مەملىكەتلىك سىياسىي كېڭەشنىڭ ئەزاسى، خاڭجوۋ ئوپېرا - ئۇسسۇل تىياتىرخانىسىنىڭ باشلىقى سۈي ۋېي مەدەنىيەت مىراسلىرىنى قوغداش ۋە ئۇنىڭغا ۋارىسلىق قىلىشقا ئىزچىل كۆڭۈل بۆلۈپ كەلدى. «مەن جېجياڭ خاڭجوۋدا خىزمەت قىلىمەن، تۇرمۇش كەچۈرىمەن. بۇ يەردە شىخۇ كۆلى مەدەنىيەت مەنزىرىسى، جۇڭگو چوڭ قانىلى (خاڭجوۋ بۆلىكى)، لياڭجۇ قەدىمىي شەھەر خارابىسى قاتارلىق دۇنيا مەدەنىيەت مىراسلىرى بار. مەدەنىيەت مىراسلىرىنى قوغداش ۋارىسلىق قىلىش خىزمىتىنى ياخشى ئىشلەش ئىنتايىن مۇھىم.» دېدى سۈي ۋېي.
سۈي ۋېي ھەمىشە ئامال قىلىپ مەدەنىيەت مىراسلىرىنى قوغداش ئۈچۈن پوزىتسىيەسىنى بىلدۈرىدۇ. بۇلتۇر يىل ئاخىرىدىكى بىر قېتىملىق مۇنبەردە، سۈي ۋېي سۆز قىلىپ مۇنداق دېدى: «شەھەر - يېزا قۇرۇلۇشىدا تارىخىي مەدەنىيەتنى قوغداش ۋە ئۇنىڭغا ۋارىسلىق قىلىشنى كۈچەيتىش ھەر ساھە، ھەر كەسىپنىڭ ئورتاق مەسئۇلىيىتى. كۆپچىلىك گەرچە ئوخشاش بولمىغان خىزمەت بىلەن شۇغۇللانغان بولسىمۇ، لېكىن مەدەنىيەت مىراسلىرىنى قوغداش ئۈچۈن تۆھپە قوشالايدۇ.» يىغىندىن كېيىن، يىغىنغا قاتناشقان نۇرغۇن خادىملار ئۇنىڭ بىلەن يەنىمۇ ئىلگىرىلىگەن ھالدا مۇزاكىرىلەشتى، بۇ سۈي ۋېينى ئىنتايىن خۇشال قىلدى.
يېقىنقى يىللاردىن بۇيان، سۈي ۋېي ئۆمەك باشلاپ شىخۇ كۆلى بويىدا ئەدەبىيات - سەنئەت ئويۇنى قاتارلىقلارنى ئۆتكۈزۈپ، كىشىلەرنىڭ دىققىتىنى قوزغىدى. ھازىر ئۇ يەنە يېڭى ئەسەر (شىخۇ كۆلى بىلەن ئۇچرىشىش)گە تەييارلىق قىلىۋاتىدۇ، شىخۇ كۆلىنى تېخىمۇ كۆپ كىشىنىڭ چۈشىنىشىنى ئۈمىد قىلىمەن.
شۇنىڭ بىلەن بىللە، سۈي ۋېيمۇ شاڭشەن مەدەنىيەت خارابىسىنى ئىلتىماس قىلىش خىزمىتىنى پائال ئىلگىرى سۈردى. شۇڭا، ئۇ دائىم شاڭشەن مەدەنىيەت خارابىسى جايلاشقان جىنخۇا شەھىرىگە قاتراپ، ھەر قېتىم بارغاندا يېڭى نەتىجىگە ئېرىشىدۇ. 2024- يىللىق مەملىكەتلىك ئىككى يىغىنغا قاتنىشىشتىن بۇرۇن، ئۇ يەنە مەخسۇس جىنخۇاغا بېرىپ زىيارەت قىلىپ، تەكشۈرۈپ تەتقىق قىلىپ، تەكلىپنى يەنىمۇ مۇكەممەللەشتۈردى ھەم باشقا ئەزالار بىلەن پائال پىكىر ئالماشتۇردى. «پەقەت كەڭ دائىرىدە پىكىر ئالماشتۇرۇپ ئۆگەنگەندىلا، ئاندىن ئۆزىنىڭ شاڭشەن مەدەنىيىتىگە بولغان تونۇشىنى تەدرىجىي بېيىتىپ، تېخىمۇ ياخشى قوغداپ ۋارىسلىق قىلغىلى بولىدۇ.» دېدى سۈي ۋېي.
ھەر قېتىم مەدەنىيەت مىراسلىرىنى تەكشۈرۈپ تەتقىق قىلغاندا، سۈي ۋېي ئېكسكۇرسىيەگە كەلگەن ساياھەتچىلەر بىلەن پىكىر ئالماشتۇرۇپ، قايتىپ بارغاندىن كېيىن ئەترەت ئەزالىرى بىلەن يىغىن ئېچىپ مۇزاكىرە قىلىدۇ.
سۈي ۋېينىڭ قارىشىچە، مەدەنىيەت مىراسلىرىنى قوغداش مەدەنىيەت يادىكارلىقلىرى خىزمەتچىلىرىنىڭلا ئىشى ئەمەس، ھەربىر ئادەم ئۆزىنى چىقىش قىلىپ، مەدەنىيەت مىراسلىرىغا ۋارىسلىق قىلىش ۋە ئۇنى تەرەققىي قىلدۇرۇشقا ياردەم بەرسە بولىدىكەن. «پەقەت مەدەنىيەت مىراسلىرىغا يېقىنلىشىپ، ئۇنى چۈشەنگەندىلا ، ئاندىن ئۇنى قانداق قوغداش، تەرەققىي قىلدۇرۇشنى بىلگىلى بولىدۇ.» دېدى سۈي ۋېي.
مۇخبىر خاتىرىسى
ئارتۇقچىلىقىمىزنى جارى قىلدۇرۇپ، مەسئۇلىيەتنى زىممىمىزگە ئالايلى
«مەدەنىيەت مىراسلىرىنى ئېچىش ۋە ئۇنىڭدىن پايدىلىنىش بىلەنلا قالماي، يەنە قوغداش ۋە ئۇنىڭغا ۋارىسلىق قىلىش كېرەك. مەدەنىيەت مىراسلىرىنى قوغداش ۋە ئۇنىڭغا ۋارىسلىق قىلىشتا ھەممە ئادەم ئۆز رولىنى جارى قىلدۇرالايدۇ.» زىيارەت داۋامىدا، سۈي ۋېينىڭ سۆزى كىشىگە چوڭقۇر تەسىر قالدۇردى.
سۈي ۋېي ئەدەبىيات - سەنئەت خىزمەتچىسى بولۇش سۈپىتى بىلەن ئارتۇقچىلىقىنى جارى قىلدۇرۇپ، جەمئىيەتكە مەدەنىيەت مىراسلىرىنىڭ قىممىتىنى ئۈزلۈكسىز تارقاتتى. سۈي ۋېي مۇنداق دېدى: «دەۋر بىلەن تەڭ ئىلگىرىلەپ، تېگىشلىك مەدەنىيەت مەسئۇلىيىتىنى زىممىمىزگە ئېلىشىمىز كېرەك.»
مەنبە: خەلق تورى
ئەسكەرتىش: مەنبە خەلق تورى دەپ ئەسكەرتىلگەن مەزمۇنلارنىڭ ھەممىسى خەلق تورىغا تەۋە مەزمۇنلار بولۇپ، كۆچۈرمەكچى بولسىڭىز مەنبەنى ئېنىق ئەسكەرتىڭ
