خەلق تورى ئۇيغۇرچە قانىلىنىڭ 1-سېنتەبر بېيجىڭدىن بەرگەن تېلېگراممىسى: ئىختىيارىي مۇخبىرىمىز قۇرباننىياز قاسىم خەۋىرى، فوتوسى: 2014-يىل 8-ئاينىڭ 26-كۈنى گۇما ناھىيە نەۋئاباد تاجىك مىللىي يېزىسىدا ئۆزگىچە بىر ئەھمىيەتلىك پائالىيەت ئۆتكۈزۈلدى. يېزىدىكى ھەر مىللەت كادىر، ئامما، ئوقۇتقۇچى، ئوقۇغۇچىلار يارىشىملىق كىيىنىپ، رەتلىك تىزىلىپ، تاجىك مىللىي يېزىسى قۇرۇلغانلىقىنىڭ 30 يىللىقىنى تەبرىكلەش ئۈچۈن شاد-خۇراملىققا چومگەن ھالدا پائالىيەت مەيدانىدىن ئورۇن ئالغانىدى.
تەكلىپكە بىنائەن ناھىيە رەھبەرلىرى، ھەر قايسى يېزا- بازارلاردىن كەلگەن كادىرلار، يېزىدىكى تۆت پىشقەدەملەر، ۋەتەنپەرۋەر دىنىي زاتلار، ھەر مىللەت ئاممىسىدىن 1000 دىن كۆپرەك كىشى جەم بولدى. يېزىنىڭ پاكىز موھىتى، گۈزەل تاغ-دەريالىرى، كېلىشكەن، قامەتلىك، خۇشچاخچاق تاجىك ئوغۇل- قىزلىرى كىشىنى مەپتۇن قىلىپ سەپ تۈزگەن ئىدى. تەبرىكلەش پائالىيىتى باشلانغانلىقى جاكارلىنىشى بىلەن مەيداندا ئۇزۇنغا سوزۇلغان گۈلدىراس-ئالقىش سادالىرى ياڭرىدى. پائالىيەتتە گۇما ناھىيەلىك ناخشا-ئۇسسۇل ئۆمىكى، نەۋئاباد تاجىك مىللىي يېزىلىق ئەل-نەغمە سەنئەت ئۆمىكى ۋە مەكتەپ سەنئەت كۇرۇژۇكىدىكى ئوقۇغۇچىلار ئۆزلىرى تەييارلىغان مىللىي ئالاھىدىلىك بىلەن زامانىۋى مەدەنىيەت بىر گەۋدىلەشتۈرۈلگەن، پارتىيە، ئانا ۋەتەن، بەختلىك تۇرمۇش كۈيلەنگەن ھەر خىل ژانېردىكى قىزىقارلىق، نادىر سەنئەت نومۇرلىرىنى ئورۇنداپ، ھەر خىل ماھارەتلىرىنى كۆرسىتىپ، يېزا قۇرۇلغانلىقىنىڭ 30 يىللىق تويىغا تەنتەنە قىلىشتى.
سۈرەتتە: تەبرىكلەش پائالىيىتىدىن كۆرۈنۈشلەر.
تەرجىمە مۇھەررىرى: ت. ئا.ئەركمان
مەنبە: خەلق تورى