خەلق ئاممىسىنىڭ تۇرالغۇ سۈپىتىنى ئۆستۈرۈش ئېھتىياجىغا ماسلىشىش ئۈچۈن، تۇرالغۇ ۋە شەھەر-يېزا قۇرۇلۇشى مىنىستىرلىقى 3-ئاينىڭ 31-كۈنى دۆلەت ئۆلچىمىدىكى «تۇرالغۇ تۈرى ئۆلچىمى»نى ئېلان قىلدى. يېڭى ئۆلچەمدە تۇرالغۇ تۈرى ئوبيېكت قىلىنىپ، بىخەتەر، ئازادە، يېشىل، ئاقىل بولۇش نىشان قىلىنىپ، كۆلەم، ئورۇنلاشتۇرۇش، ئىقتىدار، خۇسۇسىيەت ۋە ئاچقۇچلۇق تېخنىكىلىق تەدبىر قاتارلىق جەھەتلەردە تۇرالغۇ تۈرىنى قۇرۇش، ئىشلىتىش ۋە ئاسراش توغرىسىدا بەلگىلىمە چىقىرىلدى.
يېڭى قائىدىدە يېڭىدىن سېلىنغان تۇرالغۇ ئىمارەت قەۋىتىنىڭ ئېگىزلىكى ئۈچ مېتىردىن تۆۋەن بولماسلىق، تۆت قەۋەت ۋە ئۇنىڭدىن يۇقىرى تۇرالغۇلارغا لىفىت ئورنىتىش؛ تام ۋە پول تاختىسىنىڭ ئاۋاز توسۇش ئىقتىدارىنى ئۆستۈرۈش بەلگىلەندى؛ ئۆي ئىشىكى، تازىلىق ئۆيى ئىشىكىنىڭ ئۆتۈش ساپ كەڭلىكى ئاشۇرۇلدى؛ بالكون قاتارلىق بوشلۇق ئەتراپى رېشاتكىلىرىنىڭ ئېگىزلىكى ئۆستۈرۈلدى؛ ئاممىۋى كۆچمە خەۋەرلىشىش سىگنالىنىڭ ئاممىۋى بوشلۇق ۋە لىفىت ئىچىنى قاپلىشى تەلەپ قىلىندى؛ ھاۋا تەڭشىگۈچنىڭ ئۆي سىرتىدىكى ئاپپاراتىنى مەخسۇس سۇپىغا ئورنىتىش تەلەپ قىلىندى؛ ئوخشاش بولمىغان كىلىمات رايونلىرىدا پار بىلەن تەمىنلەش، ھاۋا تەڭشىگۈچ ئەسلىھەلىرىنى ئورۇنلاشتۇرۇش تەلىپى قاتارلىقلار بەلگىلەندى. يېڭى ئۆلچەم بۇ يىل 5-ئاينىڭ 1-كۈنىدىن باشلاپ يولغا قويۇلىدۇ.
تۇرالغۇ ۋە شەھەر-يېزا قۇرۇلۇشى مىنىستىرلىقىنىڭ ئالاقىدار مەھكىمە، ئىدارىسىنىڭ مەسئۇلى مۇنداق دېدى: دۆلىتىمىزنىڭ ئىقتىساد، جەمئىيىتىنىڭ تېز تەرەققىي قىلىشىغا ئەگىشىپ، خەلقنىڭ تۇرمۇش سەۋىيەسى ۋە بىناكارلىق تېخنىكىسىنىڭ تەرەققىيات سەۋىيەسى بىرقەدەر زور دەرىجىدە ئۆسۈپ، تۇرالغۇ سۈپىتىنى ئۆستۈرۈشكە بولغان ئېھتىياجى تېخىمۇ يۇقىرى بولدى. يېڭى ئۆلچەمدە دۆلىتىمىزنىڭ يېقىنقى يىللاردىن بۇيانقى تۇرالغۇ تۈرى قۇرۇلۇشى ئەمەلىيىتىگە بىرلەشتۈرۈلۈپ، ھازىر يولغا قويۇلۇۋاتقان تۇرالغۇ ئۆلچىمىنىڭ يولغا قويۇلۇش ئەھۋالىنى باھالاش ئاساسىدا، كەڭ دائىرىدە پىكىر ئېلىش ۋە تولۇق دەلىللەش ئارقىلىق، تۇرالغۇ تۈرىنىڭ تۆۋەن چەك تەلىپى ئوتتۇرىغا قويۇلدى، بۇ، شەھەر-بازارلاردىكى تۇرالغۇلارنىڭ يۇقىرى سۈپەتلىك تەرەققىياتىغا تېخىمۇ كۈچلۈك تىرەك بولىدۇ.
مەنبە: خەلق تورى
ئەسكەرتىش: مەنبە خەلق تورى دەپ ئەسكەرتىلگەن مەزمۇنلارنىڭ ھەممىسى خەلق تورىغا تەۋە مەزمۇنلار بولۇپ، كۆچۈرمەكچى بولسىڭىز مەنبەنى ئېنىق ئەسكەرتىڭ
