ئۇدا نەچچە كۈن، مەملىكەتلىك خەلق قۇرۇلتىيىنىڭ ۋەكىلى، خېبېي ئۆلكىسى زەنخۇاڭ ناھىيەسى يۈەنسۈن يەرلىك رەخت كەسپىي ھەمكارلىق كوپىراتىپىنىڭ كېڭەش باشلىقى سۈي شۆچىن يولدا پايپېتەك بولۇپ: شىجياجۇاڭ گاۋچېڭ رايونى، لۇچۈەن رايونى، زەنخۇاڭ ناھىيەسى ئارىلىقىدا قاتراپ، توقۇمىچىلىق، يېمەك - ئىچمەك، ئۆلچەملىك زاپچاس قاتارلىق ئونغا يېقىن كارخانىغا بېرىپ تەكشۈرۈپ تەتقىق قىلدى. سۈي شۆچىن مۇنداق دېدى: كۆپرەك مېڭىپ، كۆپرەك سوراپ، كۆپرەك چۈشەنگەندىلا، ئاندىن خەلق رايىنى ھەقىقىي ئەكس ئەتتۈرگىلى بولىدۇ، ئوتتۇرا، كىچىك كارخانىلارنىڭ يۇقىرى سۈپەتلىك تەرەققىياتىغا قانداق ياردەم بېرىش، بۇ مەن ئىزچىل كۆڭۈل بۆلۈۋاتقان تېما.
«بىلىم مۈلۈك ھوقۇقى كارخانىنىڭ مۇھىم مۈلكى، بىلىم مۈلۈك ھوقۇقىنى ياخشى قوغدىغاندىلا، ئاندىن كارخانىنىڭ يېڭىلىق يارىتىش ئىقتىدارىنى سىجىل ئۇرغۇتۇپ، كارخانىنىڭ يۇقىرى سۈپەتلىك تەرەققىياتىغا تۈرتكە بولغىلى بولىدۇ.»، ئىقتىسادىي، ئىجتىمائىي تەرەققىياتقا ئەگىشىپ، كارخانىلارنىڭ بىلىم مۈلۈك ھوقۇقىنى قوغداش ئېھتىياجى ئاشتى، ئېلىمىزنىڭ بىلىم مۈلۈك ھوقۇقىنى قوغداش سالمىقىمۇ ئۈزلۈكسىز ئاشتى. سۈي شۆچىن مۇنداق دېدى: «كونكرېت مەشغۇلات قاتلىمىدا، ئوتتۇرا، كىچىك كارخانىلاردا يەنىلا مەسىلە ۋە گاڭگىراش مەۋجۇت.»
«ھەم قىلچە يۇمشاق قوللۇق قىلماي، ھوقۇققا چېقىلغان مەھسۇلاتنى ئىشلەپچىقارغۇچىلارغا قەتئىي زەربە بېرىش، ھەم قېلىپلاشمىغان ھوقۇققا چېقىلىش دەۋا ھەرىكەتلىرىنىڭ ئوتتۇرا، كىچىك كارخانىلارغا تەسىر يەتكۈزۈشىدىن ھوشيار بولۇش كېرەك.»، سۈي شۆچىن نۇرغۇن كارخانىلارغا چوڭقۇر چۆكۈپ تەكشۈرۈپ تەتقىق قىلىپ، ئالاقىدار سىياسەت ۋە قانۇن - نىزاملارنى ئەستايىدىل ئۆگەندى ۋە تەتقىق قىلدى، بۇلتۇر مەملىكەتلىك «ئىككى يىغىن»دا، بىلىم مۈلۈك ھوقۇقى سودىسىدىكى ھوقۇقنى قوغداش ھەرىكىتىنى قېلىپلاشتۇرۇش توغرىسىدا تەكلىپ بەردى.
«كارخانىلارنىڭ تاۋار ماركىسى، پاتېنت قاتارلىقلارنى ئۆز ئالدىغا ئىلتىماس قىلىشىغا يېتەكچىلىك قىلىش، باھالاشنى يەنىمۇ كۈچەيتىش»، «بىلىم مۈلۈك ھوقۇقىنى قوغداش بازىرىنى قېلىپلاشتۇرۇپ، ئوتتۇرا، كىچىك كارخانىلارنىڭ بىلىم مۈلۈك ھوقۇقىنى قوغداشقا ياردەم بېرىش يوللىرىنى كېڭەيتىش، مۇكەممەللەشتۈرۈش». . . ، ئوتتۇرا، كىچىك كارخانىلارنىڭ بىلىم مۈلۈك ھوقۇقىنى قوغداش تېمىسىغا قارىتا، نۇرغۇن بىرىنچى قول تەكشۈرۈپ تەتقىق قىلىش ماتېرىيالىغا تايىنىپ، سۈي شۆچىن بۇ يىل كۆڭۈل بۆلىدىغان مۇھىم نۇقتا بولسا قانداق قىلىپ ئوتتۇرا، كىچىك كارخانىلارنىڭ بىلىم مۈلۈك ھوقۇقىنى قوغداش ئىقتىدارىنى يەنىمۇ ئۆستۈرۈش. سۈي شۆچىن مۇنۇلارنى بىلدۈردى: بۇ يىلقى مەملىكەتلىك ئىككى يىغىندا، ئوتتۇرا، كىچىك كارخانىلارنىڭ ئەمەلىي ئېھتىياجىغا داۋاملىق دىققەت قىلىپ چارە - تەدبىر كۆرسىتىپ، ئوتتۇرا، كىچىك كارخانىلارنىڭ يۇقىرى سۈپەتلىك تەرەققىياتىنى ئىشقا ئاشۇرۇشىغا كۈچ قوشىمەن.
مۇخبىر خاتىرىسى
پۈتۈن ۋۇجۇدى بىلەن خەلقنىڭ ساداسىنى ئاڭلاش
كارخانىنىڭ كۈندىلىك خىزمەتلىرى، تەرەپ - تەرەپكە قاتراپ تەكشۈرۈپ تەتقىق قىلىش... ئۇدا نەچچە كۈن سۈي شۆچىن يېرىم كېچىگىچە ئالدىراش ئىشلىدى. گەرچە سەل چارچاپ قالغان بولسىمۇ، لېكىن ئوتتۇرا، كىچىك كارخانىلارنىڭ تەرەققىياتى ئۈستىدە توختالغاندا، ئۇ يەنە توختىماي سۆزلەشكە باشلىدى.
يېزا - كەنتلەردە يىلتىز تارتقان ئوتتۇرا، كىچىك كارخانىچىلار ۋەكىلى بولۇش سۈپىتى بىلەن، سۈي شۆچىن مۇنداق قارىدى: ئوتتۇرا، كىچىك كارخانىلارنىڭ يۇقىرى سۈپەتلىك تەرەققىياتى يېزا - كەنتلەرنى ئومۇميۈزلۈك گۈللەندۈرۈشنى ئالغا سىلجىتىش، ناھىيە ئىقتىسادىنى زورايتىشتا مۇھىم رول ئوينايدۇ. ئوتتۇرا، كىچىك كارخانىلارنىڭ بىلىم مۈلۈك ھوقۇقىنى قوغداش ئۇلارنىڭ سىجىل يېڭىلىق يارىتىپ تەرەققىي قىلىش ئىقتىدارىنى قوغدىغانلىق. ئاساسىي قاتلامغا چوڭقۇر چۆكۈپ تەكشۈرۈپ تەتقىق قىلىش، ئالاقىدار سىياسەتلەرنى قايتا - قايتا تەتقىق قىلىش... تېخىمۇ كۆپ ئوتتۇرا، كىچىك كارخانىلارنىڭ تېخىمۇ ياخشى تەرەققىياتنى ئىشقا ئاشۇرۇشى ئۈچۈن، سۈي شۆچىن ئەسلىي مەقسەتتە چىڭ تۇرۇپ، ۋەزىپە - مەسئۇلىيىتىنى تولۇق ئادا قىلدى.
«خەلق مېنى ۋەكىل قىلىپ سايلىدى، مەن خەلق ئۈچۈن ياخشى ۋەكىل بولىمەن.» سۈي شۆچىن مەسئۇلىيىتىنى ئادا قىلىش يولىدا پۇختا ھەم مۇستەھكەم ماڭدى.
مەنبە: خەلق تورى
ئەسكەرتىش: مەنبە خەلق تورى دەپ ئەسكەرتىلگەن مەزمۇنلارنىڭ ھەممىسى خەلق تورىغا تەۋە مەزمۇنلار بولۇپ، كۆچۈرمەكچى بولسىڭىز مەنبەنى ئېنىق ئەسكەرتىڭ
