ئورتاق تونۇشنى كەڭ دائىرىدە مۇجەسسەملەپ ئۇلۇغ ئىشلارنى ۋۇجۇدقا چىقىرىش، بىر نىيەت، بىر مەقسەتتە بولۇپ مەسئۇلىيەتنى زىممىگە ئېلىشنى نامايان قىلىش. 3 - ئاينىڭ 10 - كۈنى، مەملىكەتلىك سىياسىي كېڭەش 14 - نۆۋەتلىك كومىتېتى 3 - يىغىنى تۈرلۈك قارالمىلارنى مۇۋەپپەقىيەتلىك تاماملاپ، بېيجىڭدا غەلىبىلىك يېپىلدى. بىز يىغىننىڭ مۇۋەپپەقىيەتلىك بولغانلىقىنى قىزغىن تەبرىكلەيمىز!
بۇ، قەلب ۋە كۈچ مۇجەسسەملەنگەن، ھەقىقىي تۇتۇپ ئەمەلىي ئىشلەنگەن، ئىتتىپاقلىشىپ جاسارەت بىلەن ئىلگىرىلىگەن بىر قېتىملىق يىغىن بولدى. يىغىن مەزگىلىدە، جۇڭگو كوممۇنىستىك پارتىيەسى مەركىزىي كومىتېتىنىڭ باش شۇجىسى، دۆلەت رەئىسى، مەركىزىي ھەربىي كومىتېتنىڭ رەئىسى شى جىنپىڭ قاتارلىق پارتىيە ۋە دۆلەتنىڭ رەھبىرىي يولداشلىرى يىغىننىڭ ئېچىلىش يىغىنى ۋە يېپىلىش يىغىنىغا قاتناشتى، يىغىنغا قاتناشقان ئەزالارنى يوقلىدى ھەم بىرلەشمە گۇرۇپپا مۇزاكىرىسىگە قاتنىشىپ، ئەزالار بىلەن دۆلەت ئىشلىرىنى بىرلىكتە كېڭەشتى. كەڭ سىياسىي كېڭەش ئەزالىرى مەملىكەتلىك سىياسىي كېڭەش دائىمىي كومىتېتى خىزمىتىدىن دوكلات ۋە تەكلىپ خىزمىتى ئەھۋالىدىن دوكلاتنى ئاڭلاپ ئۆتتى ۋە قاراپ چىقتى، 14 - نۆۋەتلىك مەملىكەتلىك خەلق قۇرۇلتىيى 3 - يىغىنىغا سىرتتىن قاتنىشىپ، ھۆكۈمەت خىزمىتىدىن دوكلات ھەمدە باشقا ئالاقىدار دوكلاتلارنى ئاڭلاپ ئۆتتى ھەم مۇزاكىرە قىلدى، چوڭقۇر كېڭىشىپ مۇزاكىرە قىلىپ، پائال تۈردە ھاكىمىيەت ئىشلىرىغا مەسلىھەت ۋە تەكلىپ بېرىپ، ھاكىمىيەت ئىشلىرىنى مۇھاكىمە قىلىشتا مول نەتىجىلەرنى قولغا كەلتۈردى. «14 - بەش يىل»لىق يىرىك پىلان تاماملىنىدىغان يىلدا، يىغىن ئاكتىپ ئېنېرگىيەنى مۇجەسسەملەپ، كۆتۈرەڭگۈ، جۇشقۇن روھنى ئۇرغۇتۇپ، دۆلىتىمىزنىڭ پۈتۈن جەريانلىق خەلق دېموكراتىيەسىنىڭ تۈزۈم ئەۋزەللىكى ۋە تولۇپ تاشقان ھاياتىي كۈچىنى تولۇق نامايان قىلدى.
جۇڭگوچە زامانىۋىلاشتۇرۇش ئومۇمىي خەلقنىڭ ئورتاق ئىشى، بۇنىڭغا بارلىق جۇڭخۇا پەرزەنتلىرىنىڭ ئورتاق ئارزۇسى يۈكلەنگەن، نەچچە ئەۋلاد كىشىلەرنىڭ ئورتاق كۈرەش قىلىشى مۇجەسسەملەنگەن. ھازىر قۇدرەتلىك دۆلەت قۇرۇشنىڭ ھەيۋەتلىك، گۈزەل مەنزىرىسى بارلىققا كەلدى ھەم چەكسىز پارلاق ئىستىقبالى نامايان بولدى، جۇڭخۇا مىللىتى توسۇۋالغۇسىز قەدەم بىلەن ئۇلۇغ گۈللىنىشكە قاراپ ئاتلانماقتا. نىشانغا قانچە يېقىنلاشقانسېرى، ئىستراتېگىيەلىك ئىرادىنى شۇنچە ساقلاپ، قۇدىرەتلىك بىرىكمە كۈچنى مۇجەسسەملەپ، پۈتكۈل جۇڭخۇا پەرزەنتلىرىنى بىرلىكتە ئويلاش، بىرلىكتە ئىشلەشكە سەپەرۋەر قىلىش كېرەك. جۇڭگوچە سوتسىيالىزمدا چىڭ تۇرۇش ۋە ئۇنى راۋاجلاندۇرۇش ئورتاق ئىدىيەۋى - سىياسىي ئاساسنى مۇستەھكەملەشتىكى ئاساسلىق ئوق، شى جىنپىڭ يېڭى دەۋر جۇڭگوچە سوتسىيالىزم ئىدىيەسى سىياسىي كېڭەش خىزمىتىگە بىرتۇتاش يېتەكچىلىك قىلىدىغان ئومۇمىي پىروگرامما، جۇڭگو كوممۇنىستىك پارتىيەسىنىڭ رەھبەرلىكىدە چىڭ تۇرۇش خەلق سىياسىي مەسلىھەت كېڭىشى ئىشلىرىنىڭ تەرەققىي قىلىپ ئىلگىرىلىشىدىكى تۈپ كاپالەت. سىياسىي يۈكسەكلىكنى ئۆستۈرۈپ، خاراكتېرى، ئورۇن بېكىتمىسىنى مەھكەم ئىگىلەپ، پارتىيە رەھبەرلىكى، بىرلىك سەپ، كېڭىشىش دېموكراتىيەسىنى ئورگانىك بىرلەشتۈرۈشتە چىڭ تۇرۇپ، جۇڭگو كوممۇنىستىك پارتىيەسى مەركىزىي كومىتېتىنىڭ تەدبىر - ئورۇنلاشتۇرمىلىرى ۋە خەلق سىياسىي مەسلىھەت كېڭىشى خىزمىتىگە قويغان تەلەپلىرىنى ئەمەلىيلەشتۈرۈش، مەملىكەت ئىچى ۋە سىرتىدىكى جۇڭخۇا پەرزەنتلىرىنىڭ ئەقىل - پاراسىتى ۋە كۈچىنى مۇجەسسەملەشتىن ئىبارەت سىياسىي مەسئۇلىيەتنى ھەقىقىي زىممىگە ئالغاندىلا، خەلق سىياسىي مەسلىھەت كېڭىشى چوقۇم جۇڭگوچە زامانىۋىلاشتۇرۇشنى ئالغا سىلجىتىش ئۈچۈن كەڭ دائىرىدە قەلبلەرنى مۇجەسسەملىيەلەيدۇ، ئورتاق تونۇشنى مۇجەسسەملىيەلەيدۇ، ئەقىل - پاراسەتنى مۇجەسسەملىيەلەيدۇ، كۈچ - قۇۋۋەتنى مۇجەسسەملىيەلەيدۇ، پارتىيە ۋە دۆلەت ئىشلىرىنىڭ تەرەققىياتى ئۈچۈن يېڭى تېخىمۇ زور تۆھپە قوشالايدۇ.
ئىتتىپاقلىق − كۈچ، ئىتتىپاقلاشقاندىلا غەلىبە قىلغىلى بولىدۇ. بىز ئالغا سىلجىتىۋاتقان قۇدرەتلىك دۆلەت قۇرۇش، مىللەتنى گۈللەندۈرۈش ئۇلۇغ ئىشلىرى تىپتىنچ مۇھىتتا مۇۋەپپەقىيەت قازىنىش ئەمەس، گۈل دەستە ۋە ئالقىش سادالىرى ئىچىدە مۇۋەپپەقىيەتتىن خۇشال بەھرىمەن بولۇش ئەمەس، ئالغا ئىلگىرىلەش يولىمىزدا مۇقەررەر ھالدا جاپا - مۇشەققەت، خەۋپ - خەتەر، بوران - چاپقۇن، ھەتتا دەھشەتلىك دولقۇن بولىدۇ. ئىتتىپاقلىشىپ كۈرەش قىلىش جۇڭگو خەلقىنىڭ تارىخىي ئۇلۇغ ئىشلارنى ۋۇجۇدقا چىقىرىشىدىكى مۇقەررەر يول. پارتىيە رەھبەرلىكىدە بىر مەقسەتتە ئويلاپ، بىر مەقسەتتە كۈچ چىقىرىپ، ئەڭ چوڭ مەركەزداش چەمبەرنى ياخشى سىزىپ چىققاندىلا، ۋۇجۇدقا چىقارغىلى بولمايدىغان ئىش يوق، يەڭگىلى بولمايدىغان قىيىنچىلىق يوق. ئەڭ كەڭ ۋەتەنپەرۋەرلىك بىرلىك سەپ تەشكىلاتى بولۇش سۈپىتى بىلەن، خەلق سىياسىي مەسلىھەت كېڭىشى بۈيۈك ئىتتىپاقلىق، بۈيۈك بىرلىشىشتە چىڭ تۇرۇپ، بىردەكلىك بىلەن كۆپ خىللىقنىڭ مۇناسىۋىتىنى توغرا بىر تەرەپ قىلىشتا چىڭ تۇرۇپ، ئىتتىپاقلىشىپ كۈرەش قىلىشنىڭ ئورتاق ئىدىيەۋى - سىياسىي ئاساسىنى ئۈزلۈكسىز پۇختىلاپ، ئاڭلىق ھالدا جۇڭخۇا پەرزەنتلىرىنىڭ بۈيۈك ئىتتىپاقلىقىنى ئىلگىرى سۈرۈپ، قوزغىتىشقا بولىدىغان بارلىق ئاكتىپ ئامىللارنى قوزغىتىپ، ئىتتىپاقلىشىشقا بولىدىغان بارلىق كۈچلەر بىلەن ئىتتىپاقلىشىپ، جۇڭگو ئارزۇسىنى بىر مەقسەتتە ئورتاق ئىشقا ئاشۇرىدىغان قۇدرەتلىك ئۇلۇغ كۈچنى شەكىللەندۈرۈشكە تۈرتكە بولۇشى كېرەك.
كېڭىشىش دېموكراتىيەسى پۈتۈن جەريانلىق خەلق دېموكراتىيەسىنىڭ مۇھىم تەركىبىي قىسمى. باش شۇجى شى جىنپىڭ مۇنداق كۆرسەتتى: «كېڭىشىش دېموكراتىيەسىنى ئومۇميۈزلۈك راۋاجلاندۇرۇشتا، پارتىيەنىڭ ئومۇميۈزلۈك رەھبەرلىكىدە چىڭ تۇرۇپ، جۇڭگوچە سوتسىيالىستىك سىياسىي تەرەققىيات يولىدا قەتئىي تەۋرەنمەي مېڭىش كېرەك». سۈنئىي ئەقلىي ئىقتىدار، تۆۋەن بوشلۇق ئىقتىسادى قاتارلىق يېڭى سۈپەتلىك ئىشلەپچىقىرىش كۈچلىرىنى راۋاجلاندۇرۇشنى تېزلىتىشتىن ئىقتىساد، جەمئىيەتنىڭ يېشىل تۆۋەن كاربونلۇق تىپ ئۆزگەرتىشىنى ئالغا سىلجىتىشقىچە، يەنە پۇقراۋى ئىگىلىكنىڭ يۇقىرى سۈپەتلىك تەرەققىياتىنى ئىلگىرى سۈرۈشكىچە، يىغىن مەزگىلىدە، سىياسىي كېڭەش ئەزالىرى «دۆلەتنىڭ چوڭ ئىشى»، خەلق كۆڭۈل بۆلۈۋاتقان مەسىلىلەرنى چىڭ كۆزلەپ، ياخشى تەكلىپلەرنى بېرىپ، ياخشى سادالارنى ياڭرىتىپ، دۆلىتىمىز كېڭىشىش دېموكراتىيەسىنىڭ ئۆزگىچە ئەۋزەللىكىنى تولۇق نامايان قىلدى. كەلگۈسىگە يۈزلەنسەك، يەنىمۇ ئىلگىرىلىگەن ھالدا دېموكراتىيەنى جارى قىلدۇرۇش بىلەن ئىتتىپاقلىقنى ئىلگىرى سۈرۈشنى ئۆزئارا تۇتاشتۇرىدىغان، ھاكىمىيەت ئىشلىرىغا مەسلىھەت ۋە تەكلىپ بېرىش بىلەن ئورتاق تونۇشنى مۇجەسسەملەشكە قوش يۆنىلىشلىك كۈچەيدىغان تەرتىپ مېخانىزمىنى يەنىمۇ مۇكەممەللەشتۈرۈپ، كېڭىشىش دېموكراتىيەسىنىڭ كەڭ دائىرىلىك، كۆپ قاتلاملىق تۈزۈملەشكەن تەرەققىياتىغا ئۈزلۈكسىز تۈرتكە بولۇپ، سىياسىي جەھەتتە كېڭىشىش، دېموكراتىك نازارەت قىلىش، ھاكىمىيەت ئىشلىرىغا قاتنىشىش ۋە ھاكىمىيەت ئىشلىرىنى مۇھاكىمە قىلىش ئىقتىدارى، قابىلىيىتىنى ئۆستۈرۈپ، ھەقىقىي تۈردە كېڭىشىش ئارقىلىق چارە - تەدبىر كۆرسىتىپ، ئورتاق تونۇشنى مۇجەسسەملەپ، ھېسسىياتنى چوڭقۇرلاشتۇرۇپ، ئىتتىپاقلىقنى ئىلگىرى سۈرگەندىلا، چوقۇم يۇقىرى سۈپەتلىك كېڭىشىش، يۇقىرى سەۋىيەلىك تەكلىپ بېرىش ئارقىلىق جۇڭگوچە زامانىۋىلاشتۇرۇش قۇرۇلۇشى ئومۇمىيىتىگە تېخىمۇ ياخشى مۇلازىمەت قىلالايمىز.
بېكىتىلگەن كۈرەش نىشانىغا قاراپ جاسارەت بىلەن ئىلگىرىلەۋاتقان «جۇڭگو ناملىق» غايەت زور پاراخوت يېقىلغۇنى تولۇق قاچىلاپ، رولنى چىڭ تۇتۇپ، تولۇق غەيرەتكە كېلىپ، جاسارەت بىلەن يىراققا يۈرۈش قىلماقتا. بىز يولداش شى جىنپىڭ يادرولۇقىدىكى پارتىيە مەركىزىي كومىتېتىنىڭ ئەتراپىغا تېخىمۇ زىچ ئۇيۇشۇپ، شى جىنپىڭ يېڭى دەۋر جۇڭگوچە سوتسىيالىزم ئىدىيەسىنى ئومۇميۈزلۈك ئىزچىللاشتۇرۇپ، «ئىككىنى تىكلەش»نىڭ ھەل قىلغۇچ ئەھمىيىتىنى چوڭقۇر ئۆزلەشتۈرۈپ، «تۆت ئاڭ»نى كۈچەيتىپ، «تۆت ئىشەنچ»نى چىڭىتىپ، «ئىككىنى قوغداش»نى ئىشقا ئاشۇرۇپ، بىر مەقسەتتە ھەمدەم بولۇپ، يول ئېچىپ ئىلگىرىلەپ، جۇڭگوچە زامانىۋىلاشتۇرۇشنى ئالغا سىلجىتىش يېڭى مۇساپىسىدە يېڭى تېخىمۇ زور شانلىق نەتىجىلەرنى ئورتاق يارىتايلى.
ئەسكەرتىش: مەنبە خەلق تورى دەپ ئەسكەرتىلگەن مەزمۇنلارنىڭ ھەممىسى خەلق تورىغا تەۋە مەزمۇنلار بولۇپ، كۆچۈرمەكچى بولسىڭىز مەنبەنى ئېنىق ئەسكەرتىڭ
