شىنخۇا ئاگېنتلىقى، بېيجىڭ، 4 - ئاينىڭ 1 - كۈنى تېلېگراممىسى 4 - ئاينىڭ 1 - كۈنى، دۆلەت رەئىسى شى جىنپىڭ ھىندىستان زۇڭتۇڭى مۇرمۇ بىلەن ئۆزئارا تەبرىك تېلېگراممىسى ئەۋەتىپ، ئىككى دۆلەت دىپلوماتىك مۇناسىۋەت ئورناتقانلىقىنىڭ 75 يىللىقىنى تەبرىكلىدى.
شى جىنپىڭ مۇنداق كۆرسەتتى: جۇڭگو بىلەن ھىندىستان ئوخشاشلا مەدەنىي قەدىمىي دۆلەتلەر، تەرەققىي قىلىۋاتقان چوڭ دۆلەتلەر، «يەرشارىنىڭ جەنۇبى»نىڭ مۇھىم ئەزاسى بولۇپ، ھەرقايسىسى ئۆزلىرىنىڭ زامانىۋىلاشتۇرۇش قۇرۇلۇشىنىڭ ئاچقۇچلۇق مەزگىلىدە تۇرماقتا. جۇڭگو - ھىندىستان مۇناسىۋىتىنىڭ تەرەققىيات مۇساپىسى شۇنى چۈشەندۈرۈپ بېرىدۇكى، بىر - بىرىنى مۇۋەپپەقىيەتكە ئېرىشتۈرىدىغان ھەمراھلاردىن بولۇش، «ئەجدىھا بىلەن پىل تەڭ ئۇسسۇلغا چۈشۈش»نى ئىشقا ئاشۇرۇش ئىككى تەرەپنىڭ توغرا تاللىشى، بۇ، ئىككى دۆلەت ۋە ئىككى دۆلەت خەلقىنىڭ تۈپ مەنپەئىتىگە تامامەن ئۇيغۇن. ئىككى تەرەپ جۇڭگو - ھىندىستان مۇناسىۋىتىگە ئىستراتېگىيەلىك يۈكسەكلىك ۋە يىراق كەلگۈسى نۇقتىدىن مۇئامىلە قىلىش ۋە ئۇنى بىر تەرەپ قىلىشتا چىڭ تۇرۇپ، قوشنا چوڭ دۆلەتلەرنىڭ تىنچ بىللە تۇرۇش، ئۆزئارا ئىشىنىش، ئۆزئارا مەنپەئەت يەتكۈزۈش، ئورتاق تەرەققىي قىلىشتىن ئىبارەت چىقىشىپ ئۆتۈش يولى ئۈستىدە ئورتاق ئىزدىنىپ، دۇنيانىڭ كۆپ قۇتۇپلىشىشى ۋە خەلقئارا مۇناسىۋەتنىڭ دېموكراتىيەلىشىشىنى ئورتاق ئالغا سىلجىتىشى كېرەك.
شى جىنپىڭ مۇنداق تەكىتلىدى: مەن زۇڭتۇڭ خانىم بىلەن بىرلىكتە تىرىشىپ، ئىككى دۆلەت دىپلوماتىك مۇناسىۋەت ئورناتقانلىقىنىڭ 75 يىللىقىنى پۇرسەت بىلىپ، ئىككى تەرەپنىڭ ئىستراتېگىيەلىك ئۆزئارا ئىشىنىشىنى ئىلگىرى سۈرۈپ، ھەرقايسى ساھەلەردىكى ئالماشتۇرۇش، ھەمكارلىشىشنى كۈچەيتىپ، مۇھىم خەلقئارا ئىشلاردىكى ئالاقىلىشىش ۋە ماسلىشىشنى چوڭقۇرلاشتۇرۇپ، جۇڭگو - ھىندىستان چېگرا رايونىنىڭ تىنچلىقى، خاتىرجەملىكىنى ئورتاق ياخشى قوغداپ، جۇڭگو - ھىندىستان مۇناسىۋىتىنىڭ ساغلام، مۇقىم يولنى بويلاپ ئالغا قاراپ تەرەققىي قىلىشىغا تۈرتكە بولۇپ، دۇنيانىڭ تىنچلىقى، گۈللىنىشىنى ئىلگىرى سۈرۈش ئۈچۈن تۆھپە قوشۇشنى خالايمەن.
مۇرمۇ مۇنداق بىلدۈردى: ھىندىستان بىلەن جۇڭگو ئىككى چوڭ قوشنا دۆلەت، دۇنيانىڭ ئۈچتىن بىر قىسىم نوپۇسىغا ئىگە. مۇقىم، مۆلچەرلىگىلى بولىدىغان ۋە دوستانە بولغان ئىككى تەرەپ مۇناسىۋىتى ئىككى دۆلەت ۋە دۇنياغا بەخت - سائادەت ئېلىپ كېلىدۇ. بىز ھىندىستان - جۇڭگو دىپلوماتىك مۇناسىۋەت ئورناتقانلىقىنىڭ 75 يىللىقىنى پۇرسەت بىلىپ، ھىندىستان - جۇڭگو مۇناسىۋىتىنىڭ ساغلام، مۇقىم تەرەققىياتىغا ئورتاق تۈرتكە بولۇشىمىز كېرەك.
شۇ كۈنى، گوۋۇيۈەن زۇڭلىسى لى چياڭ ھىندىستان زۇڭلىسى مودى بىلەن ئۆزئارا تەبرىك تېلېگراممىسى ئەۋەتتى. لى چياڭ مۇنداق بىلدۈردى: جۇڭگو تەرەپ ھىندىستان تەرەپ بىلەن بىرلىكتە تىرىشىپ، ئىككى دۆلەت دىپلوماتىك مۇناسىۋەت ئورناتقانلىقىنىڭ 75 يىللىقىنى پۇرسەت بىلىپ، ئىستراتېگىيەلىك ئۆزئارا ئىشىنىشنى ئۈزلۈكسىز ئىلگىرى سۈرۈپ، ھەرقايسى ساھەلەردىكى ئالماشتۇرۇش، ھەمكارلىشىشنى ئالغا سىلجىتىپ، چېگرا مەسىلىسىنى مۇۋاپىق بىر تەرەپ قىلىپ، ئىككى دۆلەت مۇناسىۋىتىنىڭ ساغلام، مۇقىم يولنى بويلاپ ئالغا قاراپ تەرەققىي قىلىشىغا تۈرتكە بولۇپ، ئىككى دۆلەت خەلقىگە تېخىمۇ كۆپ بەخت - سائادەت ئېلىپ كېلىشنى خالايدۇ.
مودى مۇنداق بىلدۈردى: ھىندىستان بىلەن جۇڭگو ئىككى چوڭ مەدەنىي قەدىمىي دۆلەت، ئىنسانىيەت تارىخىنى يارىتىش مۇساپىسىدە مۇھىم رولىنى جارى قىلدۇردى، ھازىر تىنچلىق ۋە تەرەققىياتنى ئىلگىرى سۈرۈشتىن ئىبارەت ئېغىر ۋەزىپىنى زىممىسىگە ئالدى. ھىندىستان - جۇڭگو مۇناسىۋىتىنىڭ تەرەققىياتى دۇنيانىڭ گۈللىنىشى، مۇقىملىقىغا پايدىلىق بولۇپلا قالماي، يەنە دۇنيانىڭ كۆپ قۇتۇپلىشىشىنى ئىشقا ئاشۇرۇشقىمۇ پايدىلىق. ھىندىستان - جۇڭگو دىپلوماتىك مۇناسىۋەت ئورناتقانلىقىنىڭ 75 يىللىقى ئىككى دۆلەت مۇناسىۋىتىنى ساغلام، مۇقىم تەرەققىيات باسقۇچىغا كىرىشكە يېتەكلەيدۇ.
ئەسكەرتىش: مەنبە خەلق تورى دەپ ئەسكەرتىلگەن مەزمۇنلارنىڭ ھەممىسى خەلق تورىغا تەۋە مەزمۇنلار بولۇپ، كۆچۈرمەكچى بولسىڭىز مەنبەنى ئېنىق ئەسكەرتىڭ
