مۇخبىرلار تۆمۈريول، تاشيول، سۇ تىرانسپورتى، خەلق ئاۋىياتسىيەسىنىڭ بىرىنچى سېپىدىكى ئىش ئورۇنلىرىنى زىيارەت قىلدى

ئۆز مۇخبىرىمىز

2 -ئاينىڭ 2-كۈنى، شاڭخەي خۇڭچياۋ ۋوگزالىدا، G14-قېتىملىق پويىزنىڭ يولۇچىلىرى پويىزنىڭ يولغا چىقىشىنى كۈتمەكتە.

شىنخۇا ئاگېنتلىقى مۇخبىرى ۋاڭ شياڭ فوتوسى

-2ئاينىڭ 2-كۈنى، باھار بايرىمىلىق يولۇچى توشۇشنىڭ تۇنجى كۈنىدە پۈتۈن جەمئىيەتتە كىشىلەرنىڭ رايون ھالقىپ يۆتكىلىش مىقدارىنىڭ 18 مىليون 791 مىڭ ئادەم قېتىم بولىدىغانلىقى، بۇنىڭ 2025-يىللىق باھار بايرىمىلىق يولۇچى توشۇشنىڭ تۇنجى كۈنىدىكىدىن ％13 ئاشىدىغانلىقى مۆلچەرلەنمەكتە. مۇخبىرلار تۆمۈريول، تاشيول، سۇ تىرانسپورتى، خەلق ئاۋىياتسىيەسىنىڭ بىرىنچى سېپىدىكى ئىش ئورۇنلىرىغا چوڭقۇر چۆكۈپ زىيارەت قىلىپ، يۇرتىغا قايتىش يولىدىكى كۈچلۈك كاپالەتكە گۇۋاھ بولۇپ، سەپەرگە چىقىش يولىدىكى ئىللىق پەيتلەرنى خاتىرىلىدى.

1-كۆرۈنۈش: تۆمۈريول قاچىلىق تامىقىغا بۇ يەردە تاماق سەپلىنىدۇ

ئەتىگەن سائەت 6لەردە، تاڭ تېخى يورۇماستىنلا، دۆلەت تۆمۈريولى بېيجىڭ تۆمۈريول ئىدارىسى گاۋتيې تامىقى ئىشلەپچىقىرىش، پىششىقلاش بازىسىنىڭ خام ماتېرىيال تاپشۇرۇۋېلىش سۇپىسىدا چىراغلار يورۇپ تۇراتتى، سوغۇق ساقلاپ توشۇش ئاپتوموبىللىرى 2000 جىڭدىن ئارتۇق يېڭى يېمەكلىك ماتېرىياللىرىنى ئارقا-ئارقىدىن چۈشۈرۈپ توشۇۋاتاتتى.

تاماق ئوراش-قاچىلاش سېخىدا تاماقنىڭ خۇش ھىدى ئەتراپقا تارالغانىدى، ئىككى تاماق ئوراش ماشىنىسىدىن «تاراق-تاراق» قىلغان ئاۋاز چىقىپ، تاماق قاچىلىرىنى رەتلىك قاپلاۋاتاتتى.

ئون نەچچە قاتتىق ئىش تەرتىپىدىن ئۆتكەندىن كېيىن، 10 مىڭدىن ئارتۇق قاچىلىق تاماق تۇراقلىق تېمپېراتۇرىلىق سوغۇق ساقلاش ئاپتوموبىلى ئارقىلىق بېيجىڭ غەربىي ۋوگزالى قاتارلىق ۋوگزاللارنىڭ بۆلۈپ تارقىتىش بېكەتلىرىگە يەتكۈزۈلۈپ، ئارقىدىنلا يولۇچىلارنىڭ قولىغا يەتكۈزۈلىدۇ.

2-كۆرۈنۈش: يۇقىرى سۈرئەتلىك يولنىڭ راۋانلىقى ئەڭ گۈزەل مەنزىرە

بېيجىڭ-شاڭخەي يۇقىرى سۈرئەتلىك تاشيولىدا ئاپتوموبىللار ناھايىتى تېز ئۆتۈشۈپ تۇراتتى. مۇخبىر خېبېي چىڭشيەن ناھىيەسى بۆلىكىگە كېلىپ، خېبېي يۇقىرى سۈرئەتلىك تاشيول گۇرۇھى بېيجىڭ-شاڭخەي شۆبە شىركىتى قاتناشنىڭ راۋانلىقىغا كاپالەتلىك قىلىش بويىچە جىددىي تاقابىل تۇرۇش چوڭ ئەترىتى ئەزالىرىنىڭ خىزمىتىنى ھېس قىلدى.

ئوتتۇرا ئەترەت باشلىقى سەي گۇاڭرېن مۇنداق دېدى: «ئىش باشلىغاندا تۇنجى بولۇپ ‹ھەمبەھرە كونۇسسىمان تۇڭ›نى تولۇقلايمىز، يول يۈرۈش جەريانىدا، بەزىدە ئاپتوموبىللار كاشىلا سەۋەبىدىن ‹توختاپ قالىدۇ›، بۇ چاغدا نۇر قايتۇرۇش كونۇسسىمان تۇڭىنى ئېلىپ، ئارقا تەرەپتىن كېلىۋاتقان ئاپتوموبىللارنى ئاگاھلاندۇرالايمىز.»

بىر پىكاپ تۇيۇقسىز يولنىڭ بىر تەرىپىدە بۇزۇلۇپ قالدى. سەي گۇاڭرېن دەرھال ئەترەت ئەزالىرىنى باشلاپ ئالدىغا بېرىپ، ئاپتوموبىلنى يېقىن ئەتراپتىكى مۇلازىمەت رايونىغا سۆرەپ ئاپىرىپ، كاشىلىنى تەكشۈرۈشكە ھەم قايتا قوزغىتىشقا ياردەملەشتى.

3-كۆرۈنۈش: 100دىن ئارتۇق يېڭى ئېنېرگىيەلىك ئاپتوموبىل «دېڭىز ھالقىپ باھار بايرىمىلىق يولۇچى توشۇدى»

خەينەن ئەركىن سودا پورتىنى پۈتۈن ئارالدا يېپىق يۈرۈشتۈرۈش يولغا قويۇلغاندىن كېيىنكى تۇنجى باھار بايرىمىلىق يولۇچى توشۇش باشلاندى. خەيكوۋ شەھىرىنىڭ شيۇيىڭ پورتىدا «لۈيۈەن 9-نومۇر»لۇق يېڭى ئېنېرگىيەلىك ئاپتوموبىللار ئۈچۈن مەخسۇس ئىشلىتىلىدىغان تەكشى تاختىلىق چاتما پاراخوت يولغا چىقىشقا تەييارلاندى

يېڭى ئېنېرگىيەلىك ئاپتوموبىل ھەيدەپ دېڭىزدىن ئۆتىدىغان ئاپتوموبىل ئىگىلىرى بارغانسېرى كۆپەيدى. «لۈيۈەن 9-نومۇر»نىڭ باش مۇئاۋىن كاپىتانى ياڭ يوۋيۇڭ مۇنداق دېدى: «بىزنىڭ قىلىدىغىنىمىز ئاپتوموبىللارنى كېمىگە بىخەتەر چىقىش-چۈشۈشكە يېتەكلەپ، ئاپتوموبىللارنىمۇ دېڭىزدىن يۇقىرى ئۈنۈملۈك ئۆتكۈزۈش ئىمكانىيىتىگە ئىگە قىلىش.»

«لۈيۈەن 9-نومۇر»غا يەككە لىنىيەلىك قاتناشتا تەخمىنەن 180 يېڭى ئېنېرگىيەلىك ئاپتوموبىل قاچىلىغىلى بولىدۇ. سائەت 9 دىن 50 مىنۇت ئۆتكەندە، گۈدۈك ئاۋازىغا ئەگىشىپ، «لۈيۈەن 9-نومۇر» چيۇڭجوۋ دېڭىز بوغۇزىنىڭ شىمالىي قىرغىقىغا قاراپ يولغا چىقتى.

4-كۆرۈنۈش: ئايرودۇرۇمدا يۈك-تاق توشۇشتا ئەقلىي ئىقتىدارلىق سىستېما ئىشلىتىلدى

سائەت 6دىن 2 مىنۇت ئۆتكەندە، بېيجىڭ داشىڭ خەلقئارا ئايروپورتى باھار بايرىمىلىق يولۇچى توشۇشنىڭ تۇنجى كۈنىدىكى تۇنجى نۆۋەتچى ئايروپىلاننى كۈتۈۋالدى. تەخمىنەن يېرىم سائەتتىن كېيىن، تۇنجى يۈك-تاق يۈك-تاق ئېلىش ئايلانما تەخسىسىگە سىلىق يەتكۈزۈلدى.

مەركىزىي كونترولخانىنىڭ چوڭ ئېكرانىدا، بىر ئېلېكتىرونلۇق خەرىتىدە ئايرودۇرۇمنىڭ 6 ئايرىش ماشىنىسى، پورتقا كىرىدىغان يۈك-تاق ئايلانما تەخسىسىدىن 22سى، پورتتىن چىقىدىغان يۈك-تاق ئايلانما تەخسىسىدىن 41ى قاتارلىقلارنىڭ يۈرۈشۈش ھالىتى بىۋاسىتە كۆرسىتىلىپ تۇراتتى. يېڭىدىن ئورۇنلاشتۇرۇلغان ئاقىل يۈك-تاق توشۇش سىستېمىسىدا مەشغۇلات قىلىنىۋاتاتتى.

تۇيۇقسىز، چوڭ ئېكراندا 1-نومۇرلۇق ئايرىش ماشىنىسى قىزىل رەڭدە كۆرۈندى. داشىڭ ئايروپورتى ئايروپىلان كۈتۈش بىناسى باشقۇرۇش بۆلۈمى يۈك-تاق بۆلىكىنىڭ دېرىكتورى شۈ لىن يۈك-تاق توشۇش ئارقا زالىغا بېرىپ، مەسىلىنى ناھايىتى تېزلا تېپىپ چىقتى ھەم مۇۋاپىق ھەل قىلدى، ئايرىش ماشىنىسىنىڭ نورمال ئايلىنىشى تېز سۈرئەتتە ئەسلىگە كەلدى.

(مۇناسىۋەتلىك خەۋەرلەرنى 13-نۇسخىدىن كۆرۈۋېلىڭ)

(ئۇنىۋېرسال ئۆز مۇخبىرىمىز ۋاڭ يۈنشەن، خەن شىن، دۇڭ زېياڭ، چيۇ چاۋيى خەۋەر قىلىدۇ)