خەلق تورى ئۇيغۇرچە قانىلىنىڭ 20-ئاپرىل بېيجىڭدىن بەرگەن تېلېگراممىسى: 19-ئاپرىل، مائارىپ مىنىستىرلىقى مىللى مائارىپ مەھكىمىسى، تەنتەربىيە-سەھىيە-سەنئەت مەھكىمىسى، شىنجاڭ ئۇيغۇر ئاپتونوم رايونلۇق مائارىپ نازارىتى، ئاپتونوم رايونلۇق تەنتەربىيە ئىدارىسى باشچىلىق قىلىپ ئۇيۇشتۇرغان مەملىكەت بويىچە ئىچكى ئۆلكىلەردىكى شىنجاڭ تولۇق ئوتتۇرا سىنىپىنىڭ تۇنجى نۆۋەتلىك «بىرلىشىش لوڭقىسى» مەكتەپ پۇتبول لوڭقىسى ھەل قىلغۇچ مۇسابىقىسى سانجىدا ئۆتكۈزۈلدى. مەملىكەت ئىچىدىكى شىنجاڭ تولۇق ئوتتۇرا سىنىپى تەسىس قىلىنغان 14 ئۆلكە، شەھەردىن ۋەكىل بولۇپ قاتناشقان 15 كوماندا جىددىي رىقابەتلەشتى.
ئىگىلىنىشىچە، بۇ 15 كوماندا مەملىكەت ئىچىدىكى 14 ئۆلكە، شەھەردىكى شىنجاڭ تولۇق ئوتتۇرا سىنىپى تەسىس قىلىنغان 93 مەكتەپ پۇتبول كوماندىلىرى ئارىسىدىن ئۆلكە (شەھەر) بويىچە تاللاش نەتىجىسىدە تاللىنىپ چىقىلغان بولۇپ، ئۇلار شۇ 14 ئۆلكە، شەھەرگە ۋە مەكتىپىگە ۋەكالىتەن مۇسابىقىگە قاتنىشىدىكەن. ھەر بىر كوماندىدىكى 18 ماھىر ئىچكى ئۆلكىلەردىكى شىنجاڭ تولۇق ئوتتۇرا سىنىپى ۋە شۇ جايدىكى ئوقۇغۇچىلاردىن تەشكىللەنگەن بولۇپ، بۇ نۆۋەتلىك مۇسابىقىگە جەمئىي 270 تەنھەرىكەتچى قاتنىشىدىكەن.
بۇ قېتىملىق ھەل قىلغۇچ مۇسابىقە 19-ئاپرىل باشلىنىپ، 25-ئاپرىل ئاخىرلىشىدۇ، ئالدىنقى سەككىز كوماندا مۇكاپاتلىنىدۇ، «مۇنەۋۋەر تەنھەرىكەتچى»، «ئەڭ مۇنەۋۋەر نومۇر ئالغۇچى»، «ئەڭ مۇنەۋۋەر ۋاراتار»، «مۇنەۋۋەر رېپىر» مۇكاپاتلىرى تەسىس قىلىنغان بولۇپ، ئۇنىڭدىن باشقا سوتسىيالىستىك مەنىۋى مەدەنىيلىك قۇرۇلۇشىنى يەنىمۇ كۈچەيتىش، مىللىي روھنى يەنىمۇ جارى قىلدۇرۇش ئۈچۈن، «تەنتەربىيە ئەخلاق-پەزىلىتى مۇكاپاتى»مۇ تەسىس قىلىنغان.
كۆرۈپ بېكىتكۈچى: ياسىن قادىر
مەنبە: خەلق تورى