خەلق تورى ئۇيغۇرچە قانىلىنىڭ 28-سېنتەبىر بېيجىڭدىن بەرگەن تېلېگراممىسى: دۆلەت رەئىسى شى جىنپىڭ 26-سېنتەبىر نىيۇيوركتىكى ب د ت نىڭ باش ئىشتابىدا ب د ت تەرەققىيات باشلىقلار يىغىنىغا قاتناشتى ۋە «ئورتاق، سىجىل تەرەققىياتنى كۆزلەپ، ھەمكارلىشىپ ئورتاق يېڭىدىغان ھەمراھلاردىن بولايلى» دېگەن تېمىدا مۇھىم سۆز قىلدى.
دۆلەت رەئىسى شى جىنپىڭ 26-سېنتەبىر نىيۇيوركتىكى ب د ت نىڭ باش ئىشتابىدا ب د ت تەرەققىيات باشلىقلار يىغىنىغا قاتناشتى ۋە «ئورتاق، سىجىل تەرەققىياتنى كۆزلەپ، ھەمكارلىشىپ ئورتاق يېڭىدىغان ھەمراھلاردىن بولايلى» دېگەن تېمىدا مۇھىم سۆز قىلىپ، خەلقئارا جەمئىيەتنىڭ 2015-يىلدىن كېيىنكى تەرەققىيات قارالمىلىرىنى يېڭى باشلىنىش نۇقتىسى قىلىپ، ئادىل، ئېچىۋېتىلگەن، ئومۇميۈزلۈك، ئىجادىيەتچان تەرەققىيات يولىنى ئورتاق ئېچىپ، تىرىشىپ ھەر قايسى دۆلەتلەرنىڭ ئورتاق تەرەققىياتىنى ئىشقا ئاشۇرۇش كېرەكلىكىنى، جۇڭگونىڭ 2015-يىلدىن كېيىنكى تەرەققىيات قارالمىلىرىنى ئەمەلىيلەشتۈرۈشنى ئۆز مەسئۇلىيىتى قىلىپ، بىرلىكتە ھەمكارلىشىپ، دۇنيا تەرەققىياتىنىڭ ئۈزلۈكسىز ئالغا سىلجىشىغا تۈرتكە بولىدىغانلىقىنى تەكىتلىدى.
شى جىنپىڭ مۇنۇلارنى كۆرسەتتى: ب د ت قۇرۇلغانلىقىنىڭ 70 يىللىق مابەينىدە، ھەر قايسى دۆلەت رەھبەرلىرىنىڭ نىيۇيوركقا يىغىلىپ، تەرەققىيات چوڭ پىلانىنى ئورتاق مەسلىھەتلەشكەنلىكى ئىنتايىن مۇھىم ئەھمىيەتكە ئىگە. ھەر قايسى دۆلەت خەلقىگە نىسبەتەن تەرەققىيات ھاياتلىق ۋە ئۈمىدكە باغلانغان بولۇپ، ئىززەت-ئابرۇي ۋە ھوقۇققا سىمۋول قىلىنغان. دۇنياغا نەزەر سالىدىغان بولساق، تىنچلىق بىلەن تەرەققىيات يەنىلا ھازىرقى دەۋردىكى ئىككى چوڭ تېما، تىنچلىقنى كۆزلەپ، تەرەققىياتنى ئىشقا ئاشۇرۇش تۈرلۈك يەر شارى خاراكتېرلىك خىرىسلارنى ياخشى ھەل قىلىشنىڭ تۈپ چىقىش يولى.
شىنجاڭ گېزىتى تەرجىمىسى
مەنبە: خەلق تورى