جۇڭگو - ماۋرىتىئۇس دىپلوماتىك مۇناسىۋەت ئورناتقانلىقىنىڭ 50 يىللىقى مۇناسىۋىتى بىلەن​

　　دۆلەت رەئىسى شى جىنپىڭ 4 - ئاينىڭ 15 - كۈنى ماۋرىتىئۇس زۇڭتۇڭى روپۇن بىلەن ئۆزئارا تەبرىك تېلېگراممىسى ئەۋەتىپ، ئىككى دۆلەت دىپلوماتىك مۇناسىۋەت ئورناتقانلىقىنىڭ 50 يىللىقىنى تەبرىكلىدى.

　　شى جىنپىڭ مۇنداق كۆرسەتتى: دىپلوماتىك مۇناسىۋەت ئورناتقان يېرىم ئەسىردىن بۇيان، جۇڭگو - ماۋرىتىئۇس مۇناسىۋىتى ساغلام، مۇقىم تەرەققىي قىلدى، ئەنئەنىۋى دوستلۇقى ئۇزاق تارىخىي جەرياندا مۇستەھكەملەندى، ھەرقايسى ساھەلەردىكى ھەمكارلىقى كۈنسېرى چوڭقۇرلاشتى. يېڭى تىپتىكى تاجسىمان ۋىرۇسلۇق ئۆپكە ياللۇغى يۇقۇمى ئالدىدا، ئىككى دۆلەت خەلقلىرى ئۆزئارا ھەمدەم بولۇپ، ۋاقىتلىق قىيىنچىلىقنى ئورتاق يېڭىپ، ئېغىر كۈنلەردە بىللە بولۇشتەك چوڭقۇر دوستلۇقىنى نامايان قىلدى.

　　شى جىنپىڭ مۇنداق تەكىتلىدى: مەن جۇڭگو - ماۋرىتىئۇس مۇناسىۋىتىنىڭ تەرەققىياتىغا يۈكسەك ئەھمىيەت بېرىمەن، زۇڭتۇڭ روپۇن بىلەن بىرلىكتە تىرىشىپ، ئىككى دۆلەت دىپلوماتىك مۇناسىۋەت ئورناتقانلىقىنىڭ 50 يىللىقىنى پۇرسەت بىلىپ، ئەنئەنىۋى دوستلۇقنى ئىلگىرى سۈرۈپ، ئۆزئارا مەنپەئەت يەتكۈزۈش ھەمكارلىقىنى كېڭەيتىپ، ئورتاق تەرەققىياتنى ئىلگىرى سۈرۈپ، ئىككى دۆلەت ۋە ئىككى دۆلەت خەلقلىرىگە بەخت يارىتىشنى خالايمەن.

　　روپۇن تەبرىك تېلېگراممىسىدا مۇنداق بىلدۈردى: 50 يىلدىن بۇيان، ماۋرىتىئۇس - جۇڭگو ئىككى دۆلەت چوڭقۇر دوستلۇق ئورناتتى، ھەرقايسى ساھەلەردىكى ئالماشتۇرۇشى، ھەمكارلىقى ئومۇميۈزلۈك راۋاجلاندى. ئەركىن سودا كېلىشىمىنىڭ كۈچكە ئىگە بولۇپ يولغا قويۇلۇشى ئىككى دۆلەتنىڭ قويۇق مۇناسىۋىتىنى يەنىمۇ كۈچەيتتى. مەن ئىككى تەرەپنىڭ دىپلوماتىك مۇناسىۋەت ئورناتقانلىقىنىڭ 50 يىللىقىنى پۇرسەت بىلىپ، ئىزدىنىپ، يېڭىلىق يارىتىپ، ھەمكارلىقنى مۇستەھكەملەپ ۋە كېڭەيتىپ، دوستلۇق، ئۆزئارا ئىشىنىشنى چوڭقۇرلاشتۇرۇشىنى ئۈمىد قىلىمەن.

　　مەنبە: خەلق تورى