خەلق تورى ئۇيغۇرچە قانىلىنىڭ 14-ئىيۇن بېيجىڭدىن بەرگەن تېلېگراممىسى: گوۋۇيۈەننىڭ زۇڭلىسى لى كېچياڭ 13-ئىيۇن چۈشتىن بۇرۇن خەلق سارىيىدا گېرمانىيە زۇڭلىسى مېركېل بىلەن بىللە 4-نۆۋەتلىك جۇڭگو-گېرمانىيە ھۆكۈمىتى كېڭىشىگە رىياسەتچىلىك قىلدى.
ئىككى دۆلەت زۇڭلىسى ئىككى تەرەپنىڭ دىپلوماتىيە، ئىقتىساد، سانائەت، مالىيە، پۇل، مائارىپ، پەن-تېخنىكا، قاتناش، مۇھىت ئاسراش، تۇرالغۇ قۇرۇلۇشى، يېزا ئىگىلىك، سودا، ئەدلىيە، ئىجتىمائىي سۇغۇرتا، داۋالاش قاتارلىق 26 تارماق مەسئۇللىرىنىڭ دوكلاتىنى ئاڭلىدى. ئىككى تەرەپ جۇڭگو-گېرمانىيە ھەمكارلىقىدا قولغا كەلتۈرۈلگەن ئىلگىرىلەشلەردىن قانائەتلىنىدىغانلىقىنى بىلدۈردى ھەم ھەرقايسى ساھەلەردىكى ھەمكارلىقىنى چوڭقۇرلاشتۇرۇشتا بىر قاتار يېڭى ئورتاق تونۇش ھاسىل قىلدى.
لى كېچياڭ مۇنۇلارنى تەكىتلىدى: جۇڭگو-گېرمانىيە ھۆكۈمىتى كېڭىشى باشلانغاندىن بۇيان، ئىككى دۆلەتنىڭ ھەرقايسى ساھەلەردىكى ھەمكارلىقىدا مۇھىم بىر تۇتاش پىلانلاش ۋە تۈرتكىلىك رولىنى ئويناپ، ئىككى دۆلەت ۋە ئىككى دۆلەت خەلقىگە ئەمەلىي پايدا ئېلىپ كەلدى. ئالدىنقى نۆۋەتلىك كېڭىشىشتە، بىز بېرلىندا ئورتاق بېكىتكەن «جۇڭگو-گېرمانىيە ھەمكارلىق ھەرىكەت تېزىسى» بويىچە نەتىجىلەر ئۈزلۈكسىز قولغا كەلتۈرىلىۋاتىدۇ. ئىككى تەرەپنىڭ پۇرسەتنى چىڭ تۇتۇپ، ھەرايسى ساھەلەرنىڭ ئەمەلىي ھەمكارلىقىدا يېڭى پىكىر ۋە تەشەببۇسلارنى ئوتتۇرىغا قويۇپ، كېيىنكى باسقۇچلۇق ھەمكارلىقنىڭ مۇھىم نۇقتىسى ۋە قىيىن نۇقتىسىنى مۇجەسسەملەپ، جۇڭگو-گېرمانىيەنىڭ دوستلۇق ۋە ھەمكارلىق دەرىجىسىنى ئۈزلۈكسىز ئۆستۈرۈشنى ئۈمىد قىلىمىز. (شىنجاڭ گېزىتى تەرجىمىسى)
مەنبە: خەلق تورى