خەلق تورى ئۇيغۇرچە قانىلىنىڭ 30-ئىيۇن بېيجىڭدىن بەرگەن تېلېگراممىسى: بايراقلار لەپىلدەپ، ناخشا ئاۋازى جاراڭلىدى. جۇڭگو كوممۇنىستىك پارتىيەسى قۇرۇلغانلىقىنىڭ 95 يىللىقىنى تەبرىكلەش مۇزىكا كېچىلىكى «مەڭگۈلۈك ئېتىقاد» 29-ئىيۇن كەچ بېيجىڭدا ئۆتكۈزۈلدى. شى جىنپىڭ، لى كېچياڭ، جاڭ دېجياڭ، يۈ جېڭشېڭ، ليۇ يۈنشەن، ۋاڭ چىشەن، جاڭ گاۋلى قاتارلىق پارتىيە ۋە دۆلەت رەھبەرلىرى، پايتەختتىكى ھەر ساھەدىن كەلگەن 3000 نەچچە كىشى مۇزىكا كېچىلىكىگە قاتنىشىپ، شانلىق بايرامنى ئورتاق تەبرىكلىدى.
بۈگۈن كەچ، خەلق سارىيىنىڭ چىراقلىرى جۇلالىنىپ، بايراملىق كەيپىياتقا تولدى. 2-قەۋەتتىكى بالكونغا «يولداش شى جىنپىڭ باش شۇجىلىقىدىكى پارتىيە مەركىزىي كومىتېتىنىڭ ئەتراپىغا زىچ ئۇيۇشۇپ، جاسارەت بىلەن ئىلگىرلەپ، يول ئېچىپ يېڭىلىق يارىتىپ، پارتىيە قۇرۇلۇشىنىڭ يېڭى ئۇلۇغ مۇساپىسىنى ئومۇميۈزلۈك ئىلگىرى سۈرۈپ، <ئىككى 100 يىل>لىق كۈرەش نىشانى، جۇڭخۇا مىللىتىنىڭ ئۇلۇغ گۈللىنىشىدىن ئىبارەت جۇڭگو ئارزۇسىنى روياپقا چىقىرىش ئۈچۈن تىرىشايلى!» دېگەن خەت يېزىلغان لوزۇنكا ئېسىلىپ، سەھنىنىڭ ئوتتۇرىسىدىكى «مەڭگۈلۈك ئېتىقاد» دېگەن خەتلەر كۆزنى قاماشتۇراتتى. سەھنىنىڭ ئىككى تەرىپىدە، مۇستەھكەم سېپىل قىپقىزىل پارتىيە بايرىقىنى كۆتۈرۈپ، ئۇنىڭ ئۈستىگە ئورغاق بىلەن بولقىدىن تەركىب تاپقان پارتىيە گېربى ئېسىلغان بولۇپ، «1921-2016» دېگەن سانلاردىن نۇر چاقنايتتى.
سائەت 19:55لەردە، شى جىنپىڭ قاتارلىق پارتىيە ۋە دۆلەت رەھبەرلىرى شادىيانە مۇزىكا ساداسى ئىچىدە كېچىلىك نەق مەيدانىغا كىرگەندە، پۈتۈن مەيداندىكىلەر قىزغىن ئالقىش ياڭراتتى.
95 يىللىق بوران-چاپقۇنلۇق مۇساپىدە، 95 يىل جاپاغا چىداپ كۈرەش قىلدۇق. «بايراققا مەدھىيە» دېگەن مېلودىيەگە «مەڭگۈلۈك ئېتىقاد» دېگەن شېئىرنى دېكلاماتسىيە قىلىش بىلەن مۇزىكا كېچىلىك باشلاندى. كېچىلىك «تارىخنىڭ تاللىشى»، «قانلىق شەرەپ»، «ياشلىق قەسىمى»، «قايناق ھېسسىياتقا تولغان يىللار»، «خەلقنىڭ ئارزۇسى»، «مەڭگۈلۈك ئېتىقاد» قاتارلىق ئالتە بۆلەكتىن تەركىب تاپقان بولۇپ، ئەدەبىيات-سەنئەت خىزمەتچىلىرى تەسىرلىك ناخشا ئاۋازى، كامالەتكە يەتكەن ئورۇنداش ماھارىتى بىلەن، پارتىيە ۋە دۆلەتكە بولغان چەكسىز مۇھەببىتى ۋە مىللەتنىڭ گۈللىنىشىگە بولغان گۈزەل ئارزۇسىنى ئىپادىلىدى. (شىنجاڭ گېزىتى تەرجىمىسى)
مەنبە: خەلق تورى