خەلق تورى ئۇيغۇرچە قانىلىنىڭ 19-نويابر بېيجىڭدىن بەرگەن تېلېگراممىسى:گەنسۇدىن بىر تېلېفون كېلىپ « ئېيىق گۆشىنى يەيمەن» دېيىش بىلەنلا چېڭدۇ دورا سودىگەرلىرى 7 تال قارا ئېيىقنى قولغا چۈشۈرگەن. ھازىر، ئىككى ئادەم قانۇنسىز سېتىۋېلىش،يۆتكەش، قىممەتلىك، خەۋپ ئاستىدا قالغان ياۋايى ھايۋانلارنى ۋە ئۇلاردىن ياسالغان بۇيۇملارنى سېتىش گۇمانى بىلەن گۇاڭ يۈەن شەھىرى چىڭچۈەن ناھىيىسى ئورمان ساقچىلىرى تەرىپىدىن جىنايى ئىشلار بويىچە قولغا ئېلىندى. بۇ قېتىم ساقچى تەرەپ قولغا چۈشۈرگەن بىر توننىدىن ئارتۇق ئېيىق گۆشى ئىچىدە، 200 كىلوگىرامدىن ئارتۇق ئېيىق يېغى بار ئىكەن. ساقچىلار بۇ ئېيىق ياغلىرىنى بەلكىم دورا قىلىپ، رېماتىزم كېسىلىنى داۋالاشقا ئىشلىتىشى مۇمكىن دەپ پەرەز قىلدى.
ئىگىلىنىشچە، « دورا ياساش» نامىدا قانۇنسىز ياۋايى ھايۋانلارنى ئوغرىلىقچە ئوۋلاش ھەرىكىتى ئاز ئەمەس ئىكەن. ئېيىق يېغى، ئېيىق ئۆتى، يولۋاس سۆڭىكى، تاغتېشەر قاسرىقى، بۆكەن مۈڭگۈزى قاتارلىقلار ھەممىسى ئەنئەنىۋى جۇڭيى تىبابىتىدىكى دورا ياساشتا ئىشلىتىلىدىغان مۇھىم خام ماتېرىياللار ئىكەن. بۇلتۇر 8 - ئايدا، زىجۇڭ ئورمان ج خ ئىدارىسى سىچۈەن ئۆلكىسىدىكى ئەڭ چوڭ قانۇنسىز خەۋپ ئاستىدا قالغان ياۋايى ھايۋان_ تاغتېشەردىن ياسالغان بۇيۇملارنى سېتىش دېلوسىنى پاش قىلدى، دېلوغا چېتىشلىق تاغتېشەر قاسرىقى نەچچە ئون كىلوگىرامغا يەتكەن. ئاخىرىدا، دورا ماتېرىياللىرى شىركىتىنىڭ خوجايىنى جۇ ×، جۇڭيى ئامبۇلاتورىيەسىنىڭ خوجايىنى لو × سوتقا ئەرز قىلىندى.(مەلىكەم تەرجىمىسى)
تەكشۈرۈپ بېكىتكۈچى: تۇرغۇن ئابلىز
مەنبە: خەلق تورى