ئىختىيارىي مۇخبىرىمىز دىلشاد غوجائەھمەد خەۋىرى؛ فوتوسى: 21 – دېكابىر ئۈرۈمچى «يىپەك يولى» خەلقئارا چاڭغا تېيىلىش مەيدانىدا ئۈرۈمچى شەھىرىنىڭ 12 – نۆۋەتلىك «يىپەك يولى» قار – مۇز جىلۋىسى بايرىمى يۈرۈشلۈك پائالىيىتىنىڭ بىر قىسمى بولغان 21– دېكابىر «خەلقئارا تاق چاڭغىدا قار تېيىلىش كۈنى» نى خاتىرىلەش كۆڭۈل ئېچىش، چاڭغا تېيىلىش پائالىيىتى بەكمۇ قىزىپ كەتتى. 22 – نويابىر بۇ يىللىق قىش پەسىللىك تىجارىتىنى باشلىغان «يىپەك يولى» خەلقئارا چاڭغا تېيىلىش مەيدانى شۇ كۈنى 7 مىڭدىن ئارتۇق چاڭغا تېيىلىش مەستانىلىرىنى كۈتۈۋالدى.
چاڭغا مەيدانىدا «BOX» سۇپىسىدا تاق چاڭغىدا تېيىلىۋاتقان شىنجاڭ ئۇنىۋېرسىتېتىنىڭ ئوقۇغۇچىسى ئەنۋەر تۇرغۇن مۇنداق دېدى: مېنىڭ بۇ تەنھەرىكەت تۈرى بىلەن شۇغۇللىنىۋاتقىنىمغا تۆت يىل بولۇپ قالدى، بۇ تۈرنىڭ كىشىگە ئېلىپ كېلىدىغان رىقابەت كۈچى ناھايىتى زور، شۇنداقلا قىيىنچىلىقى سەل يۇقىرىراق تەنھەرىكەت تۈرى. ھازىر ئۈرۈمچىدە بۇ تۈردىكى چاڭغىدا تېيىلىدىغانلار بارغانسېرى كۆپەيدى، مەخسۇس كۇلۇبلارمۇ قۇرۇلدى.
ئىگىلىشىمچە، ھازىر ئۈرۈمچىدە بۇ تۈردىكى چاڭغىدا مەخسۇس تېيىلىدىغانلار مىڭدىن ئارتۇق بولۇپ، بەش يىلدىن ئارتۇق تېيىلىش تارىخى بارلار بۇ ساننىڭ يېرىمىغا يېتىدىكەن.