بۈگۈن «2025-يىللىق دۆلەتنىڭ ئوقۇش ياردەم قەرز پۇلىنىڭ ئۆسۈمىنى كەچۈرۈم قىلىش ۋە دىرىنى كېچىكتۈرۈپ قايتۇرۇش خىزمىتىنى ياخشى ئىشلەش توغرىسىدىكى ئۇقتۇرۇش» ئېلان قىلىندى.
ئۇقتۇرۇشتا مۇنۇلار كۆرسىتىلدى: خەلق تۇرمۇشىنى كاپالەتلەندۈرۈش ۋە ياخشىلاش سالمىقىنى زورايتىپ، 2025-يىلى ئالىي مەكتەپنى پۈتكۈزگەنلەرنىڭ ئىشقا ئورۇنلىشىشىغا مۇلازىمەت قىلىش خىزمىتىنى ياخشى ئىشلەشنى قوللاش ئۈچۈن، ھازىر 2025-يىللىق دۆلەتنىڭ ئوقۇش ياردەم قەرز پۇلىنىڭ ئۆسۈمىنى كەچۈرۈم قىلىش ۋە دىرىنى كېچىكتۈرۈپ قايتۇرۇش خىزمىتىنى ياخشى ئىشلەش توغرىسىدا تۆۋەندىكىدەك ئۇقتۇرۇش قىلىمىز:
1. 2025-يىل 1-ئاينىڭ 1-كۈنىدىن باشلاپ، 2025-يىللىق ھەم ئىلگىرىكى يىللاردا ئوقۇش پۈتكۈزگەن قەرز پۇل ئالغان ئوقۇغۇچىلارنىڭ 2025-يىل ئىچىدە قايتۇرۇشقا تېگىشلىك دۆلەت ئوقۇش ياردەم قەرز پۇلىنىڭ ئۆسۈمى كەچۈرۈم قىلىنىدۇ، دۆلەتنىڭ ئوقۇش ياردەم قەرز پۇلى ئۆسۈم ياردىمى سىياسىتىگە ئاساسەن، كەچۈرۈم قىلىنغان ئۆسۈمنى مەركەز مالىيەسى ۋە يەرلىك مالىيە ئايرىم-ئايرىم ئۈستىگە ئالىدۇ.
2. 2025-يىلى ۋە ئىلگىرىكى يىللاردا ئوقۇش پۈتكۈزگەن قەرز پۇل ئالغان ئوقۇغۇچىلارنىڭ 2025-يىل ئىچىدە قايتۇرۇشقا تېگىشلىك دۆلەت ئوقۇش ياردەم قەرز پۇلىنىڭ دىرىنى قەرز پۇل ئالغان ئوقۇغۇچىلار ئۆز ئالدىغا ئىلتىماس قىلىش ئارقىلىق، بىر يىل كېچىكتۈرۈپ قايتۇرسا بولىدۇ، ئالاقىدار بەلگىلىمىلەر بويىچە، قەرز پۇل مۇددىتى ئەڭ ئۇزۇن بولغاندا 22 يىلدىن ئېشىپ كەتمەيدۇ، كېچىكتۈرۈلگەن قەرز پۇلنىڭ جەرىمانە ئۆسۈمى ۋە قوشما ئۆسۈمى ھېسابلانمايدۇ، خەۋپ-خەتەرنى تۈرگە ئايرىش ۋاقتىنچە تەڭشەلمەيدۇ.
3. دۆلەت ئوقۇش ياردەم قەرز پۇلىنى بېجىرگۈچى بانكا تەڭشەلگەندىن كېيىنكى قەرز پۇل ئورۇنلاشتۇرۇشى بويىچە ئىناۋەت گۇۋاھلىقى ئۇچۇرىنى يوللىشى، يوللىغانلىرىنى تەڭشىشى كېرەك.
بۇ ئۇقتۇرۇشتا بەلگىلەنمىگەن ئىشلار ھازىر يولغا قويۇلۇۋاتقان مۇناسىۋەتلىك سىياسەتلەر بويىچە ئىجرا قىلىنىدۇ.
مەنبە: خەلق تورى
ئەسكەرتىش: مەنبە خەلق تورى دەپ ئەسكەرتىلگەن مەزمۇنلارنىڭ ھەممىسى خەلق تورىغا تەۋە مەزمۇنلار بولۇپ، كۆچۈرمەكچى بولسىڭىز مەنبەنى ئېنىق ئەسكەرتىڭ
