جۇاشىشيۇلۇڭ زاڭزۇ تىلىدا بەخت يايلىقى دېگەن مەنىدە.
2024-يىل 6-ئايدا، لەنجوۋ-جاڭجياكوۋ يۇقىرى سۈرئەتلىك تۆمۈريولىنىڭ لەنجوۋ-ۋۇخەن بۆلىكىدە رەسمىي قاتناش باشلىنىپ ئىشقا كىرىشتۈرۈلۈشىگە ئەگىشىپ، گەنسۇ ئۆلكىسى ۋۇۋېي شەھىرىنىڭ تيەنجۇ زاڭزۇ ئاپتونوم ناھىيەسى تەرەققىيات يېڭى پۇرسىتىنى كۈتۈۋالدى. مايا قارلىق تېغىنىڭ شىمالىي ئېتىكىگە جايلاشقان جۇاشىشيۇلۇڭ يايلىقى ئاجايىپ گۈزەل ئېگىزلىك مەنزىرىسى ۋە خاس مەدەنىيەت-ساياھەت تۈرىگە تايىنىپ، تېزدىن قىزىق نۇقتا ساياھەت مەنزىلگاھىغا ئايلاندى.
جۇاشىشيۇلۇڭ ئوتلىقىدىكى كۆلىمى 2100 مو كېلىدىغان مايا قارلىق تېغى چېدىر لاگېرىدا ئوتلاققا يۇلتۇزدەك چېچىلغان ئاق چېدىرلار بىلەن يىراقتىكى قارلىق تاغ، بەخىرامان ئوزۇق ئىزدەپ يۈرگەن كالا-قويلار بىر-بىرىگە ھۆسن قوشۇپ، جىمجىت، ھەيۋەتلىك، گۈزەل ئېگىزلىك سۈرىتىنى ھاسىل قىلغانىدى.
يېقىنقى يىللاردىن بۇيان، تيەنجۇ ناھىيەسى ئۆزگىچە ئېكولوگىيە بايلىقىغا تايىنىپ، جۇاشىشيۇلۇڭ يايلىقىدا سەيلە قىلىش، سالقىنلاش، ئائىلىۋى مېھمانخانىدا قونۇش، مەدەنىيەتنى ھېس قىلىش، مۇسابىقە ئىشلىرىنى تەتقىق قىلىپ ئۆگىنىش بىر گەۋدىلەشكەن ئۇنىۋېرسال ساياھەت مەنزىلگاھى قىلىپ قۇرۇپ چىقىدۇ.
مايا قارلىق تېغى چېدىر لاگېرى قاتارلىق بەلگە خاراكتېرلىك مەدەنىيەت-ساياھەت تۈرلىرىنىڭ ئەمەلىيلىشىشىگە ئەگىشىپ، تيەنجۇ ساياھىتى قىزغىنلىقى سىجىل ئېشىپ، ساياھەت ئىقتىسادى جۇش ئۇرۇپ راۋاجلاندى. 2025-يىلىنىڭ ئالدىنقى يېرىمىدا، تيەنجۇ ناھىيەسى كۈتۈۋالغان ساياھەتچى 4 مىليون 480 مىڭ 500 ئادەم قېتىم بولۇپ، ئىشقا ئاشۇرغان ساياھەت ئىستېمالى 4 مىليارد 466 مىليون يۈەن بولدى، بۇ، بۇلتۇرقى ئوخشاش مەزگىلدىكىدىن ئايرىم-ئايرىم ھالدا زور دەرىجىدە ％70.3 ۋە ％93.4 ئاشتى.
ئەسكەرتىش: مەنبە خەلق تورى دەپ ئەسكەرتىلگەن مەزمۇنلارنىڭ ھەممىسى خەلق تورىغا تەۋە مەزمۇنلار بولۇپ، كۆچۈرمەكچى بولسىڭىز مەنبەنى ئېنىق ئەسكەرتىڭ
