خەلق تورى ئۇيغۇرچە قانىلىنىڭ 17-مارت بېيجىڭدىن بەرگەن تېلېگراممىسى: ھۆكۈمەت خىزمىتىدىن دوكلاتتا ، «يىپەك يولى ئىقتىسادىي تۈگۈنى قۇرۇشنى چىڭ تۇتۇش» ئوتتۇرىغا قويۇلدى. بۇ قېتىملىق ئىككى يىغىندا، سىياسىي كېڭەش ئەزاسى، شىنجاڭ يېزا ـ ئىگىلىك ئۇنىۋېرسىتېتى ئىقتىساد ۋە سودا ئىنىستىتۇتىنىڭ مۇئاۋىن باشلىقى بۈۋىھەجەر شىنجاڭ يىپەك يولى ئىقتىسادىي تۈگۈنىدىكى ئاساسىي كۈچ ۋە باشلامچىلىق رولىنى ياخشى ئورۇنلاپ، يىپەك يولى بويىدىكى ھەر قايسى دۆلەت ھۆكۈمەتلىرى بىلەن ئاكتىپ ئالاقىلىشىپ، ئىمكانقەدەر يېپەك يولى ئىقتىسادىي تۈگۈنى مەدەنىيەت ئالماشتۇرۇش ھەمكارلىق ئاپپاراتىنى بالدۇرراق قۇرۇپ چىقىشنى ئوتتۇرىغا قويدى.

　　مەملىكەتلىك ئىككى يىغىن مەزگىلىدە، ئاتاقلىق مىللەتشۇناسلىق مۇتەخەسسىسى، جۇڭگو ئىجتىمائىي پەنلەر ئاكادېمىيەسى مىللەت ۋە ئىنسانىيەتشۇناسلىق تەتقىقات ئورنىنىڭ باشلىقى ئەزا خاۋ شىيۈەن ئىستانسىمىز مۇخبىرىنىڭ مەخسۇس زىيارىتىنى قوبۇل قىلغاندا مۇنۇلارنى بىلدۈردى: مىللىي تېررىتورىيەلىك ئاپتونومىيە تۈزۈمى ئېلىمىزنىڭ تۈپ سىياسىي تۈزۈمى، مىللىي مەسىلىنى ھەل قىلىشنىڭ تۈپ تۈزۈم خاراكتېرلىك كاپالىتى، مىللىي تېررىتورىيەلىك ئاپتونومىيە تۈزۈمىنى ئىسلاھات ئارقىلىق ئۈزلۈكسىز مۇكەممەللەشتۈرۈش كېرەك. 　　ئەزا خاۋ شىيۈەن مۇنداق دېدى: زۇڭلى لى كېچياڭ ھۆكۈمەت خىزمىتىدىن بەرگەن دوكلاتىدا مىللىي تېررىتورىيەلىك ئاپتونومىيە تۈزۈمىدە چىڭ تۇرۇش ۋە ئۇنى مۇكەممەللەشتۈرۈشنى يەنە بىر قېتىم تەكىتلەپتۇ، مېنىڭچە تۈزۈمگە ئىشىنىش شۇنداقلا تۈزۈلگەن تۈزۈمنى تىرىشىپ مۇكەممەللەشتۈرۈش كېرەك. 　　خاۋ شىيۈەن دۆلەتنىڭ شىنجاڭ، شىزاڭغا ياردەم بېرىش مەسىلىسى ھەققىدە مۇنۇلارنى بىلدۈردى: شەرقىي قىسىمنىڭ تەجرىبىسىنى ئەينەن كۆچۈرۈپ كېلىش ھەرقانداق رايوننىڭ ئەمەلىيىتىگە ئۇيغۇن كېلىشى ناتايىن، ئاچقۇچلۇقى شۇ يەردىكى ئاز سانلىق مىللەت ئاممىسىنىڭ تۈپ مەنپەئەتىگە ئۇيغۇن كېلىش كەلمەسلىكىدە، بۇ مەسىلىنى ھەل قىلىش ئۈچۈن ئەڭ مۇھىمى ئاز سانلىق مىللەت ئىشچىلار سىنىپى قوشۇنىنى يېتىلدۈرۈش لازىم، ھازىر نۇرغۇن دۆلەت كارخانىلىرى شىنجاڭ، شىزاڭ، ئىچكى موڭغۇل قاتارلىق رايونلارنىڭ بايلىقىنى ئىچىشقا كىردى، ئۇلارنىڭ نۇرغۇنلىرى شۇ جايدىكى ئاز سانلىق مىللەتلەرنى بايلىقنى ئېچىش قۇرۇلۇشىغا قاتناشتۇرمىغانلىقتىن شۇ جايدىكى مىللەتلەردە خۇددىي بايلىقنى ئۇلار ئېلىپ كېتىۋاتقاندەك، ئۇلار بىلەن قىلچە مۇناسىۋىتى يوقتەك ھىسسيات پەيدا بولۇپ قالدى، ئەگەر يەرلىك مىللىي ئاممىنى بايلىقنى ئېچىشقا جەلپ قىلسا ئۇلار ئۇنداق دەپ قارىمايتتى.