گېزىتىمىز، بېيجىڭ، 7-ئاينىڭ 10-كۈنى تېلېگراممىسى (مۇخبىرلىرىمىز ۋاڭ دى، جاۋ يىپۇ) 7-ئاينىڭ 11-كۈنى چۈشتىن كېيىن، دۇنياۋى مەدەنىيلىك سۆھبىتى مىنىستىر دەرىجىلىكلەر يىغىنى بېيجىڭدا ئېچىلدى. ج ك پ مەركىزىي كومىتېتى سىياسىي بىيۇروسىنىڭ ئەزاسى، مەركىزىي كومىتېت تەشۋىقات بۆلۈمىنىڭ باشلىقى لى شۇلېي ئېچىلىش مۇراسىمىدا رەئىس شى جىنپىڭنىڭ تەبرىك خېتىنى ئوقۇدى. ج ك پ مەركىزىي كومىتېتى سىياسىي بىيۇروسى دائىمىي كومىتېتىنىڭ ئەزاسى، مەركىزىي كومىتېت شۇجىچۇسىنىڭ شۇجىسى سەي چى باشلىنىش مۇراسىمىغا قاتناشتى ھەمدە ئاساسىي مەقسەت سۆزى قىلدى.
سەي چى مۇنۇلارنى بىلدۈردى: رەئىس شى جىنپىڭ بۇ قېتىمقى يىغىنغا يۈكسەك ئەھمىيەت بېرىپ، مەخسۇس تەبرىك خېتى ئەۋەتتى، تەبرىك خېتىنىڭ ئورنى يۈكسەك، ئىدىيەسى چوڭقۇر بولۇپ، كېيىنكى مەدەنىيلىك سۆھبىتى ئۈچۈن ئېنىق يۆنىلىش كۆرسىتىپ بەردى. ئىككى يىلدىن كۆپرەك ۋاقىت ئىلگىرى، رەئىس شى جىنپىڭ دۇنياۋى مەدەنىيلىك تەشەببۇسىنى تەنتەنىلىك ئوتتۇرىغا قويۇپ، خەلقئارا جەمئىيەتنىڭ قىزغىن ئىنكاسى ۋە پائال ئاۋاز قوشۇشىغا ئېرىشكەنىدى. دۇنياۋى مەدەنىيلىك تەشەببۇسى مەدەنىيلىكنىڭ كۆپ خىللىقىنى تەكىتلەپ، پەرق بولسىمۇ ئىناق ئۆتۈش، گۈزەللىكلەردە ئورتاقلىشىشنى تەشەببۇس قىلىدۇ؛ مەدەنىيلىكنىڭ ئورتاقلىقىنى تەكىتلەپ، بىر نىيەت، بىر مەقسەتتە بولۇش، داغدام يولدا تەڭ مېڭىشنى تەشەببۇس قىلىدۇ؛ مەدەنىيلىكنىڭ تەرەققىيات ئىكەنلىكىنى تەكىتلەپ، قەيەردىن كەلگەنلىكىنى ئېنىق بىلىش، نەگە بارىدىغانلىقىنى ئايدىڭلاشتۇرۇشنى تەشەببۇس قىلىدۇ؛ مەدەنىيلىكنىڭ سىغدۇرۇشچانلىقىنى تەكىتلەپ، سۆھبەتلىشىش، ھەمكارلىشىش، ئۆزئارا چۈشىنىش، ئۆزئارا ئىناق ئۆتۈشنى تەشەببۇس قىلىدۇ.
سەي چى مۇنۇلارنى كۆرسەتتى: دۇنياۋى مەدەنىيلىك تەشەببۇسى جۇڭخۇا مۇنەۋۋەر ئەنئەنىۋى مەدەنىيىتىدە يىلتىز تارتقان، ئۇنىڭ يادرولۇق مۇھىم مەزمۇنى ئوخشاشلىقلاردا بىرلىككە كېلىپ، پەرقلەرنى ساقلاپ قېلىش، ئىناق ھەمكارلىشىپ بىللە ياشاش بولۇپ، دۇنيادىكى نۇرغۇن دۆلەتلەرنىڭ كۆپ مەنبەلىك يۇغۇرۇلۇش، ئورتاق مەۋجۇت بولۇپ تۇرۇشتىن ئىبارەت مەدەنىيەت ئىدىيەسى بىلەن ئۆزئارا ماسلاشقان، بىرلەشكەن دۆلەتلەر تەشكىلاتى نىزامنامىسىنىڭ ئاساسىي مەقسىتى ۋە پىرىنسىپىغا يۈكسەك دەرىجىدە ئۇيغۇن كېلىدۇ. ئىككى يىلدىن كۆپرەك ۋاقىتتىن بۇيان، دۇنياۋى مەدەنىيلىك تەشەببۇسىدىكى ئىدىيە، تەشەببۇس كۈنسېرى دۇنياۋى ئورتاق تونۇشقا ئايلاندى ھەم ئۈزلۈكسىز تۈردە جانلىق ئىزدىنىش ۋە ئەمەلىيەتكە ئايلاندى.
سەي چى مۇنۇلارنى تەكىتلىدى: دۇنيادا يۈز يىلدىمۇ كۆرۈلۈپ باقمىغان چوڭ ئۆزگىرىش ۋەزىيىتىنىڭ تېز سۈرئەتتە ئۆزگىرىشىگە ئەگىشىپ، ھەرقايسى دۆلەت خەلقىنىڭ تىنچلىقنى كۆزلەش، تەرەققىياتقا ئىنتىلىش، ھەمكارلىقنى ئىلگىرى سۈرۈش ساداسى كۈنسېرى كۈچەيدى، لېكىن «مەدەنىيلىك ئارازلىقى»، «مەدەنىيلىك توقۇنۇشى»، «مەدەنىيلىك ئەۋزەللىكى» قاتارلىق سەپسەتىلەر پات-پات قايتا باش كۆتۈرۈپ چىقتى، مەدەنىيلىكنىڭ كۆپ خىللىقىنى قوغداش، دۇنيانىڭ تىنچلىقى، تەرەققىياتىنى ئىلگىرى سۈرۈشتە ھېلىھەم ۋەزىپە ئېغىر، يول يىراق. يېڭى تارىخىي تۆت كوچا ئېغىزىدا تۇرۇۋاتقان پەيتتە، بىز تەرەققىيات يولىدا كۆپ خىللاشقان ئىزدىنىشنى ئورتاق كۈچەيتىپ، ئىنسانىيەت مەدەنىيلىكىنىڭ ھالىتىنى ئۈزلۈكسىز بېيىتىشىمىز؛ مەدەنىيەتكە ۋارىسلىق قىلىش ۋە ئۇنىڭدا يېڭىلىق يارىتىشنى ئورتاق كۈچەيتىپ، مەدەنىيەت مىراسلىرىنى قوغداش ۋە مەدەنىيەت ئىشلىرىنىڭ تەرەققىياتىغا پائال تۈرتكە بولۇشىمىز؛ ھەرقايسى دۆلەتلەرنىڭ ئادىمىيەت ئالاقىسىنى ئورتاق كۈچەيتىپ، تىرىشىپ ئىناق بىللە ئۆتىدىغان ئالماشتۇرۇش، ئۆزئارا ئۆرنەك ئېلىش كەيپىياتى يارىتىشىمىز؛ سۇپا مېخانىزمى قۇرۇلۇشىنى ئورتاق كۈچەيتىپ، كۆپ مەنبەلىك، ئىستېرېئولۇق دۇنياۋى مەدەنىيلىك سۆھبىتى ھەمكارلىق تورى بەرپا قىلىشقا ھەقىقىي تۈرتكە بولۇشىمىز كېرەك.
«ئىنسانىيەت مەدەنىيلىكىنىڭ كۆپ خىللىقىنى قوغداپ، دۇنيانىڭ تىنچلىقى، تەرەققىياتىنى ئورتاق ئىلگىرى سۈرۈش» بۇ قېتىمقى يىغىننىڭ باش تېمىسى بولۇپ، ج ك پ مەركىزىي كومىتېتى تەشۋىقات بۆلۈمى بىلەن ج ك پ مەركىزىي كومىتېتى تاشقى ئالاقە بۆلۈمى بىرلىكتە مەسئۇل بولۇپ ئۆتكۈزدى. بىرلەشكەن دۆلەتلەر تەشكىلاتىنىڭ باش كاتىپى گۇتېررېس يىغىنغا تەبرىك خېتى ئەۋەتتى. تەخمىنەن 140 دۆلەت ۋە رايوندىن كەلگەن سىياسىي ساھە، مەدەنىيەت ساھەسى، مائارىپ ساھەسىدىكى زاتلار قاتارلىقلاردىن بولۇپ 600 دىن ئارتۇق كىشى باشلىنىش مۇراسىمىغا قاتناشتى.
باشلىنىش مۇراسىمىدا، ھىندونېزىيەنىڭ سابىق زۇڭتۇڭى مېگاۋاتى، نامىبىيەنىڭ سابىق زۇڭتۇڭى مۇبېنبا، ياپونىيەنىڭ سابىق باش ۋەزىرى جيۇشەنيوجىفۇ، بېلگىيەنىڭ سابىق باش ۋەزىرى لېتم ئىلگىرى-كېيىن بولۇپ سۆز قىلدى. ئۇلار مۇنۇلارنى بىلدۈردى: مەدەنىيلىكنىڭ كۆپ خىللىقىغا ھۆرمەت قىلىپ، دۇنيانىڭ تىنچلىقى، تەرەققىياتىنى ئورتاق ئىلگىرى سۈرۈش ئىنسانىيەتنىڭ ئىستىقبالى، تەقدىرىگە مۇناسىۋەتلىك مۇھىم تېما، دۇنياۋى مەدەنىيلىك تەشەببۇسى دۇنياغا مۇقىملىق ۋە ئېنىقلىق بېغىشلىدى، ھەرقايسى دۆلەتلەر ئورتاق تىرىشىپ، سەمىمىي پىكىر ئالماشتۇرۇش، ئۆزئارا ئۆگىنىش، ئۆزئارا ئۆرنەك ئېلىش داۋامىدا مەدەنىيلىكنى ئەۋلادمۇئەۋلاد داۋاملاشتۇرۇپ، گۈزەل كەلگۈسىنى ئورتاق يارىتىشى كېرەك.
ج ك پ مەركىزىي كومىتېتى سىياسىي بىيۇروسىنىڭ ئەزاسى، بېيجىڭ شەھەرلىك پارتىيە كومىتېتىنىڭ شۇجىسى يىن لى، دۆلەت ئىشلىرى كومىسسارى شېن يىچىن باشلىنىش مۇراسىمىغا قاتناشتى.
ئەسكەرتىش: مەنبە خەلق تورى دەپ ئەسكەرتىلگەن مەزمۇنلارنىڭ ھەممىسى خەلق تورىغا تەۋە مەزمۇنلار بولۇپ، كۆچۈرمەكچى بولسىڭىز مەنبەنى ئېنىق ئەسكەرتىڭ
