جياڭسۇ شۈجوۋدىكى ۋونيۇشەن تېغىنىڭ يەر ئاستىدىكى 100 نەچچە مېتىر كېلىدىغان جايدا، دۇنيا بويىچە چوڭقۇر يەر ئاستى قۇرۇلۇشى ساھەسىدىكى كۆلىمى ئەڭ چوڭ يەر ئاستى تەجرىبىخانىسى − چوڭقۇر يەر ئاستى ئىلمى ۋە قۇرۇلۇشى يۈنلۇڭخۇ تەجرىبىخانىسى يېقىندا رەسمىي يوپۇق ئاچتى؛ جياڭسۇ نەنجىڭگە جايلاشقان زىجىنشەن تەجرىبىخانىسىدىن غەلىبە خەۋەرلىرى ئارقا-ئارقىدىن تارقالدى، دۇنيا بويىچە تۇنجى ئوپتىك ئېلېكتىرونلۇق يۇغۇرما ئېنىقلىق يېڭى تىپلىق ھېسابلاش تورى ئۇل ئەسلىھەسى ئىشقا كىرىشتۈرۈلدى... جياڭسۇ دۆلەت تەجرىبىخانىسى، مەملىكەت بويىچە نۇقتىلىق تەجرىبىخانا چاسا سېپى قاتارلىق پەن-تېخنىكىدا يېڭىلىق يارىتىش سۇپىسى قۇرۇلۇشىنى ئالغا سىلجىتىپ، ئىستراتېگىيەلىك يېڭىدىن گۈللەنگەن كەسىپلەر ۋە كەلگۈسى كەسىپلەرنىڭ تەرەققىياتىغا يېتەكچىلىك قىلىپ، كۈچنى مەركەزلەشتۈرۈپ دۇنياۋى كەسىپلەر پەن-تېخنىكىسىدا يېڭىلىق يارىتىشنىڭ مۇھىم مەنبەسىنى بەرپا قىلماقتا.
2023-يىلى 7-ئايدا، باش شۇجى شى جىنپىڭ جياڭسۇدا تەكشۈرۈشتە بولغاندا: «جياڭسۇنىڭ جۇڭگوچە زامانىۋىلاشتۇرۇشنى ئالغا سىلجىتىش داۋامىدا ئالدىدا مېڭىش، ئۈلگە كۆرسىتىش ئىقتىدارى بار، مەسئۇلىيىتىمۇ بار» دەپ تەكىتلىگەنىدى. بۇ يىلقى مەملىكەتلىك ئىككى يىغىندا، باش شۇجى شى جىنپىڭ جياڭسۇ ۋەكىللەر ئۆمىكىنىڭ قاراپ چىقىشىغا قاتناشقاندا، جياڭسۇنىڭ خىزمىتىنى مۇئەييەنلەشتۈردى، جياڭسۇنىڭ ئېغىر يۈكنى زىممىسىگە ئېلىش مەسئۇلىيىتىنى ياخشى ئەمەلىيلەشتۈرۈپ، تىرىشىپ يېڭى، تېخىمۇ زور نەتىجىلەرنى قولغا كەلتۈرۈشىنى ئۈمىد قىلدى.
سەمىمىي ئۈمىد جياڭسۇنى ئەمەلىيلەشتۈرۈشنى چىڭ تۇتۇپ، ئىقتىسادىي چوڭ ئۆلكىنىڭ ئېغىر ۋەزىپىنى ئۈستىگە ئېلىش مەسئۇلىيىتىنى پۇختىلاشقا ئىلھاملاندۇردى.
جياڭسۇ ئۆلكىلىك پارتىيە كومىتېتى ۋە ئۆلكىلىك ھۆكۈمەت دىققەتنى دۇنياۋى تەسىر كۈچىگە ئىگە كەسىپلەر پەن-تېخنىكىسىدا يېڭىلىق يارىتىش مەركىزى، خەلقئارا رىقابەت كۈچىگە ئىگە ئىلغار ياسىمىچىلىق بازىسى، دۇنياۋى توپلاش كۈچىگە ئىگە قوش يۆنىلىشلىك ئېچىۋېتىش تۈگۈنى قۇرۇشقا مەركەزلەشتۈرۈپ، «بىر مەركەز، بىر بازا، بىر تۈگۈن» قۇرۇلۇشىنى بىر گەۋدىلەشتۈرۈپ ئىلگىرى سۈرۈشكە ماس كۈچ چىقاردى.
رايون ئىشلەپچىقىرىش ئومۇمىي قىممىتى 500 مىليارد يۈەندىن ئاشقان ناھىيە دەرىجىلىك شەھەر جياڭيىندا بۇ يىل «جياڭيىندا پەن-تېخنىكىدا يېڭىلىق يارىتىش» قۇرۇلۇشى ئۈچ يىللىق ھەرىكىتى يەنە بىر قېتىم باشلاندى. «ئىستراتېگىيەلىك يېڭىدىن گۈللەنگەن كەسىپلەر ۋە كەلگۈسى كەسىپلەرگە تۈرتكە بولۇش <ئەڭ زور ئېشىش مىقدارى>غا ئايلاندى» دېدى جياڭيىن شەھەرلىك پارتىيە كومىتېتىنىڭ شۇجىسى شۈ فېڭ.
ياسىمىچىلىق قوشۇلما قىممىتى پۈتۈن دۇنيانىڭ تەخمىنەن ％4ىنى ئىگىلەيدىغان جياڭسۇ ئەمەلىي ئىقتىسادتا چىڭ تۇرۇش، زامانىۋى كەسىپ سىستېمىسى بەرپا قىلىشنى ئۆلكىنى قۇدرەت تاپتۇرۇشنىڭ مۇھىم نۇقتىسى قىلدى. 2024-يىلى، جياڭسۇنىڭ يۇقىرى، يېڭى تېخنىكىلىق كەسىپلىرى مەھسۇلات قىممىتىنىڭ كۆلەمدىن يۇقىرى سانائەتتە ئىگىلىگەن نىسبىتى %50تىن ئاشتى، دۆلەتلىك ئىلغار ياسىمىچىلىق توپى 14 كە كۆپىيىپ، قۇرۇلۇش ماشىنىلىرى، كېمىسازلىق-دېڭىز قۇرۇلۇشى جابدۇقلىرى، ئالىي دەرىجىلىك توقۇمىچىلىق، يورۇقلۇق ۋولت قاتارلىق كەسىپلىرى دۇنيا بويىچە «ئالدىنقى قاتار»غا كىردى.
شۈگۇڭ گۇرۇھىنىڭ باش مۇدىرى ياڭ دۇڭشېڭ تونۇشتۇرۇپ مۇنداق دېدى: «كۈچنى پەن-تېخنىكىدا يېڭىلىق يارىتىش بىلەن كەسىپتە يېڭىلىق يارىتىشنى چوڭقۇر يۇغۇرۇشقا مەركەزلەشتۈرۈپ، تېخىمۇ كۆپ ئىجادىي نەتىجىلەر ئارقىلىق مەھسۇلات، كەسىپلەر توپىنىڭ خەلقئارا رىقابەت كۈچىنى شەكىللەندۈرۈشىگە تۈرتكە بولىمىز. گۇرۇھىمىز پۈتۈن قىممەت زەنجىرى بويىچە چەت ئەلگە چىقىرىش ئەندىزىسىنى بەرپا قىلىپ، كەسىپ زەنجىرى يۇقىرى-تۆۋەن ئېقىنىنىڭ بىرلىكتە خەلقئارا بازارغا كىرىشىگە تۈرتكە بولۇۋاتىدۇ.»
جياڭسۇ قۇرۇلۇش ماشىنىلىرى، كېمىسازلىق-دېڭىز قۇرۇلۇشى جابدۇقلىرى قاتارلىق كەسىپلەر توپىنىڭ خەلقئارا رىقابەت كۈچىنى سىجىل ئۆستۈرۈپ، يورۇقلۇق ۋولت، ئالاھىدە پولات-تۆمۈر قاتارلىق دۆلەتلىك ئىلغار ياسىمىچىلىق توپلىرىنىڭ يۇقىرى سۈپەتلىك تەرەققىيات ھەرىكەت لايىھەسىنى تۈزۈپ، ئۇچۇر تېخنىكىسى، يېڭى ماتېرىيال قاتارلىق ئىستراتېگىيەلىك يېڭىدىن گۈللىنىۋاتقان كەسىپلەرنى يېتىشتۈرۈش قۇرۇلۇشىنى يولغا قويۇپ، تېخنىكا ئالدىنقى سېپىگە توغرىلىنىپ، كارخانىلارنىڭ مۇھىم تېخنىكا ئېھتىياجىنى توپلاپ، پەن-تېخنىكىدا ئۆتكەلگە ھۇجۇم قىلىش تۈرىدىن 60نى، ئالدىنقى قاتاردىكى تېخنىكا تەتقىقات تۈرىدىن 80نى ئورۇنلاشتۇردى.
جياڭسۇ ئۆلكىلىك پارتىيە كومىتېتىنىڭ شۇجىسى شىن چاڭشىڭ مۇنداق دېدى: «يېڭىلىق يارىتىش قۇۋۋەت، ياسىمىچىلىق تىرەك، ئېچىۋېتىش تەرەققىيات بوشلۇقى، بۇ ئۈچى بىر-بىرىنى تىرەك قىلىدۇ، جەزمەن ماس ئالغا سىلجىشى كېرەك.» يۇقىرى ئۆلچەملىك خەلقئارا ئىقتىساد-سودا قائىدىسىگە تەشەببۇسكارلىق بىلەن توغرىلىنىپ، كارخانىلارنى دۇنياۋى كەسىپ ئىش تەقسىماتى ھەمكارلىقىغا قاتنىشىشقا رىغبەتلەندۈرۈپ، پورت بىلەن خەلقئارا ئەشيا ئوبوروت يولى، چېگرا سىرتىدىكى باغچە رايونى، ئەركىن سودا سىناق رايونى، تەرەققىيات رايونى قاتارلىق ئېچىۋېتىش ۋاسىتىلىرى قۇرۇلۇشىغا يۇقىرى سۈپەتتە تۈرتكە بولۇش كېرەك.
ليەنيۈنگاڭ پورتىنىڭ 300 مىڭ تونناژلىق سۇ يولىنى ئۆزگەرتىش-كېڭەيتىش قۇرۇلۇشىنىڭ يانتۇلۇقىنى كېڭەيتىش قۇرۇلۇشى نەق مەيدانىغا كىرگەندە، چوڭ تىپتىكى تۆت سۈمۈرۈش پاراخوتى بىرلا ۋاقىتتا سۇ يولىنى راۋانلاشتۇرۇش قۇرۇلۇشى قىلىۋاتاتتى. جياڭسۇ خەلقئارا ئەشيا ئوبوروت يولى قۇرۇلۇشىنى ئۈزلۈكسىز ئالغا سىلجىتىپ، شەرقتە ليەنيۈنگاڭ پورتىنى باشلىنىش نۇقتىسى قىلغان يېڭى ئاسىيا-ياۋروپا قۇرۇقلۇق-دېڭىز بىرلەشمە تىرانسپورتىنىڭ دېڭىزغا چىقىش ئېغىزىنى كېڭەيتىپ، بىخەتەر، تېجەشلىك دېڭىز يولى بەرپا قىلدى؛ غەربتە يېڭى ئاسىيا-ياۋروپا قۇرۇقلۇق-دېڭىز بىرلەشمە تىرانسپورت يولىنىڭ ئىقتىدارىنى ئۆستۈرۈپ، جۇڭگو-ياۋروپا نۆۋەتچى پويىزىنىڭ «تورنى تولۇقلاپ سۈرئىتىنى تېزلىتىش» ۋە توپلاش، تارقاقلاشتۇرۇش، توشۇش سىستېمىسى قۇرۇلۇشىنى تېزلەتتى.
جياڭسۇ ئۆلكىلىك سودا ئىشلىرى نازارىتىنىڭ نازىرى سى يۇڭ تونۇشتۇرۇپ مۇنداق دېدى: «جياڭسۇدا يىراق ئوكيانغا يېقىن تاشقى سودا لىنىيەسىدىن 84ى بار بولۇپ، %65 مۇھىم سودا دۆلىتى ۋە رايونىنى قاپلىغان، ياۋروپا، ئوتتۇرا ئاسىيا، شەرقىي جەنۇبىي ئاسىيا قاتارلىق رايونلارغا مۇقىم قاتنايدىغان 25 لىنىيە بار. جياڭسۇ <بىر بەلباغ، بىر يول>نى ئورتاق قۇرۇش ئىقتىساد-سودا ھەمكارلىقىنى كۈچەپ ئالغا سىلجىتىپ، نۇقتىلىق تاشقى مەبلەغ كەسىپلىرى بويىچە سودىگەر چاقىرىش خەرىتىسىنى تۈزۈپ، تاشقى مەبلەغنى جەلپ قىلىش، تاشقى سودىنى كېڭەيتىش يېڭى تەدبىرلىرىدە سىجىل يېڭىلىق يارىتىپ، تېخىمۇ يۇقىرى سەۋىيەلىك ئوچۇق ئىقتىسادنىڭ يېڭى ئەۋزەللىكىنى ياراتماقتا.»
ئەسكەرتىش: مەنبە خەلق تورى دەپ ئەسكەرتىلگەن مەزمۇنلارنىڭ ھەممىسى خەلق تورىغا تەۋە مەزمۇنلار بولۇپ، كۆچۈرمەكچى بولسىڭىز مەنبەنى ئېنىق ئەسكەرتىڭ
