خەلق تورى ئۇيغۇرچە قانىلىنىڭ 3- ماي بېيجىڭدىن بەرگەن تېلېگراممىسى: 4- ئاينىڭ 29- ۋە 30- كۈنلىرى، بېيجىڭدىكى ئۇيغۇر ئالىي مەكتەپ ئوقۇغۇچىلىرىنىڭ 7- نۆۋەتلىك «غالىبلار لوڭقىسى» ۋاسكېتبول مۇسابىقىسى مەركىزىي مىللەتلەر ئۇنىۋېرسىتېتىدا ئۆتكۈزۈلدى.
مەركىزىي مىللەتلەر ئۇنىۋېرسىتېتى ئۇيغۇر تىل- ئەدەبىيات فاكۇلتېتى ئۇيۇشتۇرغان بېيجىڭدىكى ئۇيغۇر ئالىي مەكتەپ ئوقۇغۇچىلىرىنىڭ 7- نۆۋەتلىك «غالىبلار لوڭقىسى» ۋاسكېتبول مۇسابىقىسىگە پايتەختتىكى 14 ئالىي مەكتەپ ئوقۇغۇچىلىرىدىن تەشكىللەنگەن 16 كوماندا بۇ قېتىملىق مۇسابىقىگە قاتناشتى، ھەمدە 36 مەيدان مۇسابىقە ئارقىلىق، بېيجىڭ جامائەت خەۋپسىزلىكى ئۇنىۋېرسىتېتى كوماندىسى بىرىنچىلىككە، بېيجىڭ تەنتەربىيە ئۇنىۋېرسىتېتى كوماندىسى ئىككىنچىلىككە، بېيجىڭ چەتئەل تىللىرى ئۇنىۋېرسىتېتى كوماندىسى ئۈچىنچىلىككە ئېرىشتى.
ھەل قىلغۇچ مۇسابىقە باشلىنىشتىن بۇرۇن يەنە ئۈچ نومۇرلۇق توپ مۇسابىقىسى، توپنى بېسىپ كىرگۈزۈش مۇسابىقىسى ئېلىپ بېرىلىپ، مۇسابىقە قاتناشچىلىرىنىڭ ماھارىتى نامايان قىلىندى.
ئىگىلىنىشىچە، بۇ قېتىملىق مۇسابىقە پايتەختتىكى ھەر قايسى ئالىي مەكتەپلەردىن كەلگەن 500 نەپەردىن ئارتۇق ۋاسكېتبول ھەۋەسكارلىرىنى جەلپ قىلغان.
كۆرۈپ بېكىتكۈچى: موللانىياز تۇنىياز
مەنبە: خەلق تورى