ئابدۇشۇكۈر مىجىت شىنجاڭ بوكسچىلىقىدا تۇنجى ئالتۇن مېدالنى ئالغۇچى ھەم شۇنداقلا شىنجاڭدىن چىققان تۇنجى «جۇڭگو بوكس شاھى». نۆۋەتتە ئۇ شىنجاڭ ئۇيغۇر ئاپتونوم رايونلۇق تەنتەربىيە ئىدارىسى بوكس ھەرىكىتىنى باشقۇرۇش مەركىزىنىڭ مۇئاۋىن مۇدىرى، شىنجاڭ بوكس كوماندىسىنىڭ باش تىرېنېرى، دۆلەتلىك ئەرلەر بوكس كوماندىسىنىڭ تىرېنېرىلىق ۋەزىپىلىرىنى ئۆتىمەكتە.
ئابدۇشۇكۈر مىجىت شىنجاڭ كەسپىي بوكس كوماندىسىنىڭ يوقلۇقتىن بارلىققا كېلىپ، ئاددىيلىقتىن تەرەققىي قىلىپ، بۈگۈنكىدەك دۆلەت ئىچى ۋە سىرتىدىكى كوماندىلار ئېتىراپ قىلىدىغان، مۇئەييەن تەسىر كۈچكە ئىگە كۈچلۈك كوماندىغا ئايلىنىشىنىڭ شاھىدى. ئۇ 80-يىللاردا بوكس ھەرىكىتىگە قىزىقىپ، 90-يىللاردا كەسپىي بوكس تەنھەرىكىتى بىلەن شۇغۇللىنىپ، 2000-يىللاردىن ھازىرغىچە ئاز كەم 20 يىللىق بوكس تىرېنېرىلىق ھاياتىنى باشتىن كەچۈردى. ئۇ مۇنداق دەيدۇ: «مەن شىنجاڭنىڭ بوكس كەسپى تەرەققىياتىنىڭ گۇۋاھچىسى، 94-يىلىدا يېڭىدىن قۇرۇلغان <كىچىك بىر كوللېكتىپ>تىن ھازىرقى دۆلەت ئىچىدىكى كۈچلۈك كوماندىلارنىڭ بىرى، دۆلىتىمىز بوكس ئىشلىرىنىڭ مۇھىم بازىسى بولغان كۈچلۈك قوشۇنغا ئايلانغۇچە، بىز جاپانى يېڭىپ، بوشاشماي تىرىشىدىغان كۈرەش جەريانىنى باشتىن كەچۈردۇق. شىنجاڭ بوكس كوماندىسى ئاپتونوم رايونلۇق پارتكوم، خەلق ھۆكۈمىتىنىڭ رەھبەرلىكى ۋە غەمخورلۇقى، شىنجاڭ تەنتەربىيە ئىدارىسى ۋە دۆلەتلىك تەنتەربىيە باش ئىدارىسىدىكى رەھبەرلەرنىڭ يېقىندىن قوللىشى ۋە يېتەكلىشىدە بۈگۈنكىدەك ھالەتكە كەلدى. بۇ نەتىجىلەر ھەم شىنجاڭ بوكس كوماندىسى ئەزالىرىنىڭ ئىزچىل ئەنئەنىسى بويىچە <ۋەتەننىڭ شان-شەرىپى ھەممىدىن ئەلا> دەيدىغان مۇشۇنداق ئۇلۇغۋار روھنى ئۆزىمىزگە تۈرتكە قىلىپ، تىرىشىپ مەشىق قىلىشىمىز نەتىجىسىدە قولغا كەلگەن. نۆۋەتتە، بىز 2020-يىللىق توكيو ئولىمپىك مۇسابىقىسىدا ئېلىمىز ئۈچۈن شان-شەرەپ كەلتۈرۈش ئۈچۈن كۈچەپ مەشىق قىلماقتىمىز، بۇنىڭدىن كېيىن ھەم <ۋەتەننىڭ شەرىپى ھەممىدىن ئەلا> دېگەن شوئارىمىزدەك، ئېلىمىز ئۈچۈن تېخىمۇ كۆپ نەتىجىلەرنى ئېلىشقا تىرىشىمىز!»
كۆرۈپ بېكىتكۈچى: ياسىن قادىر
مەنبە: خەلق تورى