3-ئاينىڭ 9-كۈنى چۈشتىن كېيىن، مۇخبىرنىڭ ئالىي خەلق سوت مەھكىمىسى ئۆتكۈزگەن 2025-يىللىق مەملىكەتلىك ئىككى يىغىن «ئالىي خەلق سوت مەھكىمىسىنىڭ خىزمەت دوكلاتى»نى چۈشەندۈرۈش تۈرىدىكى پۈتۈن تاراتقۇدا بىۋاسىتە تارقىتىش سۆھبىتىنىڭ 2-مەيدان پائالىيىتىدىن ئىگىلىشىچە، پۈتۈن مەملىكەتتىكى ھەر دەرىجىلىك سوت مەھكىمىلىرى خەلق ئۈچۈن بىخەتەرلىك تۆۋەن چېكىنى ياخشى ساقلاش ئەسلىي مەقسىتىدە چىڭ تۇرۇپ، زەربە بېرىشنىڭ ئۆتكۈر تىغىنى تۈرلۈك قارا، رەزىل كۈچلەرنىڭ قانۇنغا خىلاپلىق قىلىش جىنايەتلىرىگە قارىتىپ، قارا، رەزىل جىنايەتچىلەر ۋە ئۇلارنىڭ مۇھاپىزەت كۈنلۈكىنى قاتتىق جازالاپ، قارا، رەزىل كۈچلەرنى يوقىتىشنى دائىملاشتۇرۇشنى ھەقىقىي ئالغا سىلجىتىدىكەن.
بۇلتۇر قارا، رەزىل كۈچلەرگە چېتىشلىق جىنايەت دېلوسىدىن 1663ىنى قاراپ چىقىپ ئاخىرلاشتۇرۇپ، 8840 جىنايەتچىنى ھۆكۈم ئېلان چىقىرىپ بىر تەرەپ قىلدى. «قارا بايلىقنى تېگى-تەكتىدىن ئېنىقلاش» «قارا بايلىققا زەربە بېرىپ مەنبەسىنى ئۈزۈپ تاشلاش»نى قىلچە يۇمشاق قوللۇق قىلماي ئالغا سىلجىتىپ، «قارا بايلىق»نى بىر تەرەپ قىلىش بويىچە ئۆتكەلگە ھۇجۇم قىلىش ھەرىكىتىنى ئورۇنلاشتۇرۇپ ۋە قانات يايدۇرۇپ، «قارا بايلىق»نى ئېنىقلاپ تاپشۇرۇشنى پۈتۈن كۈچ بىلەن ئالغا سىلجىتىپ، 260 مىليون يۈەندىن ئارتۇق پۇلنى ئەمەلىيلەشتۈرۈپ، مال-مۈلۈك جازاسىنى ئىجرا قىلىشنىڭ ئەمەلىيلىشىش نىسبىتىنى ％80 تىن ئاشۇرۇپ، قارا، رەزىل كۈچلەر يامرايدىغان ئىقتىسادىي تۇپراقنى قەتئىي يوقاتتى.
پائالىيەتتە، ئالىي خەلق سوت مەھكىمىسى جىنايى ئىشلار 1-سوت كوللېگىيەسىنىڭ كوللېگىيە باشلىقى خې لى مۇنداق دېدى: بەزى يېزا رايونلىرىدىكى «كەنت زومىگەرلىرى» ۋە جەمەت، ئۇرۇق خاراكتېرىدىكى قارا، رەزىل كۈچلەر ئەسكىلىك قىلىپ، ئاساسىي قاتلامدىكى ئاممىنى بوزەك قىلىپ، بېسىپ ۋە ئۇلارغا زىيانكەشلىك قىلىپ، يېزا رايونلىرىنىڭ جەمئىيەت مۇقىملىقىغا ئېغىر خەۋپ يەتكۈزدى. خەلق سوت مەھكىمىسى مەركەزنىڭ 1-نومۇرلۇق ھۆججىتىدىكى «يېزا رايونلىرىدا قارا، رەزىل كۈچلەرنى يوقىتىشنى دائىملاشتۇرۇش مېخانىزمىنى تاكامۇللاشتۇرۇش» توغرىسىدىكى ئورۇنلاشتۇرمىنى ئەستايىدىل ئىزچىللاشتۇرۇپ ۋە ئەمەلىيلەشتۈرۈپ، «كەنت زومىگەرلىرى»نى سىجىل تۈزەپ، يېزا جەمەت، ئۇرۇق خاراكتېرىدىكى قارا، رەزىل كۈچلەر ۋە ئۇلارنىڭ «مۇھاپىزەت كۈنلۈكى»گە قانۇن بويىچە زەربە بەردى.
مەنبە: خەلق تورى
ئەسكەرتىش: مەنبە خەلق تورى دەپ ئەسكەرتىلگەن مەزمۇنلارنىڭ ھەممىسى خەلق تورىغا تەۋە مەزمۇنلار بولۇپ، كۆچۈرمەكچى بولسىڭىز مەنبەنى ئېنىق ئەسكەرتىڭ
