ئالغا ئىلگىرىلەۋاتقان جۇڭگو｜كىچىك كەنت مەدەنىيەت-ساياھەت يېڭى سەھراسىغا ئايلاندى

خەلق تورى مۇخبىرى شۈ چېڭلۇڭ

7-ئايدىكى بېيشىڭ كەنتى. خەلق تورى مۇخبىرى شۈ چېڭلۇڭ فوتوسى

ئاپتوموبىل خېيلۇڭجياڭنىڭ بېيشىڭ كەنتىگە ئاستا-ئاستا كىرگەندە، پاكىز، رەتلىك كەنت قىياپىتى كۆزىمىزگە چېلىقتى: تەكشى يوللار بىلەن ھەر خىل مەدەنىيەت-ساياھەت ئەسلىھەلىرى ياپيېشىل دەل-دەرەخلەر ۋە گۈللەر ئارىسىغا گىرەلىشىپ جايلاشقان بولۇپ، ساپ سەھرا مەنزىرىسى بىلەن زامانىۋى يېزا-كەنت قىياپىتى يۇغۇرۇلغان، ئولتۇراقلىشىشقا ماس كېلىدىغان ئىناق، گۈزەل يېزا-كەنت يۆگىمە رەسىمى ئاستا-ئاستا يېيىلدى.

بېيشىڭ كەنتىنىڭ تيېلى شەھەر رايونى بىلەن بولغان ئارىلىقى 18 كىلومېتىر، ئىگىلىگەن يەر كۆلىمى 26.73 كىۋادرات كىلومېتىر بولۇپ، 16 مىڭ 800 مو تېرىلغۇ يەرگە ئىگە. بۇ بىر نەچچە يىلدا، بېيشىڭ كەنتى ئىلگىرى-كېيىن بولۇپ جۇڭگودىكى گۈزەل ئىستىراھەت كەنتى، مەملىكەت بويىچە يېزا-كەنت ساياھەتچىلىكىدىكى نۇقتىلىق كەنت، مەملىكەتلىك «ئىناق، گۈزەل يېزا-كەنت» بويىچە 100 ياخشى ئۈلگىلىك يېزا-كەنت، مەملىكەت بويىچە يېزا-كەنتلەرنى تۈزەشتىكى ئۈلگىلىك كەنت قاتارلىق كۆپ تۈرلۈك شەرەپلەرگە ئېرىشتى.

بېيشىڭ كەنتىدىكى شاللىق. خەلق تورى مۇخبىرى شۈ چېڭلۇڭ فوتوسى

دائىمىي تۇرۇشلۇق نوپۇسى تەخمىنەن 300 كىشى بولغان بۇ كەنت بىرنەچچە يىللىق تەرەققىيات ئارقىلىق، 2025-يىلى كەنت دەرىجىلىك كوللېكتىپ ئىقتىسادىي كىرىمىنى 1 مىليون 351 مىڭ 700 يۈەنگە يەتكۈزۈپ، يىراق-يېقىنغا داڭلىق يېزا-كەنتلەرنى گۈللەندۈرۈشتىكى ئۈلگىلىك كەنتكە ئايلاندى.

بۈگۈنكى كۈندە بېيشىڭ كەنتى ھاياتىي كۈچكە تولدى، ئەمما نەچچە ئون يىل ئىلگىرىكى ۋاقىتقا نەزەر سالساق، بۇ جاي باشقىچە بىر قىياپەتتە ئىدى.

1991-يىلىدىن 2024-يىلىغىچە، بېيشىڭ كەنتىدە ئۆزگىرىشنىڭ قانچىلىك چوڭلۇقىدا، بۇ يەردە 34 يىل ۋەزىپە ئۆتىگەن بېيشىڭ كەنتى پارتىيە ياچېيكىسىنىڭ شۇجىسى سۈي شۇشېڭنىڭ ئەڭ سۆز قىلىش ھوقۇقى بار. «80-، 90-يىللاردا كەنتىمىز ئىنتايىن قىيىنچىلىقتا ئۆتەتتى، ئۆيلەرنىڭ ھەممىسى لاي كەپە ئۆيلەر ئىدى، يوللار پاتقاقلىشىپ يول يۈرۈش تەس ئىدى، ئاپتوموبىل ھەيدەش ئۇياقتا تۇرسۇن، ۋېلىسىپىت مىنىشمۇ ناھايىتى تەس ئىدى.»

بېيشىڭ كەنتىدىكى يول كۆرسىتىش تاختىسى. خەلق تورى مۇخبىرى شۈ چېڭلۇڭ فوتوسى

بېيشىڭ كەنتىدىكى «قوشنا ھويلا» ئائىلىۋى مېھمانخانىسى. خەلق تورى مۇخبىرى شۈ چېڭلۇڭ فوتوسى

سۈي شۇشېڭ بېيشىڭ كەنتىنىڭ كېپىنەكسىمان ئۆزگىرىپ قايتا ھاياتلىققا ئېرىشكەنلىكىگە گۇۋاھ بولدى ھەم قاتناشتى. ئۇ تونۇشتۇرۇپ مۇنداق دېدى: «كېيىن، دېھقانلارغا نەپ يەتكۈزۈش، خەلقنى بېيىتىش سىياسىتى سىجىل ئەمەلىيلەشتى، كەنت كادىرلىرىمىز باشلامچىلىق بىلەن تەرەققىيات يولى ئۈستىدە ئىزدىنىپ، پۈتۈن ۋۇجۇدى بىلەن كەنتنى گۈزەللەشتۈرۈش، كەنت ئاھالىلىرىنى بېيىتىش ئۈستىدە باش قاتۇردى.» 1998-يىلىدىن باشلاپ، بېيشىڭ كەنتى باشلامچىلىق بىلەن مەدەنىي كەنت قۇرۇلۇشى خىزمىتىنى باشلىدى، «يول، دەرەخ، تەرتىپ»تىن ئىبارەت تەرەققىيات پىكىر يولىنى كۈچەيتىپ، كەنت يوللىرىنى كېڭەيتىپ رېمونت قىلىپ، يول بويىدا يېشىللىق بەرپا قىلىپ كەنت قىياپىتىنى گۈزەللەشتۈرۈپ، يېزا-كەنتلەرنى ئىدارە قىلىش تەرتىپىنى قېلىپلاشتۇرۇپ، كەنت ئاھالىلىرىنىڭ كىرىمىنى ئاشۇرۇش يوللىرىنى كېڭەيتىپ، ئاممىنىڭ تۇرمۇش سۈپىتىنى سىجىل ئۆستۈردى.

ئۇل ئەسلىھەلەردىكى كەمتۈكلۈكلەرنى تولۇقلاش ئۈچۈن، بېيشىڭ كەنتى «ھۆكۈمەت ئازراق مەبلەغ سېلىش، كەنت ئازراق چىقىرىش، دېھقانلار ئازراق غەملەش»تىن ئىبارەت «ئۈچ بىر نۇقتا» قۇرۇلۇش ئەندىزىسى بويىچە، كەنت ئىچىنى قاتتىقلاشتۇرۇش، كۆكەرتىش، يورۇتۇش، گۈزەللەشتۈرۈش، كۆزىتىش-تىزگىنلەش، سىمسىز WiFi بىلەن تولۇق قاپلاشنى ئىشقا ئاشۇردى. تېلېگراف سىمى تورىنى ئۆزگەرتىشنى يولغا قويۇپ، ئەخلەت ئۆتەڭ پونكىتى، ساياھەت ئاممىۋى ھاجەتخانىسى قاتارلىق ئاممىۋى ئەسلىھەلەرنى يۈرۈشلەشتۈرۈپ قۇردى.

شىڭيۆ شادلىق باغچىسى. سۈرەتنى تيېلى شەھەرلىك پارتىيە كومىتېتى تەشۋىقات بۆلۈمى تەمىنلىگەن

2024-يىلى، كەنت ئائىلىۋى مېھمانخانا كەسپى بويىچە نۇقتىدا سىناق قىلىش تۈرىنى يولغا قويۇپ، بىكار تۇرغان پۇقرالار ئۆيىنى جانلاندۇرۇش، ئۆلچەملەشتۈرۈپ سۈپىتىنى ئاشۇرۇپ ئۆزگەرتىش، كەسىپلەشتۈرۈپ تىجارەتكە سېلىشتىن ئىبارەت تەرەققىيات يولىنى ئېچىش ئارقىلىق، 3600 كىۋادرات مېتىرلىق ئائىلىۋى مېھمانخانا ئۇنىۋېرسال گەۋدىسى بەرپا قىلدى. شۇنىڭ بىلەن بىللە، شىڭيۆ شادلىق باغچىسى، شىڭيۆ دالىدا قونۇش رايونى، سۇ ئۈستى ئىستىراھەت رايونى، VR ھېس قىلىش سارىيى قاتارلىق مەدەنىيەت-ساياھەت ئەسلىھەلىرىنى يۈرۈشلەشتۈرۈپ قۇردى. مەدەنىيەت-ساياھەت كەسپىنى تەرەققىي قىلدۇرۇش ئارقىلىق، بىكار تۇرغان يېزا بايلىقىنى «كىرىمنى ئاشۇرۇش ئېقىن سۈيى»گە ئايلاندۇردى.

ئىلگىرىكى ئۇل ئەسلىھەلىرى ئارقىدا قالغان كونا كەنت بۈگۈنكى كۈندە يۈرۈشلەشتۈرۈلۈشى مۇكەممەل، پاكىز، ئولتۇراقلىشىشقا ماس كېلىدىغان ھالەتكە يېتىپ، يېزا-كەنت ساياھەتچىلىكىنىڭ كۆتۈرۈش ئىقتىدارى ۋە ئاممىنىڭ تۇرمۇش سۈپىتىدە قوش ھالقىشنى ئىشقا ئاشۇردى.

تومۇز كۈنلىرىنىڭ مەيىن شامىلى كەنت دالىلىرىنى يەڭگىل سىيپاپ ئۆتۈپ، پاكىز، رەتلىك كەنت يوللىرى، قاينام-تاشقىنلىققا چۆمگەن مەدەنىيەت-ساياھەت مەيدانلىرى، ھاياتىي كۈچ ئۇرغۇپ تۇرغان سەھرالار بىر-بىرىگە ھۆسن قوشۇپ تۇرىدۇ. بۈگۈنكى كۈندىكى بېيشىڭ كەنتىدە، ھەربىر سۇڭ تۇپراقنىڭ ھەممىسىدە گۈللىنىش ھاياتىي كۈچى ئۇرغۇپ تۇرماقتا، ھەربىر ئۆزگىرىشكە كەنت ئاھالىلىرىنىڭ بەخت ئارزۇسى مۇجەسسەملەنگەن بولۇپ، كىچىك كەنتنىڭ كېپىنەكسىمان ئۆزگىرىشى ئارقىلىق يېڭى دەۋردە يېزا-كەنتلەرنى ئومۇميۈزلۈك گۈللەندۈرۈشنىڭ جانلىق جاۋاب قەغىزى پۈتۈپ چىقىلماقتا.