ئىچكى موڭغۇل ئاپتونوم رايونى كۆكخوت شەھەرلىك سەھىيە-ساغلاملىق كومىتېتىنىڭ تور بېكىتى 3-ئاينىڭ 13-كۈنى ئەڭ يېڭى بالا بېقىش تولۇقلىمىسىنى يولغا قويۇش تەپسىلىي قائىدىسىنى ئېلان قىلغان، تەلەپكە ئۇيغۇن كېلىدىغان ئائىلىلەرگە، بىر پەرزەنتلىك بولسا بىر قېتىمدىلا 10 مىڭ يۈەن بالا بېقىش تولۇقلىمىسى، ئىككى پەرزەنتلىك بولسا 50 مىڭ يۈەن بالا بېقىش تولۇقلىمىسى، ئۈچ پەرزەنتلىك ۋە ئۇنىڭدىن كۆپ پەرزەنتلىك بولسا 100 مىڭ يۈەن بالا بېقىش تولۇقلىمىسى بېرىلىدىكەن.
«كۆكخوت شەھەرلىك خەلق ھۆكۈمىتىنىڭ نوپۇسنىڭ توپلىنىشىنى ئىلگىرى سۈرۈپ، نوپۇسىنىڭ يۇقىرى سۈپەتلىك تەرەققىياتىغا تۈرتكە بولۇش توغرىسىدىكى يولغا قويۇش پىكرى» ھۆججىتىنىڭ روھىغا ئاساسەن، بالا بېقىش ياردەم پۇلى تارقىتىشنى يولغا قويۇش تەپسىلىي قائىدىسىدە سالاھىيەت ئىسپاتى، تارقىتىش ئۆلچىمى، ئىلتىماس قىلىپ تەكشۈرۈش قاتارلىق مەزمۇنلار ئايدىڭلاشتۇرۇلدى، بالا بېقىش ياردەم پۇلى تۈرى بېكىتىلگەن مەبلەغ تارقىتىش يولى ئارقىلىق تارقىتىلىدۇ، ئىلتىماس قىلمىسىمۇ بەھرىمەن بولۇش ۋە شەخسىي ئىلتىماس قىلىپ تەكشۈرۈشتىن ئۆتكەندىن كېيىن ھەر يىلى 7-ئاي، 1-ئايدا ئىككى قېتىم تارقىتىلىدۇ.
ئاشكارا ماتېرىياللاردا كۆرسىتىلىشىچە، 2023-يىلى كۆكخوت شەھىرىدە تۇغۇلغان نوپۇس 20 مىڭ بولۇپ، تۇغۇلۇش نىسبىتى ‰5.58 بولغان. بۇ يىل كىرگەندىن بۇيان، جياڭسۇ، يۈننەن، نىڭشيا قاتارلىق جايلار تۇغۇت ياردەم تولۇقلىمىسى سىياسىتىنى ئارقا-ئارقىدىن يولغا قويدى.
ئەسكەرتىش: مەنبە خەلق تورى دەپ ئەسكەرتىلگەن مەزمۇنلارنىڭ ھەممىسى خەلق تورىغا تەۋە مەزمۇنلار بولۇپ، كۆچۈرمەكچى بولسىڭىز مەنبەنى ئېنىق ئەسكەرتىڭ
