خەلق تورىنىڭ 12-ماي بېيجىڭدىن بەرگەن خەۋىرى: مەركىزىي مىللەتلەر ئۇنىۋېرسىتېتى ئۇيغۇر تىل-ئەدەبىيات فاكۇلتېتى ئۇيۇشتۇرغان «ئۇيغۇر مۇقام ئۇستازى ئاماننىساخان نەفىسىي تەۋەللۇتىنىڭ 480 يىللىقىنى خاتىرىلەش ئىلمىي مۇھاكىمە يىغىنى» 9-ماي كەچتە مەركىزىي مىللەتلەر ئۇنىۋېرسىتېتى يىغىن زالىدا مۇۋەپپەقىيەتلىك ئۆتكۈزۈلدى.
ئىلمىي مۇھاكىمە يىغىنى ئاخىرلاشقاندىن كېيىن، مەركىزىي مىللەتلەر ئۇنىۋېرسىتېتىنىڭ پروفىسسورى، دوكتور يېتەكچىسى، چاغاتاي تىلى تەتقىقاتچىسى، بۇ قېتىملىق ئىلمىي مۇھاكىمە يىغىنىنىڭ يېتەكچىسى ئابدۇرەئوپ پولات تەكلىماكانىي مۇئەللىم خەلق تورى مۇخبىرىنىڭ زىيارىتىنى قۇبۇل قىلغاندا، بۇ قېتىملىق ئىلمىي مۇھاكىمە يىغىنىنى ئۆتكۈزۈشنىڭ ئەھمىيىتى توغرىلىق سۆزلەپ: «بىزنىڭ ئۇيغۇر ئەدەبىياتى ئىككى قاناتنى ئۆز ئىچىگە ئالىدۇ، بۇنىڭ بىرى يازما ئەدەبىيات بولۇپ، بۈيۈك ئۇيغۇر مۇتەپەككۈر شائىرى ئەلشىر نەۋائىي ئۇيغۇر يازما ئەدەبىياتىنىڭ پىر ئۇستازى؛ ئاماننىساخان بولسا ئۇيغۇر خەلق ئېغىز ئەدەبىياتىنىڭ پىر ئۇستازىدۇر. ئىگىلىشىمىزچە، بىز بۈگۈن ئۆتكۈزگەن ئاماننىساخان تەۋەللۇتىنىڭ 480 يىللىقىنى خاتىرىلەش ئىلمىي مۇھاكىمە يىغىنى مەملىكەت بويىچە تۇنجى قېتىم ئېچىلغان ئىلمىي مۇھاكىمە يىغىنى بولۇپ ھېسابلىنىدۇ. بۇ بىزنىڭ خەلق ئېغىز ئەدەبىياتىمىزنى تەتقىق قىلىش، ئۇيغۇر ئون ئىككى مۇقامىنى تېخىمۇ قېزىپ تەتقىق قىلىش، ئۇيغۇر مۇقام تەتقىقاتىنى تېخىمۇ يۇقىرى بالداققا كۆتىرىش، ئۇيغۇر مىللىتىنىڭ مەدەنىيەت يۇمشاق كۈچىنى قۇۋۋەتلەندۈرۈشتە تولىمۇ يۈكسەك ئەھمىيەتكە ئىگە» دەپ قارايدىغانلىقىنى بىلدۈردى.
مەنبە: خەلق تورى ئۇيغۇرچە قانىلى