خەلق تورى ئۇيغۇرچە قانىلىنىڭ 31- ئاۋغۇست بېيجىڭدىن بەرگەن تېلېگراممىسى: قۇربان ھېيت __ ئېلىمىزدىكى ئۇيغۇر، خۇيزۇ، قازاق، تاجىك، قىرغىز، ئۆزبېك، تاتار، دۇڭشياڭ، سالا قاتارلىق 10 مىللەتنىڭ ئەنئەنىۋىي بايراملىرىنىڭ بىرى. پۈتۈن مەملىكەتتىكى ھەر مىللەت خەلقى 19-قۇرۇلتاينى كۈتۈۋېلىش ھارپىسىدا، يىلدا بىر كېلىدىغان ئەنئەنىۋىي بايرام — قۇربان ھېيت يېتىپ كەلدى.
بېيجىڭدىكى ئۇيغۇرلارنىڭ بۇ قېتىملىق قۇربان ھېيتلىق ھال-ئەھۋال سورىشىشلىرى سۈپىتىدىكى بۇ كۆڭۈل ئېچىش پائالىيىتى بېيجىڭ شەھەرلىك مىللەتلەر دوستلۇق ئۇيۇشمىسىنىڭ قوللىشى ۋە ئۇنىڭغا يېتەكچىلىك قىلىشى بىلەن، جۇڭگو ئۇيغۇر تارىخى-مەدەنىيىتى تەتقىقات جەمئىيىتى تەرىپىدىن ئۇيۇشتۇرۇلغان. 2017- يىل 8- ئاينىڭ 30- كۈنى، بېيجىڭدىكى ھەر ساھە ۋە ھەر كەسىپتە خىزمەت قىلىۋاتقان شىنجاڭلىق ئۇيغۇر قېرىنداشلار دۆلەت مىللەتلەر ئىشلىرى كومىتېتى ئاخبارات-نەشرىيات بىناسىنىڭ پائالىيەت زالىغا جەم بولۇپ، بۇ قېتىمقى قۇربان ھېيتلىق پائالىيەتنى ئۆتكۈزدى.
بېيجىڭ شەھەرلىك مىللەتلەر ئىشلىرى كومىتېتى ۋە بېيجىڭ شەھەرلىك مىللەتلەر دوستلۇق ئۇيۇشمىسىنىڭ مۇناسىۋەتلىك رەھبەرلىرى بۇ ھېيتلىق پائالىيەتكە قاتناشتى. بېيجىڭدىكى پارتىيە ۋە ھۆكۈمەت ئورۇنلىرى، ئاخبارات-تاراتقۇ، تەرجىمە-نەشرىيات، تىل-يېزىق، تارىخ-مەدەنىيەت، ئوقۇتۇش-تەتقىقات، دۆلەت كارخانىلىرى، شەخسى كارخانىلار ۋە شېرىكچىلىك كارخانىلىرىدا تىرىشىپ ئىشلەپ، ئۈنسىز تۆھپە قوشۇۋاتقان، ئانا يۇرتتىن، ئۇرۇق-تۇغقانلىرىدىن ئايرىلىپ، پارتىيە ۋە دۆلەتنىڭ مۇھىم خىزمەتلىرىگە مۇلازىمەت قىلىشنى مەقسەت قىلغان، مىللەتلەر خىزمىتى، ئازسانلىق مىللەت رايونلىرىغا مۇلازىمەت قىلىش ۋە مەدەنىيەتتە كۈچلۈك دۆلەت قۇرۇشتەك شەرەپلىك بۇرچىنى زېممىسىگە ئالغان، شىنجاڭغا چوڭقۇر رىشتە باغلاپ، ۋەتەننىڭ بىرلىكى، باراۋەرلىك، ئىتتىپاقلىق، ھەمكارلىق ۋە ئىناقلىق ئاساسىدىكى سوتسىيالىستىك مىللەتلەر مۇناسىۋىتىنى قوغداپ، ھەر مىللەت خەلقى ئورتاق ئىتتىپاقلىشىپ كۈرەش قىلىدىغان، ئورتاق گۈللىنىپ-تەرەققىي قىلىدىغان ئۇلۇغۋار ئىشلارنى ئالغا سىلجىتىپ، يۇرتنىڭ ئىقتىسادىي قۇرۇلۇشى، مەدەنىيەت قۇرۇلۇشى ۋە ئىجتىمائىي تەرەققىياتى ئۈچۈن، چېگرا رايونلارنىڭ ئىجتىمائىي مۇقىملىقى ۋە ئەبەدىي ئەمىنلىكى ئۈچۈن تۆھپە قوشۇۋاتقان ھەر دەرىجىلىك رەھبەرلەر، كادىر-ئىشچى خىزمەتچىلەر، مۇتەخەسىس ۋە ئالىملار بىر يەرگە جەم بولۇپ، ھېيت خۇشاللىقىدىن تەڭ بەھرىمەن بولۇشتى. ناخشا-ئۇسسۇلغا ماھىر ئۇيغۇر ئىشچى-خىزمەتچىلەر، مۇزىكانت ۋە سەنئەتكارلار بەس-بەستە سەھنىگە چىقىپ ئېسىل نومۇرلارنى ئورۇنلىدى. پائالىيەت باشتىن-ئاخىر ھېيتلىق خۇشال كەيپىياتتا ئۆتتى.
كۆرۈپ بېكىتكۈچى: موللانىياز تۇنىياز
مەنبە: خەلق تورى