۇڭگو بىلەن سىرى لانكا ئەنئەنىۋى دوست قوشنا دۆلەتلەر. دىپلوماتىك مۇناسىۋەت ئورناتقان 65 يىلدىن بۇيان، ئىككى دۆلەت باشتىن - ئاخىر ئۆزئارا ھۆرمەت قىلىش، باراۋەر بولۇش، ئۆزئارا مەنپەئەت يەتكۈزۈش ئاساسىدا ئىككى تەرەپ مۇناسىۋىتىنىڭ تەرەققىياتىنى ئالغا سىلجىتىپ، چوڭ - كىچىك دۆلەتلەر دوستانە ئۆتۈش، ئۆزئارا مەنپەئەت يەتكۈزۈش ھەمكارلىقىنىڭ ئۈلگىسىنى تىكلىدى. يېڭى تىپتىكى تاجسىمان ۋىرۇسلۇق ئۆپكە ياللۇغى يۇقۇمى يۈزبەرگەندىن كېيىن، جۇڭگو بىلەن سىرى لانكا جاپادىمۇ، ھالاۋەتتىمۇ بىللە بولۇپ، ئۆزئارا ھەمدەم بولدى، ئەنئەنىۋى دوستلۇقى يۈكسەلدى.

　　شى جىنپىڭ مۇنداق تەكىتلىدى: ئىشىنىمەنكى، زۇڭتۇڭ ۋىكراماسىنخانىڭ رەھبەرلىكىدە، سىرى لانكا چوقۇم ۋاقىتلىق قىيىنچىلىقنى يېڭىپ، ئىقتىساد، جەمئىيەتنىڭ جانلىنىش مۇساپىسىنى ئالغا سىلجىتالايدۇ. مەن جۇڭگو - سىرى لانكا مۇناسىۋىتىنىڭ تەرەققىياتىغا يۈكسەك ئەھمىيەت بېرىمەن، زۇڭتۇڭ ۋىكراماسىنخا ۋە سىرى لانكا خەلقىنىڭ تىرىشچانلىقىنى ئىمكانىيەتنىڭ بارىچە مەدەت ۋە ياردەم بىلەن تەمىنلەشنى خالايمەن. ئىككى تەرەپنىڭ ئەنئەنىۋى دوستلۇقنى ئەۋج ئالدۇرۇپ، سىياسىي جەھەتتە ئۆزئارا ئىشىنىشنى مۇستەھكەملەپ، ئىككى دۆلەتنىڭ سەمىمىيلىك بىلەن ئۆزئارا ياردەم بېرىش، ئەۋلادمۇئەۋلاد دوستانە ئۆتۈشتەك ئىستراتېگىيەلىك ھەمكارلىق ھەمراھىلىق مۇناسىۋىتىنىڭ ئۈزلۈكسىز ئالغا قاراپ ئىلگىرىلىشىگە تۈرتكە بولۇشىنى ئۈمىد قىلىمەن.