شى جىنپىڭ كورىيە زۇڭتۇڭى مون جائىن بىلەن كۆرۈشتى

2017.07.07 17:30   مەنبە: خەلق تورى

　　خەلق تورى ئۇيغۇرچە قانىلىنىڭ 7-ئىيۇل بېيجىڭدىن بەرگەن تېلېگراممىسى: دۆلەت رەئىسى شى جىنپىڭ 7-ئاينىڭ 6-كۈنى بېرلىندا كورىيە زۇڭتۇڭى مون جائىن بىلەن كۆرۈشتى.

　　شى جىنپىڭ مۇنداق دېدى: جۇڭگو بىلەن كورىيەنىڭ جۇغراپىيەلىك ئورنى يېقىن، مەدەنىيىتى ئوخشىشىپ كېتىدىغان بولۇپ، ئۆزئارا تولۇقلاش ئەۋزەللىكى روشەن. ئىككى دۆلەت دىپلوماتىك مۇناسىۋەت ئورناتقان 25 يىلدىن بۇيان، جۇڭگو-كورىيە دىپلوماتىك مۇناسىۋەت ئورنىتىش قوشما ئاخباراتىنىڭ روھىغا ئەمەل قىلىپ، ئۆزئارا چۈشىنىش، ئۆزئارا ھۆرمەت قىلىش پىرىنسىپىغا ئاساسەن، جۇڭگو-كورىيە مۇناسىۋىتىنىڭ ھالقىما تەرەققىياتىنى ئىشقا ئاشۇرۇشقا تۈرتكە بولۇپ، ئىككى دۆلەت ۋە ئىككى دۆلەت خەلقىگە زور بەخت ئاتا قىلدى، شۇنداقلا رايون تىنچلىقى، مۇقىملىقى، گۈللىنىشىگە مۇھىم تۆھپە قوشتى.

　　شى جىنپىڭ مۇنۇلارنى تەكىتلىدى: زۇڭتۇڭ مون جائىننىڭ كورىيە ھۆكۈمەت ۋەكىللەر ئۆمىكىنى «بىر بەلباغ، بىر يول» خەلقئارا ھەمكارلىق باشلىقلار مۇنبىرىگە قاتنىشىشقا ئەۋەتىشى، خاس ئەلچىنى جۇڭگوغا زۇڭتۇڭنىڭ ئىمزالىق خېتىنى يەتكۈزۈپ بېرىشكە ئەۋەتىشى جۇڭگو-كورىيە مۇناسىۋىتىنى ياخشىلاش ۋە تەرەققىي قىلدۇرۇش، نازۇك مەسىلىلەرنى مۇۋاپىق بىر تەرەپ قىلىش جەھەتتىكى ئاكتىپ ئارزۇسىنى ئىپادىلىدى، مەن بۇنى ئالقىشلايمەن. بىر مەزگىلدىن بۇيان، جۇڭگو-كورىيە مۇناسىۋىتى قىيىنچىلىققا دۇچ كەلدى، بىز بۇنداق بۇلۇشىنى خالىمايمىز. جۇڭگو ھۆكۈمىتى كورىيەگە ۋە جۇڭگو-كورىيە مۇناسىۋىتىگە ئېتىبار بىلەن قارايدۇ، جۇڭگونىڭ جۇڭگو-كورىيە دوستلۇقىنى تىرىشىپ تەرەققىي قىلدۇرۇش مەيدانى ئۆزگەرمىدى. بىز جۇڭگو بىلەن كورىيەنىڭ دىپلوماتىك مۇناسىۋەت ئورناتقانلىقىغا 25 يىل بولغان بۇ پۇرسەتتىن پايدىلىنىپ، كورىيە بىلەن بىرلىكتە دىپلوماتىك مۇناسىۋەت ئورناتقاندىن بۇيانقى تەجرىبە-ساۋاقلارنى ئەستايىدىل ئەسلەپ ۋە يەكۈنلەپ، ئەسلى مەقسەتنى ئۇنتۇماي، قول تۇتۇشۇپ تەڭ ئىلگىرىلەپ، جۇڭگو-كورىيە مۇناسىۋىتىنىڭ بالدۇرراق ساغلام، مۇقىم راۋاجلىنىدىغان توغرا يولغا قايتىشىغا تۈرتكە بولۇشنى خالايمىز. جۇڭگو-كورىيە مۇناسىۋىتىنى ياخشى قوغداش، ياخشى راۋاجلاندۇرۇش ئىككى تەرەپنىڭ ئورتاق مەسئۇلىيىتى. ئىككى تەرەپ مەۋقەنى ئومۇمىيەتكە قويۇپ، كەلگۈسىگە نەزەر سېلىپ، بىر-بىرىنىڭ يادرولۇق مەنپەئىتى ۋە كۆڭۈل بۆلىدىغان چوڭ-چوڭ مەسىلىلىرىگە ھۆرمەت قىلىشى كېرەك. كورىيەنىڭ جۇڭگو كۆڭۈل بۆلۈۋاتقان مەسىلىلەرگە ئېتىبار بىلەن قاراپ، ئالاقىدار مەسىلىلەرنى مۇۋاپىق بىر تەرەپ قىلىپ، جۇڭگو-كورىيە مۇناسىۋىتىنى ياخشىلاش ۋە تەرەققىي قىلدۇرۇشتىكى توسالغۇلارنى تۈگىتىشىنى ئۈمىد قىلىمىز.

　　شىنجاڭ گېزىتى تەرجىمىسى

　　مەنبە: خەلق تورى

ئەسكەرتىش: مەنبە خەلق تورى دەپ ئەسكەرتىلگەن مەزمۇنلارنىڭ ھەممىسى خەلق تورىغا تەۋە مەزمۇنلار بولۇپ، كۆچۈرمەكچى بولسىڭىز مەنبەنى ئېنىق ئەسكەرتىڭ

خەلق تورى ئۇيغۇرچە ئۈندىدار سۇپىمىزنى قوشۇۋېلىپ، ئەڭ نوپۇزلۇق خەۋەرلەردىن خەۋەردار بولۇڭ