ئامېرىكىنىڭ 2022- مالىيە يىلىدا قورال-ياراغ سېتىش سوممىسى %50كە يېقىن ئاشتى

　　ئۇكرائىنا كىرىزىسى ئامېرىكىنىڭ 2022-مالىيە يىلىدا قورال-ياراغ سېتىش سوممىسىنىڭ تېز ئېشىشىغا تۈرتكە بولدى.

　　ئامېرىكا گوۋۇيۈەنى يېقىندا ئېلان قىلغان سانلىق مەلۇماتتا كۆرسىتىلىشىچە، 2022- مالىيە يىلىدا (2021- يىل 10- ئاينىڭ 1- كۈنىدىن 2022- يىل 9- ئاينىڭ 30- كۈنىگىچە) ئامېرىكىنىڭ باشقا دۆلەت ۋە رايونلارغا قورال-ياراغ سېتىش سوممىسى ئالدىنقى مالىيە يىلىدىكىگە قارىغاندا %50 كە يېقىن ئاشقان، بۇنىڭدىكى مۇھىم سەۋەب ئۇكرائىنا كىرىزىسىنىڭ كەسكىنلىشىشى ئىكەن.

　　ئامېرىكا گوۋۇيۈەنى 25-چېسلا ئېلان قىلغان سانلىق مەلۇماتقاقارىغاندا، 2022-مالىيە يىلىدا گوۋۇيۈەن ھوقۇق بەرگەن ئامېرىكا ھۆكۈمىتىنىڭ چەت ئەلگە قورال-ياراغ سېتىش ئومۇمىي سوممىسى 51 مىليارد 900 مىليون دوللارغا يېتىپ، ئالدىنقى مالىيە يىلىدىكى 34 مىليارد 800 مىليون دوللاردىن %49.1 ئاشقان.

　　سانلىق مەلۇماتلاردا كۆرسىتىلىشچە، 2022- مالىيە يىلىدا ئامېرىكا دۆلەت مۇداپىئەسىنى ھۆددىگە ئالغۇچى سودىگەرلەرنىڭ باشقا دۆلەت ۋە رايونلارغا بىۋاسىتە ساتقان قورال-ياراغ ۋە ھەربىي ئەسلىھەلىرىگە ھوقۇق بېرىش ئومۇمىي قىممىتى تەخمىنەن 153 مىليارد 700 مىليون دوللار بولۇپ، ئالدىنقى مالىيە يىلىدىكى 103 مىليارد 400 مىليون دوللاردىن %48.6 ئۆرلىگەن. 2022-مالىيە يىلىنىڭ ئاخىرىغىچە، گوۋۇيۈەن قارىمىقىدىكى دۆلەت مۇداپىئە سودىسىنى باشقۇرۇش ئىدارىسىدە تىزىمغا ئالدۇرغان دۆلەت مۇداپىئەسى سودا پائالىيىتى بىلەن شۇغۇللىنىدىغان ئەمەلىي گەۋدىلەرنىڭ ئومۇمىي سانى 14 مىڭ 445 كە يېتىپ، ئالدىنقى مالىيە يىلىدىكىگە قارىغاندا سەل كۆپەيگەن. ئامېرىكا گوۋۇيۈەنى بىۋاسىتە سودىدىكى ھەربىي قورال ياراغ سېتىش سوممىسىنىڭ تېز كۆپىيىشىنى ئاساسلىقى رۇسىيە-ئۇكرائىنا توقۇنۇشىدا ئامېرىكىنىڭ ئۇكرائىنانى قوللىغانلىقىدىن، دەپ قارىدى ھەمدە قورال-ياراغ ئۆتۈنۈپ بېرىش ۋە دۆلەت مۇداپىئە سودىسىنى ئامېرىكا دىپلوماتىيە سىياسىتىنىڭ مۇھىم قوراللىرى دەپ جار سالدى.

　　ئامېرىكا دۆلەت مۇداپىئە مىنىستىرلىقى 25-چېسلا يېڭىلىغان ئۇكرائىناغا ھەربىي ياردەم بېرىش تىزىملىكىدە كۆرسىتىلىشىچە، بۇلتۇر 2- ئايدىن ھازىرغىچە، ئامېرىكىنىڭ ئۇكرائىناغابەرگەن ھەربىي ياردىمىنىڭ ئومۇمىي سوممىسى 27 مىليارد 100 مىليون دوللاردىن ئېشىپ كەتكەن.

　　كۆرۈپ بېكىتكۈچى: تۇرغۇن ئابلىز

　　مەنبە: خەلق تورى