4-نۆۋەتلىك جۇڭگو ئاسىيا-ياۋروپا كۆرگەزمىسى 2-سىنتەبىر كۈنى قەۋەتلا قىزىپ كەتتى . شىنجاڭ خوتەن ۋىلايىتى كۆرگەزمە ئورنى دۇنياغا داڭلىق بولغان خوتەن گىلىمى بىلەن خوتەن ئەتلىسىنى كۆرگەزمە قىلىپ ، كىشىلەرنىڭ كۆزىنى قاماشتۇردى . بۇنىڭ ئىچىدە ، ئالىم مەخمۇت قەشقىرى بىلەن يۈسۈپ خاس ھاجىپنىڭ ئوبرازى چۈشۈرۈلگەن گىلەم ، ئاتاغلىق يازغۇچى ئابدۇرېھىم ئۆتكۈرنىڭ ‹‹ ئىز ›› ناملىق شېئىرى چۈشۈرۈلگەن گىلەم كىشلەرنىڭ دىققىتىنى ئالاھىدە تارتتى . چەت ئەللىك مېھمانلار بۇ كۆرگەزمە ئورنىدا دۇنياغا داڭلىق خوتەن گىلەملىرىدىن ھۇزۇرلىنىش بىلەن بىرگە نەق مەيداندا گىلەمنىڭ توقۇلۇش ئۇسۇلى بىلەن تونۇشتى .
نۆۋەتتە ، خوتەن ئەتلىسى ئۇيغۇر خانىم -قىزلىرى ياقتۇرىدىغان ئەتىۋارلىق بۇيۇم بولۇپلا قالماستىن ، بەلكى خەلقئارادىمۇ داڭلىق كىيىم لايىھەلىگۈچىلەرنىڭ كىيىم لايىھەلەشتىكى ئىلھام بۇلىقىغا ئايلاندى . خوتەن ۋىلايىتى بۇ خىل ئېھتىياجغا ماسلىشىش ئۈچۈن ھازىرقى زامان ئالاھىدىلىكى ۋە گۈزەللىك قارىشىغا ماس بولغان رەڭ ۋە نۇسخىدىكى تېخىمۇ سۈپەتلىك ئەتلەسلەرنى توقۇپ چىقىپ كۆرگەزمىگە قاتناشتۇرۇپ ، ھەرقايسى رايونلاردىن كەلگەن مېھمانلارنى جەلپ قىلدى .
ئىگىلىنىشىچە ، خوتەن ۋىلايىتى بۇ قېتىم گۇما مەرۋايىت گىلەمچىلىك چەكلىك مەسئۇلىيەت شىركىتى ، كېرىيە يادىكار گىلەمچىلىك كارخانىسى ، قاراقاش بازىرى گىلەمچىلىك كارخانىسى ، لوپ ئىناق گىلەمچىلىك چەكلىك شىركىتى قاتارلىق 40 قا يېقىن گىلەمچىلىك ، توقۇمچىلىق شىركىتىنىڭ گىلەملىرىنى كۆرگەزمە قىلىپ ، يەرلىك كارخانىلارنى چەت ئەللەر ۋە ئىچكىرى ئۆلكىلەر بىلەن سودا مۇناسىۋىتى ئورنىتىپ ، خوتەننىڭ ئىقتىسادىنى ئىلگىرى سۈرۈشكە ئىلھاملاندۇردى .