ئەخمەتجان تۇرسۇننىڭ پۇتبول ئىشقى

2015.05.22 17:22   مەنبە: خەلق تورى

　　خەلق تورى ئۇيغۇرچە قانىلىنىڭ 22-ماي بېيجىڭدىن بەرگەن تېلېگراممىسى: (شىنجاڭ ئىقتىساد گېزىتى مۇخبىرى دىلشاد غوجائەھمەد فوتوسى، خەۋىرى)

　　ـــ مەن پۇتبولغا بەك ئامراق، بۇرۇندىن بىر يۈرۈش پۇتبول ئوينىغاندا كىيىدىغان كىيىمىمنىڭ بولۇشىنى بەكمۇ ئارزۇ قىلاتتىم، بۈگۈن ئارزۇيۇم ئەمەلگە ئاشتى، بۇ كىيىم بەك چىرايلىق ئىكەن، بۇ كىيىمنى بىزگە سوۋغا قىلغان ئەخمەتجان ئاكامغا كۆپ رەھمەت ئېيتىمەن،- دېدى ناھىيەلىك 1 – باشلانغۇچ مەكتەپ ئوقۇغۇچىسى ئابدۇلئەزىز قېيۇم 22 – ماي پەيزىۋات ناھىيەسىدە ئۆتكۈزۈلگەن 2015 – يىللىق ئوتتۇرا – باشلانغۇچ مەكتەپ ئوقۇغۇچىلار پۇتبول مۇسابىقىسىدە ماڭا.

　　پەيزىۋات «قىزىل يۇلغۇن» دېھقانچىلىق مەھسۇلاتلىرىنى پىششىقلاپ ئىشلەش، سېتىش ھەمكارلىق كوپىراتىپىنىڭ باش دېرىكتورى ئەخمەتجان تۇرسۇن ۋە ئۇنىڭ ھەمراھلىرى 22 – ماي چۈشتە 600 مىڭ يۈەنلىك 12 مىڭ يۈرۈش تەنھەرىكەت كىيىمىنى شۇ كۈنى ناھىيەلىك قوشتىل باشلانغۇچ مەكتىبىدە ئۆتكۈزىلىۋاتقان پەيزىۋات ناھىيەسى 2015 – يىللىق ئوتتۇرا – باشلانغۇچ مەكتەپ ئوقۇغۇچىلار پۇتبول مۇسابىقىسىنىڭ ئېچىلىش مۇراسىمىدا ناھىيەلىك قوشتىل باشلانغۇچ مەكتىبى، غولتوغراق يېزىلىق مەركىزىي باشلانغۇچ مەكتىپى، ناھىيەلىك 1 – باشلانغۇچ مەكتەپ ئوقۇغۇچىلىرىغا نەق مەيداندا ھەدىيە قىلدى.

　　ـــ مەن پەيزىۋاتنىڭ غولتوغراق يېزىسى ئاقئۆستەك كەنتىدە تۇغۇلۇپ چوڭ بولغان، كىچىكىمدە ئائىلە شارائىتىمنىڭ ناچارلىقىدىن مەكتەپنى تۈزۈك ئوقۇيالمىغانتىم، كىچىكىمدىن پۇتبولغا ئامراقتىم، داڭلىق چولپانلارغا ئوخشاش پۇتبولچى بولۇشنى ئارزۇ قىلغان، لېكىن ئاخىرىدا بىر تىجارەتچى بولۇپ قالدىم، يېقىنقى يىللاردىن بۇيان سىياسەتنىڭ ياخشىلىقىدىن ئوقىتىپ راۋاج تېپىپ كۈنۈم ياخشى بولدى، كونىلاردا « سۇ ئىچكەندە قۇدۇق قازغۇچىنى ئۇنۇتما» دەيدىغان گەپ باركەن، پۇل تاپقىنىمدا مەن بىر ياخشى ئىش قىلىپ يۇرتۇمدىكىلەرگە رەھىتىمنى بىلدۈرەي دىگەن ئۈمىددىدىم، «1 – ئىيۇن» خەلقئارا بالىلار بايرىمى ھارپىسىدا بۇ ئارزۇيۇم ئەمەلگە ئاشتى، پەيزىۋات ناھىيەمىزدىكى 12 مىڭ ئوقۇغۇچىنىڭمۇ ئارزۇسى دەل مېنىڭ ئارزۇيۇم. مېنىڭ پۇتبولغا بولغان ئىشتىياقىم كەلگۈسىدە تېخىمۇ زور ئىشلارنى قىلىشقا، پۇتبول كۇلۇبلىرىنى قۇرۇپ، ۋەتەن، يۇرتىمىزنىڭ پۇتبول ئىشلىرى تەرەققىياتىغا ھەسسە قوشۇشقا ئۈندەيدۇ،- دېدى ئەخمەتجان تۇرسۇن ماڭا.

　　مەنبە: خەلق تورى

ئەسكەرتىش: مەنبە خەلق تورى دەپ ئەسكەرتىلگەن مەزمۇنلارنىڭ ھەممىسى خەلق تورىغا تەۋە مەزمۇنلار بولۇپ، كۆچۈرمەكچى بولسىڭىز مەنبەنى ئېنىق ئەسكەرتىڭ

خەلق تورى ئۇيغۇرچە ئۈندىدار سۇپىمىزنى قوشۇۋېلىپ، ئەڭ نوپۇزلۇق خەۋەرلەردىن خەۋەردار بولۇڭ