خەلقنىڭ ساداسىغا قۇلاق سېلىندى، خەلق رايى قوبۇل قىلىندى، خەلقنىڭ ئەقىل ـ پاراسىتى توپلاندى، خەلقنىڭ كۈچى مۇجەسسەملەندى. 3 ـ ئاينىڭ 11 ـ كۈنى، 14 ـ نۆۋەتلىك مەملىكەتلىك خەلق قۇرۇلتىيى 3 ـ يىغىنى تۈرلۈك قارالمىلارنى مۇۋەپپەقىيەتلىك تاماملاپ، بېيجىڭدا غەلىبىلىك يېپىلدى. يىغىنغا قاتناشقان ۋەكىللەر كۆپچىلىكنىڭ ئەقىل ـ پاراسىتىنى جارى قىلدۇردى، يىغىن ئىستىلى دۇرۇس، كەيپىيات توغرا بولدى، يىغىن نەتىجىلىرى مول بولدى، بۇ، پارتىيەنىڭ تەشەببۇسى بىلەن خەلقنىڭ ئىرادىسىنىڭ بىرلىكىنى تولۇق نامايان قىلدى. بىز يىغىننىڭ مۇۋەپپەقىيەتلىك بولغانلىقىنى قىزغىن تەبرىكلەيمىز!
«14 ـ بەش يىل»لىق يىرىك پىلان تاماملىنىدىغان يىلدىكى بۇ قېتىمقى يىغىندا ئورتاق تونۇش مۇجەسسەملەندى، ۋەزىپىلەر ئايدىڭلاشتۇرۇلدى، ئىشەنچ چىڭىتىلدى، بۇ، قەلب ۋە كۈچنى مۇجەسسەملىگەن، ھەقىقىي تۇتۇپ ئەمەلىي ئىشلىگەن، ئىتتىپاقلىشىپ جاسارەت بىلەن ئىلگىرىلىگەن بىر قېتىملىق يىغىن بولدى. يىغىندا ئۆتكەن بىر يىلدا يولداش شى جىنپىڭ يادرولۇقىدىكى پارتىيە مەركىزىي كومىتېتىنىڭ كۈچلۈك رەھبەرلىكىدە، دۆلىتىمىزنىڭ ئىنتايىن قالتىس تەرەققىيات مۇساپىسىنى بېسىپ ئۆتۈپ، كىشىنى ئىلھاملاندۇرىدىغان نەتىجىلەرنى قولغا كەلتۈرۈپ، جۇڭگوچە زامانىۋىلاشتۇرۇشتا يېڭى پۇختا قەدەم تاشلىغانلىقىغا يۈكسەك باھا بېرىلدى. يىغىندا ھۆكۈمەت خىزمىتىدىن دوكلات ۋە باشقا تۈرلۈك مۇھىم دوكلاتلار قاراپ چىقىلدى ھەم تەستىقلاندى، پىلان ۋە خامچوت تەكشۈرۈپ تەستىقلاندى. ۋەكىللەر: ھۆكۈمەت خىزمىتىدىن دوكلاتتا شى جىنپىڭ يېڭى دەۋر جۇڭگوچە سوتسىيالىزم ئىدىيەسى ئومۇميۈزلۈك ئىزچىللاشتۇرۇلۇپ، نەتىجىلەر ھەقىقەتنى ئەمەلىيەتتىن ئىزدىگەن ئاساستا خۇلاسىلەنگەن، ۋەزىيەت ئوبيېكتىپ، دەل جايىدا تەھلىل قىلىنغان، نىشان ئىلمىي، مۇۋاپىق بېكىتىلگەن، ھەقىقىي، يولغا قويۇشقا بولىدىغان تەدبىرلەر ئوتتۇرىغا قويۇلغان بولۇپ، باش تېمىسى روشەن، مەسئۇلىيەتنى زىممىگە ئېلىپ ئالغا ئىلگىرىلەيدىغان، ئىتتىپاقلاشقان، غەيرەتنى ئۇرغۇتىدىغان ياخشى دوكلات بوپتۇ، دەپ قارىدى. يىغىندا ۋەكىللەر قانۇنىغا تۈزىتىش كىرگۈزۈش توغرىسىدىكى قارار قاراپ چىقىلىپ ماقۇللاندى، يېڭى دەۋردىكى خەلق قۇرۇلتىيى ۋەكىللىرى خىزمىتىنىڭ ئەمەلىيەت تەجرىبىلىرى ۋە يېڭىلىق يارىتىش نەتىجىلىرى چوڭقۇر خۇلاسىلەندى، بۇ، خەلق قۇرۇلتىيى ۋەكىللىرى خىزمىتىنىڭ تۈزۈملىشىش، قېلىپلىشىش، تەرتىپلىشىش سەۋىيەسىنى ئۆستۈرۈشتە مۇھىم ئەھمىيەتكە ئىگە. يىغىندا مەملىكەتلىك خەلق قۇرۇلتىيى دائىمىي كومىتېتىنىڭ ئۆتكەن بىر يىلدا مەسئۇلىيىتىنى قانۇن بويىچە ئادا قىلىپ، مەسئۇلىيىتىنى زىممىگە ئېلىپ تولۇق ئادا قىلىپ، تۈرلۈك خىزمەتلەردە يېڭى ئىلگىرىلەش ۋە نەتىجىلەرنى قولغا كەلتۈرگەنلىكى تولۇق مۇئەييەنلەشتۈرۈلدى. يىغىننىڭ مۇۋەپپەقىيەتلىك بولۇشى پۈتۈن مەملىكەتتىكى ھەر مىللەت خەلقنى داۋاملىق كۈرەش قىلىپ، باتۇرلۇق بىلەن ئالغا ئىلگىرىلەپ، 2025 ـ يىلىدىكى تۈرلۈك خىزمەتلەرنى پۇختا ياخشى ئىشلەپ، يېڭى مۇساپىدە يېڭى مەسئۇلىيەتنى زىممىگە ئېلىپ، يېڭى نەتىجىلەرنى نامايان قىلىشقا ئىلھاملاندۇردى.
ھازىر، دۆلىتىمىزنىڭ تەرەققىياتىدا ھەم تاشقى مۇھىت ئېنىقسىز بولۇش خىرىسى مەۋجۇت، شۇنداقلا ئۇ كونا ـ يېڭى قۇۋۋەتنىڭ ئالمىشىش بېسىمىغا دۇچ كەلمەكتە. «14 ـ بەش يىل»لىق يىرىك پىلاندىكى نىشان ـ ۋەزىپىلەرنى يۇقىرى سۈپەتتە تاماملاپ، «15 ـ بەش يىل»نى ياخشى باشلاشنى ئىشقا ئاشۇرۇشقا پۇختا ئاساس سېلىشتا، ۋەزىپە مۈشكۈل، مەسئۇلىيەت زور. ۋەزىيەت قانچە مۇرەككەپ، كەسكىن بولغانسېرى، ئىدىيە ۋە ھەرىكەتنى پارتىيە مەركىزىي كومىتېتىنىڭ تەدبىر ـ ئورۇنلاشتۇرمىلىرىغا شۇنچە بىرلىككە كەلتۈرۈپ، بوشىشىپ قالماي نىشاننى چىڭ كۆزلەپ، دادىل بۆسۈش ھاسىل قىلىپ، دادىل ئىشلەپ، ئەمەلىي ئىشلەپ، يىغىن روھىنى ئىسلاھاتنىڭ ئەمەلىي ئۈنۈمىگە، تەرەققىيات ئەمەلىي نەتىجىسىگە ئايلاندۇرۇش كېرەك.
بوران ـ چاپقۇنلاردا چېنىقىش داۋامىدا ئۆسۈپ يېتىلىپ، سىناقلارنى باشتىن كەچۈرۈش داۋامىدا قۇدرەت تېپىپ، مۇقەررەر غەلىبە قىلىش ئىشەنچىمىزنى تېخىمۇ چىڭىتتۇق. ئۆتكەن بىر يىلدا، قاتمۇقات قىيىنچىلىق، خىرىسقا يۈزلىنىپ، دۆلىتىمىزنىڭ ئىقتىساد ئومۇمىي مىقدارى تۇنجى قېتىم 130 تىرىليون يۈەندىن بۆسۈپ ئۆتۈپ، ئېشىش سۈرئىتى دۇنيادىكى ئاساسلىق ئىقتىسادىي گەۋدىلەر ئىچىدە ئالدىنقى قاتاردا تۇردى. بۇ، دۆلىتىمىز تەرەققىياتىنىڭ كۆلەم ئەۋزەللىكى، بازار ئەۋزەللىكى، ئىختىساسلىقلار ئەۋزەللىكى، يېڭىلىق يارىتىش ئەۋزەللىكىنى تولۇق نامايان قىلدى، پارتىيە مەركىزىي كومىتېتىنىڭ مەركەزلىك بىرتۇتاش رەھبەرلىكىنىڭ سىياسىي ئەۋزەللىكى ۋە جۇڭگوچە سوتسىيالىزمنىڭ تۈزۈم ئەۋزەللىكىنى تېخىمۇ گەۋدىلىك نامايان قىلدى. كەلگۈسىگە يۈزلەنگەندە، پۇرسەت، ۋەزىيەت، ھەققانىيەت بىز تەرەپتە. ئېتىقاد، ئىشەنچنى چىڭىتىپ، ئىستراتېگىيەلىك ئىرادىنى ساقلاپ، زېھىن ۋە كۈچنى مەركەزلەشتۈرۈپ ئۆز ئىشىمىزنى ياخشى قىلساقلا، چوقۇم داۋانلاردىن ئېشىپ، جىلغىلاردىن ھالقىپ ئۆتەلەيمىز. خەلق قۇرۇلتىيى تۈزۈمى دۆلەتنىڭ تەرەققىياتى، خەلقنىڭ بەختى، مىللەتنىڭ گۈللىنىشىگە تۈرتكە بولۇش مۇساپىسىدە غايەت زور سىياسىي ئەۋزەللىكى ۋە تەشكىلىي ئۈنۈمىنى نامايان قىلدى. تۈزۈم ئىشەنچىنى يەنىمۇ چىڭىتىپ، خەلق قۇرۇلتىيى تۈزۈمىدە ياخشى چىڭ تۇرۇپ، ئۇنى ياخشى مۇكەممەللەشتۈرۈپ، ياخشى يۈرۈشتۈرگەندىلا، يېڭى دەۋر، يېڭى مۇساپىدىكى پارتىيە ۋە خەلقنىڭ كۈرەش نىشانىنى ئىشقا ئاشۇرۇشنى كۈچلۈك تۈزۈم كاپالىتى بىلەن تەمىنلىگىلى بولىدۇ.
ئەمەلىي ئىشلىگەندىلا دۆلەتنى گۈللەندۈرگىلى بولىدۇ، كۈرەش قىلغاندىلا دۆلەتنى قۇدرەت تاپتۇرغىلى بولىدۇ. ئولىمپىك ئەزىمەتلىرىنىڭ ئۇزاق تاۋلىنىپ، بىردىنلا كىشىلەرنى ھەيران قالدۇرۇشىدىن تۆھپىكار نەمۇنىچىلارنىڭ يىل بويى چىڭ تۇرۇپ قالتىس ئىشلارنى ۋۇجۇدقا چىقىرىشىغىچە، يۈز مىليونلىغان دېھقاننىڭ تىرىشىپ ئەجىر سىڭدۈرۈپ ئاشلىق ئىشلەپچىقىرىشىدا «ئۇدا 20 يىل مول ھوسۇل ئېلىش»نى ئىشقا ئاشۇرۇشىدىن پۇقراۋى كارخانىچىلارنىڭ جاپاغا چىداپ ئىگىلىك تىكلەپ دۇنيا ماركىسىنى يارىتىشىغىچە بولغان ئەمەلىيەت شۇنى جانلىق چۈشەندۈرۈپ بەردىكى، ئارزۇنى ئىشقا ئاشۇرۇشتا ئۇدۇل يول يوق، پەقەت ئەمەلىي ئىشلەشلا بار. «14 ـ بەش يىل»دا ھەل قىلغۇچ غەلىبە قىلىشتا، بىز «ئىش ۋۇجۇدقا چىقمىغۇچە بەل قويۇۋەتمەسلىك»تەك سەگەكلىكنى ساقلاپ، «قىيىنچىلىق، جاپا ـ مۇشەققەتنى يېڭىپ، ئەڭ ئېگىز چوققىغا ئۆرلەش»تەك ئىرادىنى تاۋلاپ، مەسئۇلىيەتنى دادىل زىممىمىزگە ئېلىپ، نەتىجە يارىتىشقا ماھىر بولۇپ، پۈتۈن يىللىق ئىقتىساد، جەمئىيەت تەرەققىياتىدىكى نىشان ـ ۋەزىپىلەرنى تىرىشىپ ئورۇندىشىمىز كېرەك. مەملىكەتلىك خەلق قۇرۇلتىيى ھەم ئۇنىڭ دائىمىي كومىتېتى پارتىيە ۋە دۆلەت خىزمىتى ئومۇمىيىتىنى زىچ چۆرىدەپ، ئاساسىي قانۇن ۋە قانۇنلاردا يۈكلەنگەن مەسئۇلىيىتىنى ئەستايىدىل ئادا قىلىپ، قانۇننى ئىلمىي چىقىرىش، قانۇننى دېموكراتىك چىقىرىش، قانۇننى قانۇن بويىچە چىقىرىشنى چوڭقۇر ئالغا سىلجىتىپ، نازارەت قىلىش خىزمىتىنىڭ قاراتمىلىقى ۋە ئەمەلىي ئۈنۈمدارلىقىنى يەنىمۇ كۈچەيتكەندىلا، چوقۇم يۇقىرى سۈپەتلىك تەرەققىياتنى پۇختا قانۇنچىللىق كاپالىتى بىلەن تەمىنلىيەلەيدۇ.
باش شۇجى شى جىنپىڭ چوڭقۇر قىلىپ مۇنداق كۆرسەتتى: «جۇڭگوچە زامانىۋىلاشتۇرۇش يېڭى مۇساپىسىدە، ھەربىر ئادەم باش رولچى، ھەربىر ئۈلۈش ئەجىر ناھايىتى قىممەتلىك، ھەربىر دەستە نۇر يارقىن چاقنايدۇ.» ئالغا ئىلگىرىلەش يولىدا، جەزمەن خەلقنى ھەممىدىن ئەلا بىلىشتە چىڭ تۇرۇپ، خەلقنىڭ ئاساسىي گەۋدىلىك ئورنى ۋە تۇنجى ئىجادكارلىق روھىغا تولۇق ھۆرمەت قىلىپ، خەلق ئۆز ئىشىغا ئۆزى ئىگە بولىدىغان تۈزۈم سىستېمىسىنى ئۈزلۈكسىز تاكامۇللاشتۇرۇپ، يۈز مىليونلىغان خەلقنىڭ ئاكتىپلىقى، تەشەببۇسكارلىقى، ئىجادچانلىقىنى ئۇرغۇتۇش كېرەك. خەلق قۇرۇلتىيى تۈزۈمىنىڭ پۈتۈن جەريانلىق خەلق دېموكراتىيەسىنى ئەمەلدە كۆرسىتىش، خەلق ئۆز ئىشىغا ئۆزى ئىگە بولۇشقا كاپالەتلىك قىلىشتىكى روشەن ئەۋزەللىكىنى تولۇق جارى قىلدۇرۇپ، خەلق ئاممىسىنىڭ پىكىر ۋە تەكلىپلىرىنى كۆڭۈل قويۇپ ئاڭلاپ، خەلق ئاممىسى بىلەن بولغان قويۇق ئالاقىنى ساقلاپ، ئاڭلىق ھالدا خەلقتىن ئەقىل سورىغاندا، خەلقتىن ھال ـ ئەھۋال سورىغاندا، مۇقەررەركى، پۈتۈن خەلقنىڭ كۈچىنى جۇڭگوچە زامانىۋىلاشتۇرۇشنى ئالغا سىلجىتىشقا تېخىمۇ ئۈنۈملۈك مۇجەسسەملىگىلى بولىدۇ.
بىر مەقسەتتە ئىتتىپاقلىشىپ تەرەققىياتنى كۆزلەپ، غەيرەت ـ شىجائەتكە تولۇپ كەلگۈسىگە يۈزلىنىش. «14 ـ بەش يىل» تاماملىنىدىغان يىلدا، كۆزلىمە نىشاننى ئىشقا ئاشۇرۇشتا ۋاقىت قىس، ۋەزىپە ئېغىر، تەلەپ يۇقىرى، جەزمەن ۋاقىت ساقلاپ تۇرمايدۇ دەيدىغان روھ، مىنۇت ـ سېكۇنتنى قولدىن بەرمەيدىغان ھەرىكەت ئارقىلىق ئەمەلىيلەشتۈرۈشنى چىڭ تۇتۇش كېرەك. ۋاقىت ساقلاپ تۇرمايدۇ، تارىخ ساقلاپ تۇرمايدۇ. بىز يولداش شى جىنپىڭ يادرولۇقىدىكى پارتىيە مەركىزىي كومىتېتىنىڭ ئەتراپىغا تېخىمۇ زىچ ئۇيۇشۇپ، شى جىنپىڭ يېڭى دەۋر جۇڭگوچە سوتسىيالىزم ئىدىيەسىنى ئومۇميۈزلۈك ئىزچىللاشتۇرۇپ، «ئىككىنى تىكلەش»نىڭ ھەل قىلغۇچ ئەھمىيىتىنى چوڭقۇر ئۆزلەشتۈرۈپ، «تۆت ئاڭ»نى كۈچەيتىپ، «تۆت ئىشەنچ»نى چىڭىتىپ، «ئىككىنى قوغداش»نى ئىشقا ئاشۇرۇپ، ئىتتىپاقلىشىپ كۈرەش قىلىپ، قەتئىي ئىرادە بىلەن ئىلگىرىلەپ، قەدەمدە بىر ئىز قالدۇرۇپ جۇڭگوچە زامانىۋىلاشتۇرۇشنىڭ ئۇلۇغۋار پىلانىنى گۈزەل رېئاللىققا ئايلاندۇرايلى.
ئەسكەرتىش: مەنبە خەلق تورى دەپ ئەسكەرتىلگەن مەزمۇنلارنىڭ ھەممىسى خەلق تورىغا تەۋە مەزمۇنلار بولۇپ، كۆچۈرمەكچى بولسىڭىز مەنبەنى ئېنىق ئەسكەرتىڭ
