ئۇكرائىنا ھۆكۈمەت ئارمىيەسى بىلەن رۇسپەرەس قوراللىقلار ئىمزالىغان ئۇرۇش توختىتىش كېلىشىمى 5-سېنتەبىردىن باشلاپ كۈچكە ئىگە بولۇپ نەچچە كۈن ئۆتمەيلا ، ئىككى تەرەپ 7-سېنتەبىر ئۇكرائىنانىڭ شىمالى ۋە جەنۇبىدىكى نۇرغۇن جايدا يەنە ئېتىشتى .
ئۇكرائىنا مۇستەقىللىق ئاگېنتلىقىنىڭ خەۋىرىدە دېيىلىشىچە ، ئۇكرائىنا ھەربىي تەرەپ شۇ كۈنى جاكارلاپ : ‹‹ رۇسپەرەس قوراللىقلار كېچىدە مىناميوت بىلەن دونىتسىك ئايرودۇرۇمىغا ھۇجۇم قىلدى ، بۇنىڭدىن باشقا ، ئېلىمىزنىڭ شەرقىگە جايلاشقان ئاۋدىۋكا ، لېبېدىنسىك ۋە مارىئۇپۇل قاتارلىق جايلاردىكى بازىلىرىمىز ۋە تەكشۈرۈش پونكىتلىرىمىز رۇسپەرەس قوراللىقلارنىڭ مىناميوت ھۇجۇمىغا ئۇچرىدى ، بىز قايتۇرما ھۇجۇم قىلىپ ، رۇسپەرەس قوراللىقلارنىڭ بىر تانكىسىنى بىتچىت قىلدۇق ›› دېگەن .
‹‹ئۇكرائىنا ھەقىقەت گېزىتى ›› نىڭ خەۋىرىگە قارىغاندا ، ئۇكرائىنانىڭ جەنۇبىدىكى شەھەر مارىئۇپۇلدا ھەربىي بازىلاردىن باشقا يەنە ماي قاچىلاش پونكىتى ۋە ئاھالىلەرنىڭ تۇرالغۇ ئۆيلىرىمۇ ھۇجۇمغا ئۇچرىغان ، بىر پۇقرا قازا قىلغان ، بىر ھەربىي يارىلانغان ، ئۈچ چوڭ ئادەم ، ئىككى كىچىك بالا (ئاۋام پۇقرا) ئولتۇرغان بىر ئاپتوموبىل ئوققا تۇتۇلغان .