14-نۆۋەتلىك مەملىكەتلىك خەلق قۇرۇلتىيى 3-يىغىنى 3-ئاينىڭ 9-كۈنى مۇخبىرلار يىغىنى ئۆتكۈزدى، خەلق ئىشلىرى مىنىستىرلىقى، ئادەم كۈچى بايلىقى ۋە ئىجتىمائىي كاپالەت مىنىستىرلىقى، تۇرالغۇ ۋە شەھەر-يېزا قۇرۇلۇشى مىنىستىرلىقى، دۆلەت سەھىيە-ساغلاملىق كومىتېتى قاتارلىق تۆت تارماقنىڭ مەسئۇللىرى ئالاقىدار مەسىلىلەر توغرىسىدا جۇڭگو ۋە چەت ئەل مۇخبىرلىرىنىڭ سوئاللىرىغا جاۋاب بەردى.
دۆلەت سەھىيە-ساغلاملىق كومىتېتىنىڭ مۇدىرى لېي خەيچاۋ مۇنداق بىلدۈردى: بەدەن ئېغىرلىقىنى باشقۇرۇش يىلى ھەرىكىتىنى داۋاملىق ئالغا سىلجىتىمىز. ھازىر جۇڭگو پۇقرالىرىنىڭ ساغلاملىقىغا خەۋپ يەتكۈزىدىغان ئەڭ دەسلەپكى خەتەرلىك ئامىل ۋە كېسەللىك سوزۇلما يۇقۇمسىز كېسەللىكلەردىن كېلىدۇ، سوزۇلما يۇقۇمسىز كېسەللىكلەر ئىچىدىكى نۇرغۇن كېسەللىك پەيدا قىلىدىغان ئامىللار ھەربىر ئادەمنىڭ ھەرىكەت، تۇرمۇش ئۇسۇلى، يېمەك-ئىچمەك ۋە چېنىقىشى بىلەن زىچ مۇناسىۋەتلىك، مەسىلەن، بەدەن ئېغىرلىقى بىنورمال بولۇش مەسىلىسى.
بەدەن ئېغىرلىقى نورمالسىز بولۇش ئاسانلا يۇقىرى قان بېسىم، دىيابېت كېسەللىكى، يۈرەك، مېڭە قان تومۇر كېسەللىكى، جىگەرنى ماي قاپلاشنى كەلتۈرۈپ چىقىرىدۇ، ھەتتا بىر قىسىم راك كېسەللىكلىرىمۇ بەدەن ئېغىرلىقى نورمالسىز بولۇش بىلەن بەلگىلىك مۇناسىۋەتلىك. ھەربىر ئادەم ئۆز ساغلاملىقىغا بىرىنچى مەسئۇل كىشى بولۇش ئىنتايىن مۇھىم. لېي خەيچاۋ مۇنداق دېدى: سوزۇلما كېسەللىكلەرنىڭ ئالدىنى ئېلىش-تىزگىنلەش ۋە بەدەن ئېغىرلىقىنى باشقۇرۇشقا ئالاقىدار ئىشلاردا ئالدىنى ئېلىش بىلەن داۋالاشنى بىرلەشتۈرۈشكە ئەھمىيەت بېرىپ، خاس مۇلازىمەت بىلەن تەمىنلەش كېرەك. بەزىلەرنىڭ بەل ئايلانمىسى بەك چوڭ، بەدەن ئېغىرلىقى ئۆلچەمدىن ئېشىپ كەتكەن، ھەتتا سوزۇلما كېسەللىككە گىرىپتار بولغان...بۇنداق چاغدا كەسپىي دوختۇر ۋە كەسپىي داۋالاش ئاپپاراتلىرىنىڭ ياردىمىگە ئېھتىياجلىق بولىدۇ. بىز داۋالاش-ساقلىق ساقلاش ئاپپاراتلىرىنى بەدەن ئېغىرلىقى ئامبۇلاتورىيەسى تەسىس قىلىشقا يېتەكلەپ، بەدەن ئېغىرلىقى مەسىلىسىدە قىيىنىلىۋاتقان ئاھالىلەرنى ياخشى كەسپىي مەسلىھەت بېرىش مۇھىتى ۋە سۇپىسى بىلەن تەمىنلىدۇق. كۆپچىلىكنىڭ ئۆزىنىڭ تىرىشچانلىقى ۋە كەسپىي ئاپپارات خادىملىرىنىڭ ياردىمىدە، بەدەن ئېغىرلىقىنى تېخىمۇ ياخشى باشقۇرالايدىغانلىقىغا، ساغلام تۇرمۇش كەچۈرەلەيدىغانلىقىغا ئىشىنىمەن.
مەنبە: خەلق تورى
ئەسكەرتىش: مەنبە خەلق تورى دەپ ئەسكەرتىلگەن مەزمۇنلارنىڭ ھەممىسى خەلق تورىغا تەۋە مەزمۇنلار بولۇپ، كۆچۈرمەكچى بولسىڭىز مەنبەنى ئېنىق ئەسكەرتىڭ
