خەلق تورى ئۇيغۇرچە قانىلىنىڭ 6-ئىيۇل بېيجىڭدىن بەرگەن تېلېگراممىسى: دۆلەت رەئىسى شى جىنپىڭ 7-ئاينىڭ 5-كۈنى بېرلىندا گېرمانىيە زۇڭتۇڭى ستېئىنمېيېر بىلەن كۆرۈشتى. ئىككى دۆلەت باشلىقلىرى چوڭقۇر پىكىر ئالماشتۇرۇپ، كېيىنكى باسقۇچتىكى جۇڭگو-گېرمانىيە مۇناسىۋىتىنىڭ تەرەققىياتى توغرىسىدا كەڭ دائىرىدە ئورتاق تونۇش ھاسىل قىلدى.
شى جىنپىڭ مۇنداق دېدى: بۇ يىل جۇڭگو بىلەن گېرمانىيە دىپلوماتىك مۇناسىۋەت ئورناتقانلىقىنىڭ 45 يىللىقى. 45 يىلدىن بۇيان، ئىككى تەرەپ ئۆزئارا ھۆرمەت قىلىش، ئوخشاشلىقتا بىرلىككە كېلىپ، پەرقلەرنى ساقلاپ قېلىش روھىغا ئەمەل قىلىپ، ھەر قايسى ساھەلەرنىڭ ھەمكارلىقىنى ئۆزلۈكسىز راۋاجلاندۇردى، ئورتاق تونۇش ۋە ئورتاق مەنپەئەت داۋاملىق كېڭەيدى. 2014-يىلى جۇڭگو بىلەن گېرمانىيە ئومۇميۈزلۈك ئىستراتېگىيەلىك ھەمراھلىق مۇناسىۋىتى ئورناتقاندىن بۇيان، ئىككى دۆلەت مۇناسىۋىتى يۇقىرى سەۋىيەدە داۋاملىشىپ كەلدى. ئىككى تەرەپنىڭ يۇقىرى قاتلاملىق ئالاقىسى قويۇقلىشىپ، ئەمەلىي ھەمكارلىقى كۈچىيىپ، ئالاقە ساھەسى كېڭىيىپ، جۇڭگو-ياۋروپا مۇناسىۋىتىدە داۋاملىق ئالدىدا مېڭىپ، يۇقىرى سەۋىيەلىك، ئومۇميۈزلۈك ئىستراتېگىيەلىك ھەمكارلىقنىڭ يېڭى دەۋرىگە قەدەم قويدى. جۇڭگو گېرمانىيە بىلەن ئورتاق تىرىشىپ، جۇڭگو بىلەن گېرمانىيەنىڭ ھەر تەرەپلىمە ھەمكارلىقىغا تېخىمۇ كۆپ ھاياتىي كۈچ بەخش ئېتىپ، ئىككى دۆلەت خەلقلىرىگە تېخىمۇ بەخت يارىتىپ، دۇنيانىڭ تىنچلىقى، مۇقىملىقى، گۈللىنىشىنى ئورتاق ئىلگىرى سۈرۈشنى خالايدۇ.
شىنجاڭ گېزىتى تەرجىمىسى
مەنبە: خەلق تورى