گوۋۇيۈەننىڭ زۇڭلىسى لى كېچياڭ 9-ئىيۇل چۈشتىن كېيىن ‹‹ خەلق ›› سارىيىدا دۇنيا باش ئىجرائىيە ئەمەلدارلىرى كومىتېتىنىڭ 2-نۆۋەتلىك يۇمىلاق شىرە يىغىنى ئۇچرىشىشىغا قاتناشقان ۋەكىللەر بىلەن سۆھبەتلەشتى
گوۋۇيۈەننىڭ زۇڭلىسى لى كېچياڭ 9-ئىيۇل چۈشتىن كېيىن ‹‹خەلق›› سارىيىدا دۇنيا باش ئىجرائىيە ئەمەلدارلىرى كومىتېتىنىڭ 2-نۆۋەتلىك يۇمىلاق شىرە يىغىنى ئۇچرىشىشىغا قاتناشقان ۋەكىللەر بىلەن سۆھبەتلەشتى .
گېرمانىيە ۋولكسۋاگېن ئاپتوموبىلى ، ئامېرىكا IBM شىركىتى ، گېرمانىيە سېيمېنس شىركىتى ، فىنلاندىيە نوكىيا شىركىتى ، ئەنگلىيە چارتېرېد بانكىسى قاتارلىق دۇنيادىكى 500 كۈچلۈك دۆلەت ھالقىغان شىركەتلەرنىڭ دىرېكتورلىرى ، باش ئىجرائىيە ئەمەلدارلىرى ئايرىم-ئايرىم ئىقتىسادىي تەرەققىيات ، يېڭىلىق يارىتىش ، پۇل مۇئامىلە ھەمكارلىقى ، ئېنېرگىيە تېجەش ، مۇھىت ئاسراش ، جۇڭگونىڭ ئىسلاھاتى قاتارلىق تېمىلاردا پىكىر بايان قىلدى ھەمدە تەكلىپلەرنى ئوتتۇرىغا قويدى . لى كېچياڭ ئۇلار بىلەن پىكىر ئالماشتۇردى ھەمدە سورىغان سوئاللىرىغا جاۋاب بەردى .
لى كېچياڭ مۇنداق دەپ كۆرسەتتى : جۇڭگو ئىقتىسادى ئوتتۇرا، ئۇزاق مەزگىلدە ئوتتۇرا ، يۇقىرى سۈرئەتلىك ئېشىش ۋە سىجىل ، ساغلام تەرەققىياتنى ئەمەلگە ئاشۇرۇشتا ، چوقۇم ئىلمىي تەرەققىي قىلىپ ، تەرەققىيات شەكلىدە تىرىشىپ بۇرۇلۇش ياسىشى ، ئىقتىسادىي قۇرۇلمىلارنى ئاكتىپ تەڭشەپ ، ئېشىش دەرىجىسىنى كۈچەپ يۇقىرى كۆتۈرۈشى كېرەك . ئىگىلىكنى ئوتتۇرا ، يۇقىرى سەۋىيەگە قاراپ تەرەققىي قىلدۇرۇشتا ، يېڭىچە سانائەتلەشتۈرۈش يولىدا مېڭىش ، ئېنېرگىيە بايلىقى ‹‹ بوغما ›› ھالەت چەكلىمىسىدىن بۆسۈپ ئۆتۈپ ، يېشىل تەرەققىياتقا تۈرتكە بولۇش كېرەك . پۇل مۇئامىلە بىلەن ئەمەلىي ئىقتىسادنى قوللاپ ، ئىقتىسادىي تەرەققىياتنى ئىلگىرى سۈرۈپ ، پۇل مۇئامىلە بىخەتەرلىكىنى قوغداش كېرەك.