SDA ئۈچ رەسسامنىڭ رەسىم كۆرگەزمىسى ئۈرۈمچىدە ئۆتكۈزۈلدى

2016.01.27 14:30   مەنبە: خەلق تورى

　　خەلق تورى ئۇيغۇرچە قانىلىنىڭ 27- يانۋار بېيجىڭدىن بەرگەن تېلېگراممىسى: (ئىختىيارىي مۇخبىرىمىز: مۇيەسسەر ئاباھامىت خەۋىرى) سەيدى مۇھەممەت، دىلمۇرات ئابدۇقادىر، ئابلاجان نىياز قاتارلىق ئۈچ رەسسامنىڭ نەچچە يىللىق جاپالىق ئەجرى بىلەن پۈتكەن غەيرى، ئۆزگىچە ئىجادىيەتلىرىدىن 160 پارچە ئەسىرى قاتناشتۇرۇلغان SDA رەسىم كۆرگەزمىسى 23-يانۋاردىن باشلاپ ئۈرۈمچى خوڭ گۈزەل-سەنئەت سارىيىدا ئۆتكۈزۈلدى.

　　كۆرگەزمە مۇشۇ ئاينىڭ ئاخىرىغىچە داۋام قىلىدىغان بولۇپ، بۇنىڭدا سۇ بوياق رەسىم بىلەن ماي بوياق رەسىملەر جۇڭگوچە رەسىم قەغىزىگە سىزىلغان، بۇنىڭدىكى سەيدى ئەخمەتنىڭ كۆرگەزمىگە قاتناشتۇرغان 80 پارچە ئەسىرىدە گۈزەل ھېس- تۇيغۇلىرىنى ئۆزى تاللىغان بىر تۈرلۈك تەپەككۇر قىلىش ئۇسۇلى بىلەن ئۆز تۇيغۇسى بويىچە ئۆزگىچە ئىپادىلەپ بەرگەن. دىلمۇرات ئابدۇقادىر تۇيغۇ ۋە تەسەۋۋۇرى ئارقىلىق تەييار ماتېرىياللار ۋە ئوبېيىكتتىن بىۋاسىتە پايدىلانماي، ئەتراپىدا كۆرگەن بىلگەنلىرى ئاساسىدا شەكىللەنگەن قاراشلىرىنى ئەسىرىگە بىۋاسىتە سىڭدۈرۈپ، شەكىل ۋە رەڭگە يوشۇرۇنغان تۇيغۇ، كەيپىيات، خاراكتېر ئارقىلىق سەنئەتكارنىڭ پەقەت ئۆزىگىلا خاس بولغان بىر پۈتۈن روھىي دۇنياسىنى ئەكىس ئەتتۈرگەن. ئابلاجان نىياز ئەسەرلىرىدىكى ئوبرازلار ئادەم تۇيغۇسىنى غىدىقلاپ، رەسسامنىڭ شۇ ۋاقتتىكى روھىي كەيپىياتىنى ئىپادىلەپ، ئەسەرلىرى ئارقىلىق ئادەمنىڭ يۈرىكىگە تېگىدىغان سەنئەتلىك كۈچنى تېپىپ چىقىشنى مەقسەت قىلغانىكەن.

　　بۇ رەسىم كۆرگەزمىسى تەتىل مەزگىلىگە توغرا كەلگەچكە، ئوقۇغۇچىلارنىڭ ئۆگىنىدىغان ھەم ھۇزۇرلىنالايدىغان ياخشى سورۇنى بولۇپلا قالماي، شەھەر ئاھالىلىرىنىڭمۇ مەنىۋى تۇرمۇشىنى بېيىتىپ، گۈزەللىك قارشىنى يۇقىرى كۆتۈرىدىغان، كۆرۈرمەنلەرنىڭ ياخشى باھاسىغا ئېرىشكەن كۆرگەزمە بولدى.

　　تەكشۈرۈپ بېكىتكۈچى: تۇرغۇن ئابلىز

　　مەنبە: خەلق تورى

ئەسكەرتىش: مەنبە خەلق تورى دەپ ئەسكەرتىلگەن مەزمۇنلارنىڭ ھەممىسى خەلق تورىغا تەۋە مەزمۇنلار بولۇپ، كۆچۈرمەكچى بولسىڭىز مەنبەنى ئېنىق ئەسكەرتىڭ

خەلق تورى ئۇيغۇرچە ئۈندىدار سۇپىمىزنى قوشۇۋېلىپ، ئەڭ نوپۇزلۇق خەۋەرلەردىن خەۋەردار بولۇڭ