خېنەن مەملىكەت بويىچە بىرلىككە كەلگەن چوڭ بازارغا پائال سىڭىشتى ۋە ئۇنىڭغا مۇلازىمەت قىلدى (ئىشەنچنى چىڭىتىپ، ئىسلاھات، تەرەققىياتنىڭ يېڭى مەنزىلىنى ئېچىش)

مۇخبىرىمىز ۋاڭ لېۋېن، جۇ پېيشيەن

باش شۇجى شى جىنپىڭ بۇ يىلقى مەملىكەتلىك ئىككى يىغىندا مۇنداق تەكىتلىدى: «يېڭى تەرەققىيات ئىدىيەسىنى تولۇق، دەل جايىدا، ئومۇميۈزلۈك ئىزچىللاشتۇرۇپ، دۆلەت ئىچى ۋە خەلقئارانى بىرتۇتاش پىلانلاپ، شەھەر ـ يېزىلارنىڭ يۇغۇرۇلۇشى، رايونلارنىڭ ھەمتۈرتكە بولۇشىنى ياخشى تۇتۇپ، ئىشلەپچىقىرىش كۈچلىرىنىڭ ئورۇنلاشتۇرمىسىنى ئەلالاشتۇرۇپ، يۇقىرى سۈپەتلىك تەرەققىياتقا كۈچەپ تۈرتكە بولۇش كېرەك»، «ئىقتىساد چوڭ ئۆلكىلىرى دۆلەتنىڭ مۇھىم تەرەققىيات ئىستراتېگىيەسىنى ئەمەلىيلەشتۈرۈشتە تېخىمۇ زور مەسئۇلىيەتنى زىممىسىگە ئېلىشى كېرەك».

خېنەن ئىقتىساد چوڭ ئۆلكىسى بولۇش سۈپىتى بىلەن، يۇقىرى سۈپەتلىك تەرەققىياتقا تۈرتكە بولۇشقا، يۇقىرى سەۋىيەلىك ئېچىۋېتىشنى كېڭەيتىشكە كۈچىدى. 3 ـ ئاينىڭ 12 ـ كۈنى، دۆلەت تۆمۈريول گۇرۇھى جېڭجوۋ ئىدارىسىنىڭ پۇتيەن بېكىتىدە، ماشىنا ـ ئۈسكۈنىلەر، ئېلېكتىرونلۇق مەھسۇلاتلار، يېڭى ئېنېرگىيەلىك ئاپتوموبىل قاتارلىقلار لىق قاچىلانغان جۇڭگو ـ ياۋروپا نۆۋەتچى پويىزى (جېڭجوۋ) ياۋروپاغا قاراپ يول ئالدى؛ يەنە بىر تەرەپتىكى مەشغۇلات رايونىدا، گېرمانىيە، پولشا قاتارلىق جايلاردىن كەلتۈرۈلگەن قىزىل ھاراق، سۈت مەھسۇلاتلىرى، ئاپتوموبىل زاپچاسلىرى قاتارلىق ماللار يۇقىرى ئۈنۈمدە پۈتۈن مەملىكەت بازارلىرىغا بۆلۈپ تارقىتىلدى.

يۈننەننىڭ قەھۋەسى، سىچۈەن، چۇڭچىڭنىڭ لىمونى، دانىيەنىڭ پىشلاقلىرى... خېنەن ئۆلكىسى جياۋزو شەھىرىنىڭ ۋېنشيەن ناھىيەسىگە جايلاشقان داكا خەلقئارا يېمەكلىك چەكلىك شىركىتىدە، دۇنيانىڭ ھەرقايسى جايلىرىدىن كەلگەن شېكەر، سۈت، چاي، قەھۋە، مېۋە، ئاشلىق قاتارلىق خام ماتېرىياللار پىششىقلانغاندىن كېيىن، قۇرۇقلۇق، دېڭىز، ھاۋادا كۆپ خىل شەكىلدە بىرلىشىپ توشۇش ئارقىلىق، پۈتۈن يەر شارىدىكى 46 مىڭدىن ئارتۇق مىشۆ بىڭچېڭ دۇكىنىغا توشۇلىدۇ.

خېنەن ئۆلكىلىك پارتىيە كومىتېتىنىڭ شۇجىسى ليۇ نىڭ يېقىندا ئېچىلغان خېنەننىڭ مەملىكەتلىك بىرلىككە كەلگەن چوڭ بازارغا سىڭىشىش، مۇلازىمەت قىلىش يىغىنىدا مۇنداق بىلدۈردى: خېنەن ئىقتىسادنىڭ ئايلىنىشىنى راۋانلاشتۇرۇشتىن ئىبارەت بۇ تۈپ ئاساس ۋە بازار تىجارىتىنى قولايلاشتۇرۇشتىن ئىبارەت «شاھمات كۆزى»نى چىڭ تۇتۇپ، مەبلەغ سېلىش، ئىشلەپچىقىرىش، سودا، ئوبوروت، ئىستېمال قاتارلىق ھەرقايسى ھالقىلارنىڭ پۈتۈن جەريانىنى قولايلاشتۇرۇشنى زور كۈچ بىلەن ئىلگىرى سۈرۈپ، سىياسەت پايدىسى، ئىسلاھات پايدىسىنى يۇقىرى سۈپەتلىك تەرەققىياتنىڭ ئەمەلىي ئۈنۈمىگە ئايلاندۇرۇش كېرەك.

ئىقتىسادنىڭ ئايلىنىشىنى راۋانلاشتۇرۇپ، تۈگۈن ئىقتىسادى، يول ئىقتىسادىنى تەرەققىي قىلدۇرۇش، زورايتىش كېرەك. بۇ يىل 1-ئايدا، جوۋكوۋ مەركىزىي پورتى يىغىش-تارقاقلاشتۇرۇش-توشۇش تۆمۈريول مەخسۇس لىنىيەسى تۈرىدە قۇرۇلۇش باشلاندى. تۈر تاماملانغاندىن كېيىن، جوۋكوۋ مەركىزىي پورت رايونى بىلەن لوفۇ لىنىيەسى، بېيجىڭ-گۇاڭجوۋ لىنىيەسى، بېيجىڭ 9-لىنىيەسى قاتارلىق تۆمۈريول غول لىنىيەلىرىنى ئۈنۈملۈك جىپسىلاشتۇرۇش ئىشقا ئاشۇرۇلۇپ، پورت ئەتراپىدىكى كارخانىلارنىڭ تىرانسپورت ئېھتىياجى قاندۇرۇلىدۇ.

«جوۋكوۋ لىنگاڭ تەرەققىيات رايونىغا ماكانلاشقاندا، زاۋۇتقا كېرەكلىك دادۇرنى سۇ تىرانسپورتى ئارقىلىق توشۇغاندا تۆمۈريول تىرانسپورتىغا سېلىشتۇرغاندا تەخمىنەن ％30 خىراجەت تېجىلىدۇ. جوۋكوۋ يەنە خېنەندىكى بۇغداي، قوناق ئاساسلىق ئىشلەپچىقىرىلىدىغان رايون، نۇرغۇن خام ماتېرىيالنى شۇ جايدىن ئالغىلى بولىدۇ. يىخەي جيالى (جوۋكوۋ) زامانىۋى يېمەكلىك كەسىپلەر باغچىسىنىڭ باش دىرېكتور ياردەمچىسى خەن شيا مۇنداق دېدى: شىركىتىمىز يىلىغا 1 مىليون توننا كۆممىقوناق پىششىقلاپ، دەسلەپكى پىششىقلاشتىن ئىنچىكە پىششىقلاشقىچە، يەنە يۇقىرى قوشۇلما قىممەتلىك ئىنچىكە پىششىقلاشقىچە بولغان كەسىپ زەنجىرىنى شەكىللەندۈردى.

خېنەن ئۆلكىلىك تەرەققىيات ۋە ئىسلاھات كومىتېتى پارتىيە گۇرۇپپىسىنىڭ شۇجىسى، مۇدىر ما جيەن مۇنۇلارنى بىلدۈردى: «خېنەن تۆمۈريولنى كېڭەيتىپ تورلاشتۇرۇش، ئايرودۇرۇم تۈگۈنىنى كۈچەيتىپ تارماقنى كۆپەيتىش، تاشيولنى زىچلاشتۇرۇپ سۈپىتىنى ئۆستۈرۈش، سۇ تىرانسپورتىنى دەريادىن دېڭىزغا تۇتاشتۇرۇشتىن ئىبارەت <تۆت چوڭ قۇرۇلۇش> نى نۇقتىلىق يولغا قويۇپ، دۆلەت ئەشيا ئوبوروتى تۈگۈنى قۇرۇشنى تېزلەتتى.

بازار تىجارىتىنىڭ قولايلىقلىقىنى ئۆستۈرۈپ، مەملىكەت بويىچە بىرلىككە كەلگەن چوڭ بازارغا مۇلازىمەت قىلىش. جىيۈەن شەھەرلىك بازارنى نازارەت قىلىش-باشقۇرۇش ئىدارىسى كارخانىلارنىڭ «بىر ئىش» ئىسلاھاتىنى يولغا قويۇشىغا تۈرتكە بولۇپ، كۆچۈپ كىرىش، كۆچۈپ چىقىش، تىزىم ئۆزگەرتىش قاتارلىق بەش ھالقىدا «بىر كۆزنەكتە قوبۇل قىلىش، بىر توردا ئومۇميۈزلۈك بېجىرىش»نى ئىشقا ئاشۇردى، بېجىرىپ تاماملاش مۇددىتى ئۈچ كۈندىن ئون مىنۇتقا قىسقارتىلدى.

بۇ يىل، خېنەن ئۆلكىسىدىكى بازارنى نازارەت قىلىش-باشقۇرۇش تارماقلىرى مەمۇرىي قانۇن ئىجرا قىلىش ئۆلچىمى ۋە تەرتىپىنى يەنىمۇ بىرلىككە كەلتۈرۈپ، ئەركىن ئۆلچەش ھوقۇقىنى ئازايتىپ، «كىچىك خاتالىق ئۆتكۈزگەنلەرنى ئېغىر جازالاش، كۆپ تەرەپتىن جازالاش، ئوخشاشتۈردىكى دېلولارغا ئوخشاش بولمىغان جازا بېرىش» مەسىلىسىنى ئۈنۈملۈك توسىدۇ؛ «ئىككىنى ئىختىيارىي تاللاش» بويىچە نازارەت قىلىش-باشقۇرۇش بىلەن تارماق ھالقىغان ئۇنىۋېرسال نازارەت قىلىش-باشقۇرۇشنى ئۈنۈملۈك بىرلەشتۈرۈشكە تۈتكە بولۇپ، قانۇن ئىجرا قىلىشنىڭ قاتلام-دەرىجىسىنى ئازايتىدۇ...

خېنەن ئۆلكىلىك بازار نازارەت قىلىش باشقۇرۇش ئىدارىسى پارتىيە گۇرۇپپىسىنىڭ شۇجىسى ۋاڭ شىنخۇي مۇنداق دېدى: «بىز نازارەت قىلىش-باشقۇرۇش بويىچە قانۇن ئىجرا قىلىش سىياسىتىنىڭ مۇقىملىقى، ئالدىن كۆرەرلىكلىكىنى سىجىل كۈچەيتىپ، نازارەت قىلىش-باشقۇرۇشنى ھەم سالماققا، ھەم ئىللىقلىققا ئىگە قىلىمىز.

«米» خېتى شەكىللىك گاۋتيې تورى تەرەپ-تەرەپكە تۇتاشتى، «بوشلۇق يىپەك يولى» جۇڭگو بىلەن چەت ئەلنى تۇتاشتۇردى؛ بىيادى يېڭى ئېنېرگىيەلىك پۈتۈن ئاپتوموبىل بازىسى، نىڭدې دەۋر ئېنېرگىيە باتارېيەسى تۈرى ماكانلاشتى...مەملىكەت بويىچە بىرلىككە كەلگەن چوڭ بازارغا پائال سىڭىش ۋە ئۇنىڭغا مۇلازىمەت قىلىش ئارقىلىق خېنەن ئامىللار توپلاشقان «ماگنىت مەيدانى»غا، مەبلەغ سېلىپ كەسىپلەرنى گۈللەندۈرىدىغان «مۇنبەت تۇپراق»قا ئايلانماقتا.