خەلق تورى ئۇيغۇرچە قانىلىنىڭ 24-مارت بېيجىڭدىن بەرگەن تېلېگراممىسى: تەكلىپلىك مۇخبىرىمىز نۇرمۇھەممەد ئايۇپ خەۋىرى: يېقىنقى كۈنلەردىن بېرى يەكەن ناھىيەسىنىڭ يېزا-قىشلاقلىرىدا ئەنئەنىۋىي مىللى بايرام بولغان نورۇز بايرىمى تەنتەنىلىك تەبرىكلەنمەكتە.
3-ئاينىڭ 23- كۈنى كەچتە يەكەن مۇقام ۋارىسلىرىنى تەربىيەلەش مەركىزى قاينام-تاشقىنلىق نورۇز كەيپىياتىغا چۆمگەن بولۇپ بۇ كۈنى يەكەن ناھىيەلىك ئەلئىچى سەنئەت ئۆمىكى ئەزالىرىدىن تەركىب تاپقان 30 نەچچە مۇقام سەنئەتكارى يەكەن ناھىيەلىك يېتىم بالىلار مەكتىۋىدىكى بالىلارغا نورۇزلۇق مۇقام سەنئەت كېچىلىكى ئۆتكۈزۈپ بەردى.
كېچىلىككە يەكەن ناھىيەسىدىكى دۆلەتلىك مۇقام سەنئەتكارلىرىدىن يۈسۈپ توختى، ئابلەت سەلەي قاتارلىق سەنئەتكارلار ۋە يەكەن دەرياسىنىڭ ئىككى قاسنىقىدىن كەلگەن خەلق ئەلنەغمىچىلىرى ئون ئىككى مۇقام، دولان مەشرىپى، سېرىك، سېھرىگەرلىك، دارۋازلىق ئويۇنلىرىنى كۆرسەتتى. مۇھەممەد مۇسا (مەرگەن)، ئابدۇرۇسۇل مۇھەممەد ئەلتۇغ قاتارلىق شائىرلار نورۇز بايرىمىلىق يازغان شىئىر-نەسىرلىرىنى دىكلاماتسىيە قىلدى. كېچىلىك ئاخىرىدا يېتىملار مەكتىپىدىن كەلگەن يېتىم بالىلار ۋە باشقا تاماشابىن بىرلىكتە دولان ئۇسسۇلىغا چۈشۈپ، نورۇز بايرىمىنى يۇقىرى كەيپىياتقا كۆتەردى.
كېچىلىككە يېتىملار مەكتىۋىدىكى يۈز نەپەردىن ئارتۇق يېتىم بالا ۋە بىر قىسىم پېشقەدەم كادىرلاردىن بولۇپ 200 نەپەرگە يېقىن كىشى قاتناشتى.
تەكلىپلىك مۇخبىرىمىز نۇرمۇھەممەد ئايۇپ فوتوسى، مۇخبىر يەكەن ناھىيەلىك مائارىپ ئىدارىسىدا ئىشلەيدۇ.
مۇھەررىر: مۇسا ھەيدەر
مەنبە: خەلق تورى