مۇخبىرنىڭ جۇڭگو دۆلەت تۆمۈريول گۇرۇھى چەكلىك شىركىتىدىن ئىگىلىشىچە، بۇ يىلنىڭ ئالدىنقى ئىككى ئېيىدا، دۆلەت تۆمۈر يولى جەمئىي 622 مىليون توننا يۈك توشۇغان بولۇپ، بۇلتۇرقى ئوخشاش مەزگىلدىكىدىن ％2 ئاشقان؛ كۈنىگە ئوتتۇرا ھېساب بىلەن 175 مىڭ ۋاگون يۈك قاچىلىنىپ، بۇلتۇرقى ئوخشاش مەزگىلدىكىدىن %3.5 ئاشقان.
توك چىقىرىش، پار بىلەن تەمىنلەشتە ئىشلىتىلىدىغان كۆمۈرنى توشۇشقا كاپالەتلىك قىلىش كۈچلۈك بولغان. 1-ئايدىن 2-ئايغىچە، دۆلەت تۆمۈر يولىدا 301 مىليون توننا كۆمۈر توشۇلغان، بۇنىڭ ئىچىدە توك چىقىرىشتا ئىشلىتىلىدىغان كۆمۈر 232 مىليون توننا بولۇپ، تۆمۈر يولغا بىۋاسىتە تەمىنلىنىدىغان ئېلېكتىر ئىستانسىلىرىدا ساقلانغان كۆمۈر بىرقەدەر يۇقىرى سەۋىيەنى ساقلىغان.
خەلق تۇرمۇشىدىكى نۇقتىلىق ماددىي ئەشيالارنى توشۇشنىڭ ئۈنۈمى كۆرۈنەرلىك بولغان. باھار بايرىمىدىن كېيىن، تۆمۈر يول تارماقلىرى ئاشلىق ۋە ئەتىيازلىق تېرىلغۇ ماددىي ئەشيالىرىنى توشۇشقا كاپالەت قىلىش سالمىقىنى زورايتىپ، يېشىل يول ئېچىپ، يۇقىرى ئۈنۈملۈك يەتكۈزۈشكە ھەقىقىي كاپالەتلىك قىلغان، 2ـئايدا ئاشلىق، خىمىيەۋى ئوغۇت، دېھقانچىلىق دورىلىرىنى توشۇش مىقدارى بۇلتۇرقى ئوخشاش مەزگىلدىكىدىن ئايرىم ـ ئايرىم ھالدا %33.2، %2.7 ئاشقان.
تۆمۈر يول ئەشيا ئوبوروتى مۇلازىمىتىنىڭ سۈپىتى سىجىل ئۆسكەن. ئەشيا ئوبوروتى ئومۇمىي ھۆددىگەرلىك مۇلازىمىتىنى زور كۈچ بىلەن تەرەققىي قىلدۇرۇپ، كۆپ مىقدارلىق يۈك تىرانسپورتىنى «تاشيولدا توشۇشنى تۆمۈر يولدا توشۇشقا ئۆزگەرتىش»كە ھەقىقىي تۈرتكە بولغان؛ دىققەتنى پۈتۈن جەمئىيەتنىڭ ئەشيا ئوبوروت تەننەرخىنى تۆۋەنلىتىشكە مەركەزلەشتۈرۈپ، تۆت سۇ تىرانسپورت كارخانىسى بىلەن ھەمكارلىشىپ، كونتېينېردا كۆپ خىل شەكىلدە ئۇلاپ توشۇش بويىچە «بىر تالون تۈزۈمى» تىرانسپورت مۇلازىمىتىنى قانات يايدۇرۇپ، توققۇز سودا بانكىسى بىلەن ھەمكارلىشىپ، تۆمۈر يول ئەشيا ئوبوروتى پۇل مۇئامىلە مۇلازىمىتىنى قانات يايدۇرغان...1-ئايدىن 2-ئايغىچە، دۆلەت تۆمۈر يولى 129 مىليون توننا كونتېينېردا توشۇش مىقدارىنى تاماملاپ، بۇلتۇرقى ئوخشاش مەزگىلدىكىدىن %14.6 ئاشۇرغان.
ئەسكەرتىش: مەنبە خەلق تورى دەپ ئەسكەرتىلگەن مەزمۇنلارنىڭ ھەممىسى خەلق تورىغا تەۋە مەزمۇنلار بولۇپ، كۆچۈرمەكچى بولسىڭىز مەنبەنى ئېنىق ئەسكەرتىڭ
