جۇڭگو دىپلوماتىيە مىنىستىرلىقىنىڭ باياناتچىسى ماۋ نىڭ 3-ئاينىڭ 12-كۈنى قەرەللىك مۇخبىرلارنى كۈتۈۋېلىش يىغىنىغا رىياسەتچىلىك قىلدى.
بىر مۇخبىر مۇنداق سورىدى: خەۋەرلەرگە قارىغاندا، 3-ئاينىڭ 11-كۈنى پاكىستاننىڭ بەلۇجىستان ئۆلكىسىدە تەخمىنەن 450 يولۇچى ئولتۇرغان يولۇچىلار پويىزى بۇ ئۆلكىنىڭ سىبى رايونىدىن ئۆتۈۋاتقاندا تېررورچىلار تەرىپىدىن بۇلاپ كېتىلگەن، «بەلۇجىستان ئازادلىق قوراللىق كۈچلىرى» بۇ ۋەقەگە مەسئۇل بولىدىغانلىقىنى جاكارلىغان. پاكىستان ھەربىي-ساقچىلىرى تۇتقۇن قىلىنغان يولۇچىلارنى قۇتقۇزۇش ھەرىكىتىنى قانات يايدۇرۇپ، 104 يولۇچىنى مۇۋەپپەقىيەتلىك قۇتقۇزغان ھەمدە ئاز دېگەندە 16 تېررورچىنى ئېتىپ ئۆلتۈرگەن. پاكىستان زۇڭلىسى شاباز ھۇجۇمنى ئەيىبلەپ، قوراللىق ئۇنسۇرلارنى چېكىندۈرۈۋاتىمىز دېدى. جۇڭگو تەرەپ بۇنىڭغا قانداق باھا بېرىدۇ؟
ماۋ نىڭ مۇنداق دېدى: بىز ئالاقىدار خەۋەرلەرگە دىققەت قىلدۇق، بۇ قېتىمقى تېررورلۇق ھۇجۇمى ۋەقەسىنى قاتتىق ئەيىبلەيمىز. جۇڭگو تەرەپ ھەرقانداق شەكىلدىكى تېررورلۇققا قەتئىي قارشى تۇرىدۇ، پاكىستان تەرەپنىڭ تېررورلۇققا قارشى تۇرۇش ھەرىكىتىنى ئىلگىرى سۈرۈشىنى، جەمئىيەتنىڭ ئىتتىپاقلىقى ۋە مۇقىملىقى، خەلق ئاممىسىنىڭ بىخەتەرلىكىنى قوغدىشىنى داۋاملىق قەتئىي قوللايدۇ. جۇڭگو تەرەپ پاكىستان تەرەپ بىلەن تېررورلۇققا قارشى تۇرۇش بىخەتەرلىك ھەمكارلىقىنى يەنىمۇ كۈچەيتىپ، رايون تىنچلىقى، بىخەتەرلىكى ۋە مۇقىملىقىنى بىرلىكتە قوغداشنى خالايدۇ.
ئەسكەرتىش: مەنبە خەلق تورى دەپ ئەسكەرتىلگەن مەزمۇنلارنىڭ ھەممىسى خەلق تورىغا تەۋە مەزمۇنلار بولۇپ، كۆچۈرمەكچى بولسىڭىز مەنبەنى ئېنىق ئەسكەرتىڭ
